މޫސުމަށް އަންނަ ބަދަލުތަކާއި ދިމާވާ ގޮންޖެހުންތަކުގައި ރާއްޖެއާއި ސޭޝެލްސްއިން ގުޅިގެން މަސައްކަތް ކުރަންޖެހޭ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
ރައީސް ޞާލިހު މިހެން ވިދާޅުވީ ސޭޝެލްސް ގެ ރައީސް ރާއްޖެއަށް ކުރައްވަމުން ގެންދަވާ ދަތުރުފުޅުގެ ތެރެއިން ރާއްޖެއާއި ސޭޝެލްސްއާ ދެމެދު ހަތަރު އެއްބަސްވުމެއް ބަދަލުކުރެއްވުމަށްފަހު ދެއްކެވި ވާހަކަފުޅުގައެވެ.
ރައީސް ޞާލިހު ވިދާޅުވީ، ރައީސް ރާމްކަލާވަންގެ މި ދަތުރުފުޅަކީ، ދެ ގައުމުގެ ދެމެދުގައި އޮތް ގާތް ގުޅުމަށް އިތުރުވެގެންދާ ތާރީޚީ އާ ކުރިއެރުމެއް ކަމަށާއި، ރާއްޖެއާއި ސޭޝެލްސްއަކީ، ދުރު އަވަށްޓެރި ދެ ގައުމު ކަމުގައިވީ ނަމަވެސް، ދެ ގައުމުގެ ދެމެދުގައި ހުރި ތަފާތުތަކަށްވުރެ އެއްގޮތް ކަންކަން ގިނަ ކަމަށެވެ. ޖަޒީރާތަކުގެ ރަށްވެހީންގެ ހައިސިއްޔަތުން އާދަކާދަތަކާއި، ދިރިއުޅުމަށް ކުރާ މަސައްކަތްތަކާއި، ދިރިއުޅުމުގެ ވައްޓަފާޅީގައިވެސް އެއްގޮތް އެތައް ކަންތައްތަކެއް ހުންނަ ކަމަށް އެމަނިކުފާނު ވިދާޅުވިއެވެ.
ރައީސް ސާލިހު ވިދާޅުވީ އިގްތިސާދުތަކަށް ކަނޑުގެ ރޯދިން ބޮޑެތި މަންފާތަކެއް ލިބޭއިރު، ސުލްހައާއި ސަލާމަތްތެރިކަން ގުޅިފައި ވަނީ އިންޑިއާ ކަނޑުގެ ސަލާމަތާއި ރައްކާތެރި ކަމަށެވެ. އަދި އެންމެބޮޑު އެއް ކަންބޮޑުވުމެއް ކަމަށްވާ މޫސުމީ ބަދަލުތަކާއި، އެކަމުން ކުރާ ނޭދެވޭ އަސަރުތައްވެސް ގުޅިފައި ވަނީ ގައުމުތައް ވަށާލާފައިވާ ބިޔަ ކަނޑުގެ އޮއިވަރަށާއި ދިޔަވަރަށް ކަމަށެވެ.
އެގޮތުން ތަރައްގީގެ މަގުގައި ދެ ގައުމުގެ ތަޖުރިބާއާއި، މޫސުމީ ބަދަލުތަކުގެ ސަބަބުން ކުރިމަތިވާ ގޮންޖެހުންތަކާއި، ދެ ގައުމުގައި ވެސް ހައްސާސް މައްސަލަތަކަށް ހައްލު ހޯދުމުގައި މިހާރަށްވުރެ ބޮޑަށް ދެ ގައުމުން ގުޅިގެން، އެއްބަޔަކު އަނެއް ބަޔަކަށް އެއްބާރުލުން ދޭންޖެހޭ ކަމަށް ރައީސް ޞާލިހު ވިދާޅުވިއެވެ.
