ޔޫކްރެއިންގެ ޑްނީޕްރޯ ކޯރުގައި އޮންނަ ކާކްހޯވްކާ ޑޭމަށް ދިން ހަމަލާއާއެކު އެސަރަހައްދުގައި ފެން ބޮޑުވެ، އެސަރަހައްދުގައި ބަލިމަނޑުކަމެއް ފެތުރިދާނެ ކަމުގެ ކަންބޮޑުވުން ފާޅުކޮށްފިއެވެ.
ރަޝިއާ ޔޫކްރެއިން ހަނގުރާމައިގެ ތެރެއިން، ކާކްހޯވްކާ ޑޭމަށް ދިން ހަމަލާއާއެކު އެސަރަހައްދުގައި ފެން ބޮޑުވެ، އެތައް ބަޔަކަށް ވަނީ ގެދޮރު ދޫކޮށް އެހެން ސަރަހައްދުތަކަށް ދާން މަޖުބޫރުވެފައެވެ.
މިކަމާ ގުޅިގެން ޔޫކްރެއިންގެ ރައީސް ވޮލޮޑިމީރް ޒެލެންސްކީ ވަނީ ފެން ބޮޑުވުމުގެ ސަބަބުން، ރަޝިއާއިން ހިފާފައިވާ ސަރަހައްދުތަކުގައި ދިރިއުޅެމުންދާ ކިހާ އަދަދެއްގެ މީހުން މަރުވާނެކަން ބުނަން ނޭނގޭކަމަށް ވިދާޅުވެ، މިކަމާ ގުޅިގެން ބައިނަލްއަގުވާމީ މަސްރަހުން އަވަސް އަދި ސާފު ރިއެކްޝަނެއް ބޭނުންވާ ކަމަށް ވިދާޅުވެފައެވެ.
އެގޮތުން އެސަރަހައްދުގެ ހާލަތު އޮތީ ވަރަށް ގޯސްކޮށް ކަމަށާއި، ރައްޔިތުން ތިބީ ބޮޑު ބިރުވެރިކަމެއްގެ ތެރޭގައިކަމަށް ޒެލެންސްކީ ވަނި ވިދާޅުވެފައެވެ. އަދި ބޯ ފެނާއި އެހީތެރިކަން ނުލިބި އެތައް ބަޔަކު ފެނުގެ އަޑިއަށް ގޮސްފައިވާ އެމީހުންގެ ގޭގެ ފުރާޅުގައި ތާށިވެފައިވަކަން ޒެލެންސްކީ ފާހަގަކުރެއްވިއެވެ.
ޔޫކްރެއިނުން ވަނީ ޑޭމަށް ދިން ހަމަލާގެ ސަބަބުން ބޮޑުވަމުންދާ ފެންޑަނގުގެ އަސަރު މިހާރު ވެސް 80ށް ވުރެ ގިނަ އާބާދީތަކަށް ކޮށްފައިވާކަމަށް ބުނެފައެވެ. އަދި ބޮޑުވަމުންދާ ފެންގަނޑަށް ތަފާތު ކެމިކަލްތަކާއި ބެކްޓީރިއާ ދޫވެ، ތަފާތު ބަލިތައް ފެތުރުމުގެ ބިރުވެރިކަންވެސް އެބަ އޮތްކަން އެގައުމުން ފާހަގަކުރެއެވެ.
ޔޫކްރޭނުން ވަނީ ޑޭމަށް މިިދިން ހަމަލާގެ ސަބަބުން ލައްކައެއްހާ މީހުންނަށް ބޯފެން ނުލިބި، އެތައް ހާސް ހެކްޓަރުގެ ދަނޑުވެރިކަމުގެ ބިންތައް ޗަސްކޮށްފައިކަމަށް ބުނެފައެވެ. އަދި ޑޭމް މެދުވެރިކޮށް ފެން ފޯރުކޮށްސެމުންދިޔަ 500،000 ހެކްޓަރުގެ ބިމަށް ފެންނުލިބި އެސަރަހައްދުތައް ސަހަރާތަކަށް ބަދަލުވެގެންދާނެ ކަަމަށް އެގައުމުން ބުނެއެވެ.
ކާކްހޯވްކާ ޑޭމަށް ހަމަލާތައް އަމާޒުވެ، ޑޭމް ގޮއްވާލާފައި ވަނީ އަންގާރަ ދުވަހުއެވެ. މިހަމާލާ އާއެކު ރަޝިއާ އާއި ޔޫކްރެއިނުން ދަނީ އެއްގައު އަނެއް ގައުމަށް ތުހުމަތުގެ އިނގިލި ދިއްކުރަމުންނެވެ. ޔޫކްރެއިނުން މިއީ ރަޝިއާއިން ދިން ހަމަލާއެއް ކަމަށް ތުހުމަތުކުރާއިރު، ރަޝިއާއިން ވަނީ މިއީ ޔޫކްރެއިނުން ހިންގި ހަނގުރާމައިގެ ޖަރީމާއެއް ކަމަށް ބުނެފައެވެ. ރަޝިއާގެ ރައީސް ވްލެޑްމިއަރ ޕުޓިން ވަނީ މިއީ އިންސާނީ އަދި ތިމާވެށިގެ ކާރިސާއެއް ކަމަށް ސިފަކުރައްވާފައެވެ.
