އަލް އަގްސާ މިސްކިތް ބައިބައި ކުރުމަށް އިސްރާއީލުގެ މަޖިލީހުގައި މަޝްވަރާ ކުރަމުންދާ ގާނޫނެއްގެ ޑްރާފް ބިލާމެދު ފަލަސްތީނުން ކަންބޮޑުވެ، އެ ގާނޫނު ތަންފީޒުކުރުން ހުއްޓުވުމަށް ތުރުކީ، މެލޭޝިއާ، އިންޑޮނޭޝިއާ އަދި މިސްރުގެ ތާއީދަށް އެދިއްޖެއެވެ.
ފަލަސްތީނުގެ ބޮޑުވަޒީރު މުހައްމަދު ޝްތައްޔާ ވަނީ އިސްރާއިލްގެ ލިކުޑް ޕާޓީގެ މެމްބަރު، އަމީތު ހަލޭވީ ހުށަހެޅުއްވި ބިލް އިސްރާއީލުން ފާސްކުރުމަށް މަސައްކަތްކުރުމާ ދެކޮޅަށް އިންޒާރު ދެއްވާފައެވެ. އެގޮތުން، މިބިލް ފާސްކޮށްފި ނަމަ، ފަލަސްތީނާއި، މުސްލިމު އެހެން ގައުމުތަކާއި އަރަބި ގައުމުތަކުން ހީނުކުރާވަރުގެ ބޮޑު ރުޅިވެރިކަމެއް، އިސްރާއިލަށް އަމާޒުވެގެންދާނެ ކަމަށް ފަލަސްތީނުގެ ބޮޑުވަޒީރު ވަނީ ވިދާޅުވެފައެވެ.
ފަލަސްތީނުގެ ބޮޑުވަޒީރު ވަނީ އިސްރާއިލުގެ އަމަލުތައް ހަމައެކަނި ކުއްވެރިނުކޮށް، އެގައުމުން ކުރާ މިފަދަ ކަންތައްތައް ހުއްޓުވުމަށް އެގައުމާ ދެކޮޅަށް އަރަބި އަދި އިސްލާމީ ގައުމުތަކާ ބައިނަލްއަގުވާމީ މުޖުތަމައުން ދަތިކުރުމުގެ ފިޔަވަޅު އެޅުމަށް ގޮވާލާފައެވެ. އަދި އަޤްސާ މިސްކިތްތައް އެއްވެސް ބަދަލެއް ގެނައުމުގެ ފުރުސަތު ނުދިނުމަށްވެސް ވަނީ ގޮވާލައްވާފައެވެ.
އިސްރާއިލުން މަސައްކަތް ކުރަމުންދަނީ އަލް-އަޤްސާ މިސްކިތް މުސްލިމުންނާ ޔަހޫދީންގެ މެދުގައި ބަހައި، ބައި ބައިކުރުމަށެވެ.
ހަލޭވީ ވަނީ ޑޯމް އޮފް ދަ ރޮކްގެ ގޯތިތެރެއިން ފެށިގެން އަލްއަގްސާ މިސްކިތުގެ އުތުރު ބޯޑަރުގެ ނިމުމާއި ހަމައަށް އޮންނަ ސަރަހައްދު ޔަހޫދީންނަށް ދޫކުރުމަށް ހުށަހަޅާފައެވެ.
ފަލަސްތީނުގެ ކަންބޮޑުވުމަކީ މި ޕްލޭނަކީ ފަލަސްތީނާއި އިސްރާއީލުގެ ސިޔާސީ ކޯޅުން ދީނީ ހަނގުރާމައަކަށް ބަދަލުކޮށް، ފަލަސްތީނުގެ ސަރަހައްދުތަކުގައި އަނިޔާވެރިކަން އިތުރަށް ފުޅާކުރާނެ ބޮޑު މަޝްރޫއަކަށް މިކަން ވެގެން ދިއުމެވެ.
އަޤްސާ މިސްކިތަށް އިސްރާއިލުން ގެންނަން މަސައްކަތްކުރާ އެއްވެސް ބަދަލެއް ގެނައުމަށް ފަލަސްތީނުގެ އިތުރުން ޖޯޑަން އިން ވެސް ދެކޮޅު ހަދައެވެ.