ޢިއްޒަތްތެރި ރައީސް؛ ދިވެހިރާއްޖެއަށް މަނިކުފާނު ތިޔަ ކުރައްވާ ދަތުރުފުޅަކީ، ސޭޝެލްސްގެ ސަރުކާރުން ދިވެހިރާއްޖެއާއި ސޭޝެލްސްގެ ދޭދޭ ގުޅުންތައް އިތުރަށް ބަދަހިކުރުމަށް ދެއްވާ އިސްކަން ރަމްޒުކޮށްދޭ އަލިގަދަ ހެތްކެއް. މިއަދު މި ދަތުރުފުޅުގެ ތެރެއިން އަޅުގަނޑާ ރައީސް ރާމްކަލާވަން މަޝްވަރާތައް ބޭއްވިން. މި މަޝްވަރާތަކުގައި، ދެ ޤައުމުގެ ދެމެދުގައި އޮންނަ ގުޅުމާއި، ބައިނަލްއަޤްވާމީ މައިދާނުގައި، ދެ ޤައުމުން ކުރާ އެންމެހައި މަސައްކަތްތަކާ ގުޅޭގޮތުން މަޝްވަރާކޮށް، ދެ ޤައުމުގެ ދެމެދުގައި އޮތް އެކުވެރިކަމާއި އެއްބާރުލުމާއި، އެއްބަޔަކު އަނެއް ބަޔަކަށް ހެޔޮކޮށްހިތުމުގެ ރޫޙު އިތުރަށް ބަދަހިކުރެވޭނެ ގޮތްތަކާމެދު ޚިޔާލުތައް ބަދަލުކުރެވުނު.ރައީސް އިބްރާހިމް މުހައްމަދު ޞާލިހު
ރާއްޖެއާއި ސޭޝެލްސްއާ ދެމެދު ވިސާ ނެގުމަކާ ނުލައި ދަތުރުކުރެވޭނެ އިންތިޒާމު ހަމަޖެހިގެން ދިއުމާއި ގުޅިގެން އެކަމަށް އިޝާރާތް ކުރައްވައި ރައީސް ޞާލިހު ވިދާޅުވީ މި އެއްބަސްވުމުގެ ސަބަބުން ދިވެހިންނާއި ސޭޝެލްސްގެ ރައްޔިތުންނާ ދެމެދު އޮންނަ ގާތް ގުޅުން އިތުރަށް ބަދަހިކުރުމުގެ ފުރުސަތު ފުޅާވެ، ދެ ގައުމުގެ ދެމެދުގައި ހިނގާ މުއާމަލާތްތައް އިތުރުކުރުމަށް ފަހިވާނެ ކަމަށެވެ.
މީގެ އިތުރުން ފަތުރުވެރިކަމުގެ ދާއިރާއިން ދެ ގައުމުގެ ދެމެދުގައި ތަޖުރިބާއާއި މައުލޫމާތު ހިއްސާކުރުމާ ބެހޭގޮތުން އަދި ދެ ގައުމުންވެސް މި ސިނާއަތުގައި ގެންގުޅޭ މަސައްކަތުގެ ވައްޓަފާޅިން ތަޖުރިބާ ލިބިގަނެވޭނެ ގޮތްތަކާމެދު މަޝްވަރާކުރެއްވި ކަމަށް ރައީސް ޞާލިހު ވިދާޅުވިއެވެ. އިގްތިސާދާއި ވިޔަފާރީގެ ދާއިރާއިން ދެ ގައުމުގެ ދެމެދުގައި ހިނގާ އިގްތިސާދީ ހަރަކާތްތައް އިތުރުކުރުމަށާއި، ކުރެވޭ ވިޔަފާރީގެ މުއާމަލާތްތަކުގެ މިންވަރު އިތުރުކުރުމަށް ދެ ގައުމުގެ ދެމެދުގައި ދަތުރުފަތުރު ކުރުމުގެ އިންތިޒާމުތައް އިތުރަށް ފުރިހަމަކުރުމަށް އެއްބަސްވެފައިވާ ކަމަށް އެމަނިކުފާނު ވިދާޅުވިއެވެ.
