މިއަހަރުގެ މިހާތަނަށް މިފްކޯއިން 38،239 ޓަނުގެ މަސް ކިރައިފިއެވެ.

މިފްކޯއިން ވަނީ ޖޫން 2ގެ ނިޔަލަށް މިއަހަރު މިފދްކޯއިން މަސްކިރާފައިވާ މިންވަރާއި، މަސްވެރިންނަށް ދީފައިވާ ފައިސާގެ ތަފާސްހިސާބުތައް އާންމުކޮށްފައެވެ.

އަހަރުގެ މިހާތަނަށް 38،239 ޓަނުގެ މަސް ކިރާފައިވާއިރު، މިއީ މިދިޔަ އަހަރުގެ މި މުއްދަތާ އަޅާބަލާއިރު 35 އިންސައްތަ އިތުރު އަދަދެއް ކަމަށް މިފްކޯއިން ބުނެފައިވެއެވެ. މިދިޔަ އަހަރުގެ މި މުއްދަތާ ހަމައަށް ކިރާފައިވަނީ 28،273 ޓަނުގެ މަހެވެ.

މިފްކޯއިން ވަނީ އެކި ތަންތަނުން މަސްކިރި މިންވަރުވެސް ހާމަކޮށްފައެވެ. މިގޮތުން ފެލިވަރު ފިޝަރީޒް ކޮމްޕްލެކްސްއިން 4،676 ޓަނުގެ މަސް ކިރާފައިވާއިރު މިއީ މިދިޔަ އަހަރުގެ މި މުއްދަތުގައި އެތަނުން މަސްކިރި އަދަދަށްވުރެ 16 އިންސައްތަ އިތުރު އަދަދެކެވެ. ކޫއްޑޫ ފިޝަރީޒް ކޮމްޕްލެކްސްއިން 29،299 ޓަނުގެ މަސް ކިރާފައިވާއިރު، މިއީ މިދިޔަ އަހަރާ އަޅާ ބަލާއިރު 35 އިންސައްތަ އިތުރު އަދަދެކެވެ. އަދި އައްޑޫ ފިޝަރީޒް ކޮމްޕްލެކްސްއިން މިހާތަނަށް 4،335 ޓަނުގެ މަސް ކިރާފައިވާއިރު މިއީ މިދިޔަ އަހަރާ އަޅާ ބަލާއިރު 70 އިންސައްތަ އިތުރު އަދަދެއް ކަމަށް މިފްކޯއިން ބުނެފައިވެއެވެ.

މިފްކޯއިން ބުނީ މިދިޔަ އަހަރާ އަޅާ ބަލާއިރު މިއަހަރު މަސްވެރިންނަށް ދީފައިވާ ފައިސާވެސް އިތުރު ކަމަށެވެ. މިގޮތުން މިހާތަނަށް 636،969،593 (ހަސަތޭކަ ތިރީސް ހަމިލިއަން ނުވަލައްކަ ފަސްދޮޅަސް ނުވަހާސް ފައްސަތޭކަ ނުވަދިހަ ތިނެއް) ރުފިޔާ މަސްވެރިންނަށް ދީފައިވެއެވެ. މިދިޔަ އަހަރުގެ މި މުއްދަތާ ހަމައަށް އައިއިރު މަސްވެރިންނަށް ދީފައިވަނީ 457،007،020 (ހަތަރުސަތޭކަ ފަންސާސް ހަތްމިލިއަން ހަތްހާސް ވިހި) ރުފިޔާއެވެ.

ސަރުކާރުން ދަނީ މަސް ކިރާ މިންވަރު އިތުރުކުރުމަށް ގިނަ މަސައްކަތްތަކެއް ކުރަމުންނެވެ. މިގޮތުން އައްޑޫގައި ހުރި 50 ޓަނުގެ ބްރައިން ފްރީޒިންގް ކެޕޭސިޓީ 100 މެޓްރިކް ޓަނަށް ބޮޑުކުރުމުގެ އަމަލީ މަސައްކަތް އަންނަ ޖުލައި މަހު ފަށަން ވަނީ ނިންމާފައެވެ. އަދި އޯގަސްޓު މަސްތެރޭގައި މިފްކޯގެ މަސްބަނދަރު ބޭނުންކުރަން ފަށަން ވަނީ ނިންމާފައެވެ.