ބާސެލޯނާގެ ކުރީގެ ޓީމުގެ ކުޅުންތެރިޔާ ލިއޮނަލް މެސީއާ އާއެކު އިންޓަ މިއާމީއާ ނުގުޅޭނެ ކަމަށް އުރުގުއޭގެ ފޯވާޑް ލުއިސް ސުއަރޭޒް ބުރާސްފަތި ދުވަހު ބުނެފިއެވެ.
ޕެރިސް ސެއިންޓް ޖާމައިންއާ އެކު ހަދާފައިވާ އެއްބަސްވުން ހަމަވުމާ ގުޅިގެން އެމްއެލްއެސް ކްލަބާ ގުޅެން ނިންމާފައިވާކަން މެސީ ވަނީ ބުދަ ދުވަހު ހާމަކޮށްފައެވެ.
މެސީ މިއާމީއަށް ބަދަލުވުމާ ގުޅިގެން ބައެއް އިތުރު ކުޅުންތެރިންވެސް އެ ޓީމާ ގުޅޭނެ ކަމުގެ އަޑުތައް ދިޔައީ އިތުރުވަމުންނެވެ. ޔޫރަޕް ދޫކޮށް ދެކުނު އެމެރިކާއަށް އެނބުރި ދިއުމުގެ ކުރިން މިއާމީއަށް ބަދަލުވާނެ ކަމަށް ބެލެވުނު ސުއަރޭޒް އަނެއްކާވެސް އެ ޓީމާ ގުޅުމަށް ގާތްކަމަށް ގިނަ ރިޕޯޓުތަކުން ދައްކައެވެ. ނަމަވެސް ބާސެލޯނާގައި މެސީއާ އެކު ހަ ސީޒަން ހޭދަކުރި އުމުރުން 36 އަހަރުގެ ސުއަރޭޒް ބުނީ ގްރެމިއޯއާ އެކު ހަދާފައިވާ އެއްބަސްވުމުގެ މާނައަކީ މިއާމީއަށް ބަދަލުވުމުގެ ފުރުސަތެއް ނެތްކަމެވެ.
ސުއަރެޒް ދެ އަހަރުގެ އެއްބަސްވުމެއްގެ ދަށުން ގްރެމިއޯއަށް ބަދަލުވީ 2022 ވަނަ އަހަރުގެ ޑިސެމްބަރުގައެވެ. އޭނާ ވަނީ އެ ޓީމަށް ކުޅެދިން 24 މެޗުން 11 ލަނޑު ޖަހާފައެވެ.
