ކޭން ނުލިބޭނަމަ ރެއާލްގެ އަމާޒު ލައުޓާރޯ އަށް

ޓޮޓެންހަމަށް ކުޅެމުން އަންނަ އިނގިރޭސި ކެޕްޓަން ހެރީކޭން ނުލިބިއްޖެނަމަ އިންޓަމިލާނުގެ އާޖެންޓީނާ ފޯވަޑް ލައުޓާރޯ މާޓިނޭޒް ގަތުމަށް ރެއާލް މެޑްރިޑުން ތައްޔާރުވެއްޖެ އެވެ.

ސްޕޭނުގެ ނޫސްތަކުން ބުނާ ގޮތުގައި ލައުޓާރޯގެ ކުޅުމާއި އޭނާގެ ގޯލް ޖެހުމުގެ ނިސްބަތާމެދު ރެއާލް ހިތްހަމަޖެހެ އެވެ. ލައުޓާރޯ ވަނީ މި ސީޒަނުގައި 56 މެޗުން އިންޓަމިލާނަށް 28 ގޯލު ޖަހައިދީފަ އެވެ. އަދި އިޓާލިއަން ކަޕް ކާމިޔާބު ކުރުމާއި ޗެމްޕިއަންސް ލީގުގެ ސެމީ ފައިނަލަށް އިންޓަ ގެންގޮސްދިނުމުގައި އޭނާގެ ރޯލު ބޮޑެވެ.

ޓޮޓެންހަމުން ކޭން ވިއްކަން ކިޔާ އެންމެ ކުޑަ އަގަކީ 100 މިލިއަން ޕައުންޑެވެ. އޭނާ ގަތުމަށް ރެއާލްއާ ވާދަކުރަނީ މެންޗެސްޓާ ޔުނައިޓެޑުންނެވެ. މިހެންވެ ކޭން ދިއުން ގާތީ ޔުނައިޓެޑަށް ކަމަށް ގިނަ ބަޔަކު ގަބޫލުކުރެ އެވެ. އަދި އޭނާގެ އުމުރަކީ މިހާރު 29 އަހަރު ކަމުން އެއީ ވެސް ރެއާލް މެޑްރިޑުން އޭނާ ގަތުމާމެދު ދެ ވަނަ ވިސްނުމަކަށްދާ ސަބަބެކެވެ. ނަމަވެސް ރެއާލްގެ ކޯޗު ކާލޯ އެންޗެލޯޓީ ކޭން ގަތުމަށް ބޭނުންވެ އެވެ.

އުމުރުން 25 އަހަރުގެ ލައުޓާރޯ ވިއްކާނެ އަގެއްގެ ގޮތުގައި އިންޓަމިލާނުން ހަމަޖައްސާފައިވާ އަގަކީ 70 މިލިއަން ޕައުންޑެވެ. އޭނާ ގަތުމަށް އިނގިރޭސިވިލާތުގެ ޗެލްސީގެ އައު ކޯޗު މައުރީސިއޯ ޕޮޗެޓީނޯ ވެސް ހުރީ ބޭނުންވެފަ އެވެ. ނަމަވެސް އިންޓަމިލާނުން ތިބީ އެމީހުންގެ އެންމެ މުހިންމު ފޯވަޑް ކުލަބުގައ ބަހައްޓަން ނިންމައިގެންނެވެ. ނަމަވެސް ކުޅުންތެރިޔާ ކުލަބު ބަދަލު ކުރަން ބޭނުންވެއްޖެނަމަ އިންޓަ އަށް އޭނާ ހިފަހައްޓަން ދަތިވާނެ އެވެ.