"ހުރިހާ ކަމަކީ ފައިސާނަމަ، އަހަރެން ހުންނާނީ ސައުދީ ލީގުގައި!"

ހުރިހާ ކަމަކީ ފައިސާ ނަމަ، އޭނާ ހުންނާނީ ސައުދީ ޕްރޯ ލީގުގައި ކަމަށް އާޖެންޓީނާގެ ކެޕްޓަން ލިއޮނަލް މެސީ ބުނެފި އެވެ.

މެސީ މިހެން ބުނީ ޕީއެސްޖީ ދޫކޮށް އެމެރިކާގެ އިންޓަ މިއާމީ އަށް ބަދަލުވުމަށް ނިންމުމަށްފަހު ވާހަކަ ދައްކަމުންނެވެ. އޭނާ ބުނީ، އެއްވެސް އިރެއްގައި ފައިސާ އަކީ އޭނާ އަށް މާ ބޮޑު އެއްޗެއް ނޫން ކަމަށެވެ. މެސީ ބުނީ، ޕީއެސްޖީ ދޫކޮށްލަން ނިންމުމަށްފަހު، ބާސެލޯނާއާއެކު އެއްބަސްވުމުގެ އެއްވެސް ވާހަކައެއް މަޝްވަރާކޮށްފައި ނުވާނެ ކަމަށެވެ. ބާސެލޯނާ އިން އޭނާ އަށް ޕްރޮޕޯސަލް އެއް ފޮނުވި ކަމަށާއި، ނަމަވެސް އެއީ ރަސްމީ އެއްޗެއް ނޫން ކަމަށް މެސީ ވަނީ ބުނެފަ އެވެ. ހަމައެއާއެކު އޭނާ އަށް ލިބޭނެ މުސާރައެއް ވެސް މަޝްވަރާކޮށްފައި ނުވާނެ ކަމަށް މެސީ ބުންޏެވެ. އޭނާ ބުނީ މިއީ ފައިސާއާ ގުޅުން ހުރި ކަމެއް ނޫން ކަމަަށާއި، އެ ނޫން ނަމަ އޭނާ ހުންނާނީ ސައުދީ ލީގުގައި ކަމަަށެވެ. މެސީ އެހެން ބުނީ ސައުދީގެ އަލް ހިލާލުން އޭނާ އަށް ހުށަހެޅި ޕްރޮޕޯސަލަށް އިޝާރަތްކޮށެވެ. އެ ކުލަބުން ވަނީ މެސީ އަށް އަހަރަކު 400 މިލިއަން ޔޫރޯ އަށްވުރެ ބޮޑު އަދަދެއް ލިބޭ ޕްރޮޕޯސަލެއް ހުށަހަޅައިފަ އެވެ. ނަމަވެސް މެސީ ނިންމީ އިންޓަ މިއާމީ އަށް ބަދަލުވުމަށެވެ.

އިތުރަށް ވާހަކަ ދައްކަމުން މެސީ ބުނީ، އޭނާ އަށް ޔޫރަޕުގެ އެހެން ކުލަބުތަކުން ވެސް ހުށަހެޅުން ލިބިފައިވާ ކަމަށެވެ. ނަމަވެސް އޭގެ އެއްވެސް ހުށަހެޅުމަކާ މެދު އޭނާ ވިސްނާފައި ނުވާ ސަބަބަކީ، ޔޫރަޕުގައި އޭނާ ކުޅެން ބޭނުންވަނީ ބާސެލޯނާ އަށް ކަމަށްވުމުން ކަމަށް މެސީ ވަނީ ބުނެފަ އެވެ. އިތުރަށް މެސީ ބުނީ އޭނާ ހޯދުމަށް ބާސެލޯނާ އިން މަސައްކަތް ކުރި ކަމެއް ޔަގީން ނުވާ ކަމަށެވެ. ހަމައެކަނި އިނގެނީ ބާސެލޯނާގެ ކޯޗު ޒަވީ ހެނާންޑޭޒް އޭނާއާ ދެއްކި ވާހަކަ ކަމަށް މެސީ ބުންޏެވެ. ނަމަވެސް ބާސެލޯނާގެ ރައީސް ޖޯން ލަޕޯޓާއާ ގިނަ ފަހަރު ވާހަކަ ނުދައްކާ ކަމަށް ވެސް އޭނާ ވަނީ ބުނެފަ އެވެ.

އިންޓަ މިއާމީ އަކީ ޔޫރަޕުން ބޭރުގައި މެސީ ކުޅޭނެ ފުރަތަމަ ކުލަބެވެ. އެކުލަބަށް މެސީ ބަދަލުވާނެކަން މިހާރު ވަނީ މުޅިން ކަށަވަރުވެފަ އެވެ. ނަމަވެސް އެއްބަސްވުން އެކުލަވާލާނެ މުއްދަތެއް ބުނެފައެއް ނުވެ އެވެ.