ޔޫކްރެއިންގެ ޚަރސޯން ސަރަހައްދުގައި ހަދާފައިވާ ކަޚޯވްކާ ޑޭމް އަށް ބަޔަކު ހަމަލާދީ ހަލާކުކޮށްލުމުގެ ސަބަބުން ބޮޑުވި ފެންގަނޑު ދެބައިކުޅަ އެއްބަޔަށް ހިނދިއްޖެއެވެ. ނަމަވެސް މިހާރު ތަޣައްޔަރުވެފައިވާ ފެންގަނޑުގެ ސަބަބުން ނުރައްކާތެރި ގައިންގަޔަށް އަރާ ބަލިތައް ފެތުރިގެން ހިނގައިދާނެ ކަމުގެ ބިރު ބޮޑުވެފައިވާ ކަމަށް މާހިރުން ބުނެއެވެ.

ޑޭމްގެ ބައެއް ހަލާކުކޮށްލުމުގެ ސަބަބުން ރަށުގެ ވަރަށް ބޮޑުބަޔަކަށް ފެންގަނޑު ފެތުރިގެންގޮސް އެތައްހާސް ގެއެއް ވަނީ ފެނު އަޑިޔަށް ގޮސްފައެވެ. ނަމަވެސް މިހާރު ފެންގަނޑު ދިހަވަރަކަށް އިންޗި ހިނދިފައިވާ ކަމަށާއި ނަމަވެސް އަދިވެސް އެތައްހާސް ގެއެއްގައި ފެންބޮޑުވެފައިވާކަމަށް ޚަބަރުތައް ބުނެއެވެ. ހަމަ މިއާއެކު އެތައްހާސް ބަޔަކަށް ބޯފެން ލިބުންވަނީ ބަންދުވެފައެވެ.

ރަޝިޔާއިން ކޮންޓްރޯލް ކުރަމުންދާ ޔޫކްރެއިންގެ ސަރަހައްދުގައިވާ ޑްނިޕްރޯ ކޯރުގެ ފެންގަނޑު ހިފެހެއްޓުމަށް ހަދާފައިވާ ޑޭމް އަށް ހަމަލާދީ ހަލާކުކޮށްލާފައިވަނީ މިދިޔަ އަންގާރަ ދުވަހުއެވެ. އެއާއެކު ކޯރުގެ ދެ ފަރާތުގައިވާ ސަރަހައްދުތަކަށް ވަރަށް ބާރަށް ފެންގަނޑު ފެތުރިގެން ދިޔައެވެ.

ޑޭމް ގޮއްވާލީ ރަޝިޔާއިން ކަމަށް ޔޫކްރެއިނުން ބުނާއިރު ރަޝިޔާއިން މިކަން ދޮގުކުރެއެވެ. އަދި ބުނެފައިވަނީ އެކަމުގެ ފަހަތުގައިވަނީ ޔޫކްރެއިން ކަމުގައެވެ. މީޑިޔާ ރިޕޯޓްތައް ބުނަނީ މިއިން އެއްކޮޅަކުން ބުނާ ބަސް ވެސް ޔަގީން ކުރެވިފައިނުވާކަމަށެވެ. ނަމަވެސް ޑޭމް ކޮންޓްރޯލް ކުރަނީ ރަޝިޔާގެ ބާރުތަކުން ކަމަށްވާއިރު ބޮޑަށް ބުރަވެވެނީ އެކަންކުރީ ރަޝިޔާއިން ކަމަށެވެ. އެއީ ޔޫކްރެއިނުން މިހާރު ފަށާފައިވާ ރައްދު ހަމަލާތަކުގެ ކަންކަން ހުއްޓުވުމަށެވެ.

ޑޭމް ހަލާކު ކޮށްލުމާއެކު ކަޚޮވްކާ ރިޒަވޮޔަރގައި ހުރި ވަރަށް ގިނަ އަދެއްގެ ފެން ވަނީ މުޅިން ފައިބައިގެން ގޮސް ހުސްވެފައެވެ. ޔޫކްރެއިންގެ ޑަބްލިއުއެޗްއޯގެ ރެޕްރެޒެންޓެޓިވް ވިދާޅުވީ ހާލަތުވަރަށް ގޯސް ކަމަށާއި ސާފު ބޯފެން ފޯރުކޮށް ދިނުމުގެ މައްސަލައަށް ވަރަށް ބޮޑު އިސްކަމެއް ދޭންޖެހިފައިވާ ކަމުގައެވެ. އޭނަ ވިދާޅުވީ ނުސާފު ފެނުގެ ސަބަބުން ޖެހޭ ބަލިތައް ފެތުރިގެންދާ މިންވަރު ވަރަށް ގާތުން ބަލަން ޖެހޭ ކަމަށާއި މިހާރުވެސް ވަރަށް އިސްކަމެއް ދީގެން ފެނުގެ ސާމްޕަލް ޓެސްޓު ކުރުމުގެ ކަންތައް ކުރިޔަށް އެބަގެންދާ ކަމުގައެވެ.

ބޭރުގެ އެކި ފަރާތްތަކުން ވެސް އަންނަނީ ޔޫކްރެއިނަށް ކުރިމަތިވެފައިވާ ފެނުގެ ދަތިކަމުގެ މައްސަލައަށް ބަލައި ކަންބޮޑުވުން ފާޅުކޮށްފައެވެ. އަދި އެއީ "ސެނިޓޭޝަން ކްރައިސިސް" އެއްގެ ގޮތުގައި ދަނީ ސިފަކުރަމުންނެވެ.

މިވަގުތު ސީރިއަސް ބަލިމަޑުކަމެއް އަދި ފެތުރެމުން ނުދިޔަ ނަމަވެސް ކަޚޮވްކާ ޑޭމްއާ 100 ކިލޯމީޓަރު ދުރުގައިވާ ޚަރސޯން އަށް ވެސް ވަނީ ފެނުގެ ސަބަބުން ވަރަށް ބޮޑަށް ގެއްލުން ލިބިފައެވެ. އަދި މިހުރިހާ ހިސާބުތަކުގައި ވެސް ވަނީ ކޯރުގެ ފެން ބުއިމަށް ބޭނުން ކުރުން މަނާކޮށްފައެވެ. ގެތަކާއި ނަރުދަމާ ނިޒާމުތަކުގައި ފެންބޮޑުވެފައިވުމުގެ ސަބަބުން ކޯރުގެ ފެންގަނޑު ވަރަށް ބޮޑަށް ވަނީ ތަޣައްޔަރުވެފައެވެ. އެހެން ކަމުން ފެންވެރުމަށާއި ކެއްކުމަށް އަދި ޖަނަވާރުތަކަށް ދިނުމަށް ވެސް އެ ފެން ރައްކާތެރި ނޫން ކަމަށް ވަނީ އަންގާފައެވެ.

ޔޫކްރެއިންގެ އިންޓީރިއަރ މިނިސްޓްރީން ބުނީ ޚަރސޯންގެ ޔޫކްރެއިނުން ކޮންޓްރޯލްކުރާ 32 ސެޓްލްމަންޓެއްގައި ފެންބޮޑުވި ކަމަށާއި ރަޝިޔާއިން ކޮންޓްރޯލްކުރާ ފަޅީގެ 14 ސެޓްމަންޓްގައި ފެން ބޮޑުވި ކަމަށެވެ. މީގެ އިތުރުން އެހެން ސަރަހައްދަކުން ވެސް 31 ސެޓްލްމަންޓެއްގައި ވަނީ ފެންބޮޑުވެފައެވެ.