އަފީފަށް އައި ފޯނު ކޯލަކާއެކު މަޖިލީހުގެ ޖަލްސާ ނިންމާލައިފި
14 ޖޫން 2023 | ބުދަ 08:10އަފީފް ވިދާޅުވީ ޖަލްސާ ނިންމާލަނީ މަޖިލީހުގެ ނިޒާމް ގެއްލިފައިވާތީ ކަމަށް
މަޖިލީހުގެ ޖަލްސާ
ބުދަ ދުވަހުގެ ރައްޔިތުންގެ މަޖިލީހުގެ ޖަލްސާގެ ރިޔާސަތު ބަލަހައްޓަވަމުން ގެންދެވި ވިލުފުށީ ދާއިރާގެ މެންބަރު ހަސަން އަފީފަށް އައި ފޯނުކޯލަކާއެކު މަޖިލީހުގެ ޖަލްސާ ނިންމާލައިފިއެވެ.
ބުދަ ދުވަހުގެ މަޖިލީހުގެ ޖަލްސާގެ ހެނދުނުގެ ދަންފަޅި ފެށުމާއެކު އިދިކޮޅު ބައެއް މެންބަރުން އަޑުގަދަކުރައްވަން ފައްޓަވާ، މަޖިލީހުގެ ނިޒާމް ގެއްލުވާލުމުން މަޖިލީހުގެ ޖަލްސާ ވަނީ މެދުކަނޑާލާފައެވެ.
ބުދަ ދުވަހުގެ ޖަލްސާގައި ރިޔާސަތުގައި އަފީފް އިންނެވީ މަޖިލީހުގެ ރައީސް މުހައްމަދު ނަޝީދާއި މަޖިލީހުގެ ނާއިބު ރައީސް އީވާ އަބްދުﷲ މަޖިލީހުގެ ރިޔާސަތު ބަލަހައްޓަވަން އުޒުރުވެރިވެވަޑައިގަތުމުންނެވެ.
މަޖިލީސް މެދުކަނޑާލީ އިދިކޮޅު ފަރާތްތަކުން އަޑުގަދަކޮށް މަޖިލީހުގެ ނިޒާމް ގެއްލުވާލުމުން މަޝްވަރާކުރުމަށް ކަމަށް ބުނެއެވެ.
ނަމަވެސް ޖަލްސާގެ ދެވަނަ ދަންފަޅި ފެށުމުން ވެސް މެންބަރުން ވަނީ ތަޅުމުގައި އަޑުގަދަކޮށް ހަޅޭއްލަވާފައެވެ.
އެގޮތުން އެމްޑީޕީން ވަކިވެ މިހާރު އަމިއްލަ މެންބަރުންގެ ގޮތުގައި ތިއްބެވި 12 މެންބަރުންނާއި އެމްޑީޕީން ވަކިކޮށްފައިވާ މެންބަރަކު ވަނީ މަޖިލީހުގެ ރިޔާސަތުގެ ކައިރިއަށް ގޮސް އަޑުގަދަކުރައްވާފައެވެ.
މެންބަރުންގެ ހަޅޭކާއި ހުރެ މަޖިލީހުގެ އެޖެންޑާގައިވާ މަސައްކަތްތައް ކުރިއަށް ގެންދެވިފައެއް ނުވެއެވެ.
އަދި މަޖިލިސް ކުރިއަށް ދަނިކޮށް އަފީފަށް ފޯނެއް އައުމުން "އާދެ، މި ނިންމާލަނީ" މިހެން ވިދާޅުވުމަށް ފަހު، ދެން އޭނާ ވަނީ މަޖިލީސް ނިންމަވާލައްވާފައެވެ.
ބުދަ ދުވަހުގެ ޖަލްސާ އަށް މަޖިލީހަށް ރައްޔިތުންގެ މަޖިލީހުގެ ދާއިމީ ކޮމިޓީތަކުގައި ހިމެނިވަޑައިގަންނަވާ ސިޔާސީ ޕާޓީތަކަށް ނިސްބަތްވެވަޑައިގަންނަވާ މެންބަރުންނާ ވަކި ޕާޓީއަކަށް ނިސްބަތްވެވަޑައިނުގަންނަވާ މެންބަރުން ތަމްސީލުކުރައްވާނެ ގޮތަށް ގެނެވޭ ބަދަލާ ގުޅޭ މައްސަލަ ވަނީ އެޖެންޑާކޮށްފައެވެ.
