މިއީ މިހާތަނަށް ޓީމުން ކުޅުނު އެންމެ ޓަފް މެޗުކަމަށް ޤައުމީ ނެޓްބޯޅަ މުބާރާތުގެ ފުރަތަމަ ޑިވިޝަންގެ ޗެމްޕިއަންކަން ހޯދީ ކުޅުދުއްފުށި ޔޫތު އެންޑް ނިއު ޖެނެރޭޝަންގެ ކެޕްޓަން އީމާ އަބުދުއްސައްތާރު ބުނެފިއެވެ.
ކްލަބް ގްރީން ސްޓްރީޓްސް ބަލިކޮށް ޗެމްޕިއަންކަން ހޯދުމަށްފަހު އީމާ ބުނީ އޭނާގެ ޓީމް މިހާތަނަށް މިހާ ޓަފް މެޗެއް ނުކުޅޭކަމަށެވެ. އަދި އެޓީމާއެކު އޭނާވެސް އެހާ ޓަފް މެޗެއް ނުކުޅޭ ކަމަށެވެ. ޓީމެއްގެ ގޮތުގައާއި, ވަކިވަކި ކުޅުންތެރިންވެސް އެކުޅުންތެރިންގެ އެންމެ މޮޅު ކުޅުން ފައިނަލް މެޗުގައި ދެއްކިކަން އީމާ ފާހަގަކުރިއެވެ.
މެޗުގައި އެންމެ ބޮޑު ޗެލެންޖަކީ ގްރީން ސްޓްރީޓްސް ޓީމްގައދިގު ޝޫޓާއެއް ހުރުން ކަމަށާއި, އެކަމަކު އޭނާގެ ޓީމްގެ ޑިފެންސް ކުޅުންތެރިންވެސް ހަމަ ވަރަށް ރަނގަޅަށް ކުޅުންކަން އީމާ ފާހަގަކުރިއެވެ. އީމާ ބުނީ ޗެމްޕިއަންކަން ހޯދީ ޓީމެއްގެ ގޮތުގައި ވަރަށް ރަނގަޅު ކުޅުމެއް ދައްކައިގެންކަމަށާއި, މިއީ ވަރަށް އުފާވެރި ކާމިޔާބީއެއް ކަމަށެވެ.
ހަމަ ތަށި ބޭނުންވެގެން ޗެމްޕިއަންކަން ހޯދަން ނިކުތީ. ސީދާ ތަށި ހޯދުމުގެ އުއްމީދުގައި, އެފޯރީގައި, އެޖޯޘްގައި ނިކުތީ. ވަރުގަދަ ފޯރިގަދަ ފައިނަލް މެޗެއް މިފެނުނީ. އަޅުގަނޑުމެން ޓީމް ހުރިހާ ކުޅުންތެރިންވެސް, ވަކިވަކި ކުޅުންތެރިންވެސް ކޮންމެ ކުޅުންތެރިއަކުވެސް އެކުޅުންތެރިއެއްގެ އެންމެ މޮޅު ކުޅުން ކުޅުނީ.އީމާ އަބުދުއްސައްތާރު/ ކުޅުދުއްފުށި ޓީމްގެ ކެޕްޓަން
އީމާ ވަނީ ސަޕޯޓަރުންގެ ފަރާތުން ލިބުނު ބޮޑު ސަޕޯރޓްވެސް ފާހަގަކޮށްފައެވެ. މީގެއިތުރުން އޭނާ ބުނީ މިއީ މިހާތަނަށް ބޭއްވި އިންތިޒާމްތައް އެންމެ ރަނގަޅު މުބާރާތްކަމަށެވެ. ރަނގަޅު ކުރަން އެސޯސިއޭޝަނުން މަސައްކަތްކުރިތަން ފެނުނު ކަމަށާއި, ނެޓްބޯޅަ ކުރިއަރުވަން މަސައްކަތް ކުރާތަންވެސް ފެންނަކަމަށް އީމާ ބުންޏެވެ. އެންމެ ބޮޑު ޗެލެންޖެއްގެ ގޮތުގައި އީމާ ފާހަގަކުރީ އެންމެ ކޯޓެއް އޮތުމެވެ.