އިސްރާއިލުގެ މި ޕްލޭނަކީ، އެގައުމުން ފަލަސްތީނަށް އަތްގަދަކުރަމުންދާ ދިއުން އިތުރު ހަރުފަތަކަށް ގެންދިއުން ކަމަށްވެސް މަސްރަހު ދިރާސާކުރާ ފަރާތްތަކުން ދަނީ ފާހަގަކުރަމުންނެވެ. އިސްރާއީލު ސަރުކާރުން މަސައްކަތް ކުރަމުންދަނީ ފަލަސްތީނުގެ ދައުރު ގުދުސްގައި ކުޑަކުރުމަށް ކަމަށްވެސް ދިރާސާކުރާ ފަރާތްތަކުން ދަނީ ފާހަގަކުރަމުންނެވެ.
އަލްއަގްސާ މިސްކިތަކީ ހަމައެކަނި މުސްލިމުންނަށް މުޤައްދަސް ތަނެއް ކަމަށާއި، އެތަނުގެ މައްޗަށް އުރުދުންގެ ބެލެނިވެރިކަމަށް އިސްރާއީލުން އިޙްތިރާމް ކުރަން ޖެހޭ ކަމަށް ގުދުސްގެ ކަންކަމާ ބެހޭ ރިޔާސީ ލަފާދޭ އަހުމަދު އަލް ރުވައިދީ ވަނީ ވިދާޅުވެފައެވެ.
އޭނާ ވިދާޅުވީ އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވަނީ އިޓަމާ ބެން ގްވީރާއި ބެޒާލެލް ސްމޮޓްރިޗް ފަދަ އިސްރާއީލުގެ ކަނާތުފިޔައިގެ އެކްޓިވިސްޓުންނަށް އަލްއަގްސާއަށް ވަދެ ނަސްލީ ތަފާތުކުރުން ގެންގުޅޭ ބަޔާންތައް ނެރުމަށް ފެހި ސިގްނަލް ދީފަކަމަށެވެ. އަދި ނަތަންޔާހޫ އަލްއަގްސާ މިސްކިތުގެ މައްސަލަ ބޭނުން ކުރައްވަނީ ސިޔާސީ ކާމިޔާބީތައް ހޯއްދަވަން ކަމަށާއި، ދީނީ ހަނގުރާމައެއް ފަށައިފި ނަމަ އޭގެ އަސަރު އެންމެންނަށް ވެސް ކުރިމަތިވާނެ ކަމުގެ އިންޒާރު އަލް ރުވައިދީ ވަނީ ދެއްވާފައެވެ.
ފަލަސްތީނުގެ ރައްޔިތުން ބުނާ ގޮތުގައި އަލްއަގްސާ މިސްކިތް ބައިބައި ކުރުމުގެ ބިލުން އެ މިސްކިތުގެ އިސްލާމީ އައިޑެންޓިޓީ ބަދަލުވެ، ހަމައެކަނި އަލް ޤިބްލީ ނަމާދު ހޯލަށް ނިސްބަތްވާނެ އެވެ.
އޭނާގެ ޕްލޭންގައި ހަލޭވީ ވަނީ ފަލަސްތީނުގެ ރައްޔިތުން ބުނާ ގޮތުގައި ސްޓޭޓަސް ކުއޯއަށް ނިމުމެއް ގެނަސް، މިސްކިތުގެ މައްޗަށް އިސްރާއީލުގެ ކޮންޓްރޯލް ފުޅާކުރެވޭނެ މަގު ފަހިކުރެވޭނެ ގޮތްތައް ހިމަނާފައެވެ.
މި ޑްރާފްޓް ގާނޫނުގައި ޔަހޫދީންނަށް މިސްކިތަށް ވަދެވޭ ގޮތަށް އޮތް، އިސްރާއީލުގެ ކަމާބެހޭ ފަރާތްތަކުގެ ފުރިހަމަ ކޮންޓްރޯލްގެ ދަށުގައިވާ އަދި ފަލަސްތީނުގެ އެއްވެސް މީހަކަށް ނުވަދެވޭ، މޮރޮކޯ ގޭޓުގެ ބަދަލުގައި ހުރިހާ ގޭޓަކުންވެސް ވަނުމުގެ ހުއްދަ ދޭން ވަނީ ހުށަހަޅާފައެވެ.