މަޝްވަރާ އަށް މެދުކަނޑާލުމަށް ފަހު ޖަލްސާ އަލުން ފެށުމުން މަޖިލީހުގައި ތިއްބެވި ކުރީގެ ރައީސް މުހައްމަދު ނަޝީދަށް ތާއީދުކުރައްވާ މެންބަރުން ވަނީ އެ މައްސަލަ އެޖެންޑާގައި ހިމަނާފައި ވަނީ ގަވާއިދާއި ޚިލާފަށް ކަމަށް ބުނެ، ނިޒާމީ ނުކުތާތައް ނަންގަވާފައެވެ. އެހެންނަމަވެސް އޭރު އެޖެންޑާގެ އެ މަސައްކަތްތަކާއި ހަމައަށް ނުދާތީ އެޖެންޑާގެ އެ ނަމްބަރާއި ހަމައަށް ދެވެންދެން ނިޒާމީ ނުކުތާ ނެންގެވުމަށް މަޑުކޮށްލަން އަފީފް އެދިވަޑައިގަތެވެ. އަދި މަޖިލީހުގައި އެ މައްސަލަ އެޖެންޑާކުރީ ރަނގަޅަށް ކަމަށް ވެސް އަފީފް ވިދާޅުވިއެވެ.
ކޮމިޓީތައް އެކުލަވާލުމުގެ މަސައްކަތުގެ ކުރިއަށް، މަޑުއްވަރީ ދާއިރާގެ މެންބަރު އާދަމް ޝަރީފް އުމަރު ހުށަހަޅުއްވާފައިވާ ކުއްލި މައްސަލަ ހުށަހެޅުއްވުމަށް ވަނީ އެޖެންޑާކޮށްފައެވެ.
އެ މައްސަލަ އަކީ ސަރުކާރުން ބަދަލުގެ ގޮތުގައި 1.6 ބިލިއަން ރުފިޔާ ދޫކުރި ގޮތް ސާފުކުރުމަށް ހުށަހެޅި މައްސަލަ އެކެވެ. ނަމަވެސް އެ މަައްސަލަ ހުށަހެޅުމަށް އިދިކޮޅު މެންބަރުން ފުރުސަތު ދެއްވާފައެއް ނުވެއެވެ.
މަޖިލީހުގެ ތަޅުން ހޫނުވެ މެންބަރުން ވަނީ ރިޔާސަތުގެ މޭޒުކޮޅު ކައިރި އަށް ގޮސް އިހުތިޖާޖުކުރައްވާފައެވެ.
ޖަލްސާ ނިންމާލީ އަފީފަށް އެ އިހުތިޖާޖު ކުރިއަށް ދަނިކޮށް އައި ފޯނުކޯލަކަށް ފަހުގައެވެ. އެހެންނަމަވެސް އެ ފޯނު ކޯލަކީ ކޮން ބޭފުޅަކު ކުރެއްވި ފޯނުކޯލެއް ކަމެއް އެނގިފައިނުވެއެވެ.
އަފީފް ވިދާޅުވީ ޖަލްސާ ނިންމަވާލައްވަނީ މަޖިލީހުގެ ނިޒާމް ގެއްލިފައިވާތީ ކަމަށެވެ. އަދި ދެން މަޖިލީހުގެ ޖަލްސާ އެއް އޮންނާނީ 19 ޖޫންގައި ކަމަށް ވެސް އޭނާ ވަނީ ވިދާޅުވެފައެވެ.
މަޖިލީހުގައި ކުރުން ހުއްދަ ނޫން ކަންކަމުގެ ތެރޭގައި، މަޖިލީހުގެ ގަވާއިދުގެ 56 ވަނަ މާއްދާގެ (ދ)ގައި ވަނީ މޯބައިލް ފޯނު މަޖިލީހުގެ ޖަލްސާތަކަށާއި މަޖިލީހުގެ ކޮމިޓީތަކަށް ވެއްދުމަކީ ހުއްދަކަމެއް ކަމަށެވެ. އެހެންނަމަވެސް ޖަލްސާގެ ވަގުތާއި ކޮމިޓީގެ ވަގުތުގައި މޯބައިލް ފޯނުން ފޯނުކުރުމުގެ ފަންކްޝަން ބޭނުން ކުރުމަކީ މަނާކަމެއް ކަމަށް އެ މާއްދާގައި ވަނީ ބުނެފައެވެ. އަދި ފޯނުކުރުމުގެ ފަންކްޝަން ކަމަށް ބުނެފައި ވަނީ ފޯނު ކުރުމާއި ފޯނަށް ޖަވާބު ދިނުން ކަމަށް ވެސް އެ މާއްދާގައި ބަޔާންކޮށްފައިވެއެވެ.
