އަމީނީ މަގުގެ ސެގްމަންޓު 8ގެ މަސައްކަތް ފަށައިފި
މިވަގުތު މަސައްކަތް ކުރަން ހަމަޖެހިފައިވަނީ ބިލަންބޮންގ ސުކޫލާ ހަމައިން ފެށިގެން
އަމީނީ މަގުގެ ސެގްމަންޓު 8ގެ މަސައްކަތް ފެށުން
އަމީނީ މަގުގެ ސެގްމަންޓު 8ގެ މަސައްކަތް ފަށައިފިޢެވެ.
އެ މަސައްކަތް ކުރަމުންދާ ފަރާތް ކަމަށްވާ ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)ން ބުނީ، އަމީނީ މަގުގެ ސެގްމެންޓް 8 މގެ މަސައްކަތް ހޮނިހިރު ދުވަހު ފެށިފައިވާކަމަށެވެ. މިވަގުތު މަސައްކަތް ކުރަން ހަމަޖެހިފައިވަނީ ބިލަންބޮންގ ސުކޫލާ ހަމައިން ފެށިގެން މިހާރުގެ ގަލޮޅު ޕޮލިހާ ހަމައަށްކަމަށް އާރްޑީސީން ބުނެއެވެ.
އޮޑެގައްލާ ކެފޭ ހުރި ހިސާބަށް އަމީނީ މަގު އާންމުންނަށް ހުޅުވާލާފައިވާއިރު، ބިލަންބޮންގުން ފެށިގެން ސްޓޭޑިއަމްގެ އިރުމައްޗާ ހަމައަށް މަގު ރޫޅާލަން ނިންމާފައިވާކަމަށް އެ ކުންފުނިން ބުނެފައިވެއެވެ. އެގޮތުން ބިލަބޮންގާ ހިސާބުން މާފަންނު ސްޓޭޑިއަމްގެ ހުޅަނގު ފަރާތު މަގާ ހަމައަށް ގައުނެގުމުގެ މަސައްކަތް ފަށާފައިވާއިރު، ސްކޫލްތަކާއި އޮފީސްތަކަށް އެކްސެސްވުމުގައި ދަތިތަކެއް ހުންނާނެކަމަށް އެ ކުންފުނިން ބުނެފައިވެއެވެ.
އަމީނީ މަގުގައި 13 ސެގްމަންޓް ހިމެނޭއިރު، އޭގެތެރެއިން ސެގްމަންޓް 1, 2 އަދި 3ގައި މިހާރު ވަނީ ތާރު އަޅައި އާންމުންނަށް ހުޅުވާލާފައެވެ. އަދި އަލަށް ތާރު އަޅާފައިވަނީ ސެގްމަންޓް 4, 5, 6 އަދި 7ގައެވެ.
އަމީނީމަގު ޒަމާނީ ފެންވަރަށް ތަރައްގީކުރުމުގެ މުޅި މަޝްރޫއުގައި 1.79 ކިލޯމީޓަރުގެ މަގުގެ ސަރަހައްދު ތަރައްގީކުރާއިރު، މި މަޝްރޫއަށް 84.4 މިލިއަން ރުފިޔާ ހަރަދުވާނެއެވެ.
އެންމެ ޒަމާނީ ފެންވަރަށް އަމީނީމަގު ޑިޒައިންކުރެވިގެންދާއިރު، މަގުގެ ފެން ހިންދާ ނިޒާމް ޑިޒައިން ކުރެވިގެންދާނީ އަމީނީމަގުގެ ދެފަރާތުންވެސް، މަގު ނިމެންދެން އެއްކޮޅުން އަނެއް ކޮޅަށް ކާނު އަޅާގޮތަށެވެ. އަދި އެ ޑިޒައިނަށް ބިނާކޮށް، އެ މަގުގައި ފެންބޮޑުވުމުގެ މައްސަލައަށް ދާއިމީ ހައްލެއް ގެނައުމަށްޓަކައި އިތުރު ޕަމްޕް ސްޓޭޝަންތައް ބަހައްޓާނެއެވެ.