މިގޮތުން، ރާއްޖެއާއި ސޭޝެލްސްއާ ދެމެދު ވައިގެ ދަތުރުފަތުރުގެ ޚިދުމަތްތައް ފެށުމާ ގުޅޭ އެއްބަސްވުމެއްގައި މިއަދު ސޮއިކުރެވިގެން ދިޔުމަކީ، އަޅުގަނޑު ނުހަނު އުފަލާއެކު ފާހަގަކުރާ ކަމެއް. މި އެއްބަސްވުމުގެ ސަބަބުން ދިވެހިރާއްޖެއާއި ސޭޝެލްސްއާ ދެމެދުގައި ހިނގާ ވިޔަފާރީގެ މުޢާމަލާތްތައް އިތުރުކުރުމަށް މަގުފަހިވެގެންދާނެ. އަދި ދެ ޤައުމުގެ ރައްޔިތުންގެ ދެމެދުގައި ގުޅުން ބަދަހިކުރުމަށާއި، އަޅުގަނޑުމެންގެ ޖަޒީރާ ދެ ޤައުމު ތަޖުރިބާ ކޮށްލުމަށް ކެތްމަދުވެފައި ތިބި ފަތުރުވެރިންނަށް، ރާއްޖޭގައި ސަނީ ސައިޑް އޮފް ލައިފް ތަޖުރިބާކޮށްލައި، އެނަދަރ ވާރލްޑް ސޭޝެލްސްގައި ތަޖުރިބާ ކޮށްލުމުގެ ފުރުޞަތު ލިބިގެންދާނެ.ރައީސް އިބްރާހިމް މުހައްމަދު ސާލިހު
ޒުވާނުންނާއި ކުޅިވަރުގެ ދާއިރާއަށް އިޝާރާތް ކުރައްވައި ރައީސް ސާލިހު ވިދާޅުވީ ވޮކޭޝަނަލް ޓްރޭނިންގއާއި، ޒުވާނުން ތަރައްގީ ކުރުމާ ގުޅޭ ފަހުމުނާމާ އާކޮށްފައިވާ ކަމަށާއި، މި ދާއިރާތަކުން ގުޅިގެން ކުރަމުންދާ މަސައްކަތްތަކުގެ ސަބަބުން ދެ ގައުމުގެ ޒުވާނުންނަށް ބޮޑެތި މަންފާތަކެއް ލިބޭނެ ކަމަށެވެ. ސަރަހައްދީ އަދި ބައިނަލްއަގުވާމީ މަސްރަހުގައި ރާއްޖެއާއި ސޭޝެލްސް އަދި މުހިންމު ދާއިރާތަކުން އެއް ގައުމު އަނެއް ގައުމަށް އެއްބާރުލުން ދިނުމުގެ ދިގު މާޒީއެއްއޮތްކަން އެމަނިކުފާނު ފާހަގަކުރެއްވިއެވެ.
ރައީސް ސާލިހު ވިދާޅުވީ މޫސުމަށް އަންނަ ބަދަލުތަކާއި، ތިމާވެށްޓަށް ލިބޭ ގެއްލުންތަކާއި، ކަނޑުތަކާއި މަސްވެރިކަން ބެލެހެއްޓުމާއި، އިންސާނީ ހައްގުތަކާއި، ސަލާމަތާއި ރައްކާތެރިކަން ފަދަ ކަންކަމުގައި ރާއްޖެއާއި ސޭޝެލްސްއިން ގުޅިގެން އެތަކެއް މަސައްކަތްތަކެއް ކޮށްފައިވާ ކަމަށެވެ. އަދި އ.ދ.ގެ އިތުރުން، އިންޑިއަން އޯޝަން ރިމް އެސޯސިއޭޝަނާއި، އެލެއަންސް އޮފް ސްމޯލް އައިލެންޑް ސްޓޭޓްސްއާއި، އެންމެފަހުން ރާއްޖެއިން ބައިވެރިވި އޯގަނައިޒޭޝަން އޮފް އެފްރިކަން ކެރީބިއަން އެންޑް ޕެސިފިކް ސްޓޭޓްސްގެ ޖަމުއިއްޔާގެ ތެރެއިންވެސް ރާއްޖެއާއި ސީޝެލްސް ގުޅިގެން މަސައްކަތް ކުރަމުންދާ ކަމަށް ރައީސް ޞާލިހު ވިދާޅުވިއެވެ.
ސޭޝެލްސްއާއި ރާއްޖެއިން އެއް ގައުމު އަނެއް ގައުމަށް ދެމުންދާ އެއްބާރުލުން މިހާރަށްވުރެ އިތުރުކުރެވޭނެ ގޮތްތަކާ ގުޅޭގޮތުން ވެސް މަޝްވަރާކޮށްފައިވާކަން ފާހަގަކުރައްވައި ރައީސް ޞާލިހު ވިދާޅުވީ ވަކިން ޚާއްސަކޮށް، މޫސުމަށް އަންނަ ބަދަލުތަކުން ލިބޭ ގެއްލުންތަކާ ދެކޮޅަށް މަސައްކަތް ކުރުމާއި، ތިމާވެށްޓަށް ލިބޭ ގެއްލުންތައް ކުޑަކުރުމާއި، ޝަރަމުއްޝައިޚްގައި ނިމިދިޔަ ކޮޕް-27 ގައި ގާއިމްކުރެވުނު ލޮސް އެންޑް ޑެމޭޖް ފެސިލިޓީގެ މަސައްކަތްތައް ފެށުމަށް ވާންޖެހޭ ތައްޔާރީތަކާއި، ނޫ އިގްތިސާދާ ގުޅޭ ކަންކަމުގައި، އެކުގައި މަސައްކަތް ކުރުމާއި، އިންޑިއާ ކަނޑުގެ މަހުގެ އާބާދީ ބެލެހެއްޓުމުގައި އެއްބާރުލުން ދިނުމާއި ގުޅޭގޮތުން މަޝްވަރާކޮށްފައިވާ ކަމަށެވެ.
