އެތުލެޓިކޯގެ އެއްބަސްވުން އައުކުރުމަށް މޮރާޓާ ނިންމައިފި

އެތުލެޓިކޯ މެޑްރިޑަށް ކުޅެމުން އަންނަ ސްޕެއިންގެ ސްޓްރައިކަރ އަލްވާރޯ މޮރާޓާ އެ ކުލަބާއެކު ހަދާފައިވާ އެއްބަސްވުން އައުކުރުމަށް ނިންމައިފިއެވެ.

އުމުރުން 30 އަހަރުގެ ކުޅުންތެރިޔާ އެ ކުލަބާއެކު ހަދާފައިވާ އެއްބަސްވުމުގެ މުއްދަތު ހަމަވާން އޮތީ މި ސީޒަނުގެ ނިޔަލަށެވެ. ނަމަވެސް އެތުލެޓިކޯއާއެކު ކުރިއަށްގެންދިޔަ މަޝްވަރާތަކަށްފަހު މިހާރު އޭނާ ވަނީ އެއްބަސްވުން އައުކުރުމަށް ނިންމާފައެވެ. އެތުލެޓިކޯގެ އެއްބަސްވުން އޭނާ އައުކުރާނީ ތިން އަހަރަށް ކަމަށް ސްޕެއިންގެ މީޑިއާތަކުން ބުނެއެވެ. އެހެންކަމުން އައު އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ. މޮރާޓާގެ އެއްބަސްވުން އައުކުރުމަށް އެތުލެޓިކޯއިން ކުރަންޖެހޭ އެންމެހައި ކަންކަން އެ ކުލަބުން މިހާރު ވަނީ ފުރިހަމަކޮށްފައި ކަމަށާއި، ކުރިއަށް އޮތް ދުވަސްތަކުގައި މޮރާޓާ އެއްބަސްވުމުގައި ސޮއިކުރާނެ ކަމަށްވެސް ވަނީ ބުނެފައެވެ.

އެތުލެޓިކޯއަށް ދެ ފަހަރެއްގެ މަތިން މޮރާޓާ ވަނީ 106 މެޗު ކުޅެދީ، 37 ލަނޑު ޖަހާފައެވެ. މޮރާޓާ އޭނާގެ ސީނިއަރ ކެރިއަރު ފެށީ ރެއާލް މެޑްރިޑުންނެވެ. އޭގެ ފަހުން އޭނާ ވަނީ އިޓާލިއަން ލީގުގެ ޔުވެންޓަސްއާއި އިނގިރޭސި ޕްރިމިއަރ ލީގުގެ ޗެލްސީއަށް ވެސް ކުޅެފައެވެ. އެތުލެޓިކޯގައި ހުރުމަށްފަހު އެންމެ ފަހުން އޭނާ ޔުވެންޓަސްއަށް ކުޅުނީ ލޯނު އެއްބަސްވުމެއްގެ ދަށުންނެވެ.