މަސްވެރިންނަށް ޑޮލަރުން ފާއިސާ ދެއްވާނެ ކަމަށް ރައީސް މުއިއްޒު ވެވަޑައިގެންނެވި ވައުދުފުޅުގެ ވާހަކައެއް ނުދެއްކެވި
މަސްވެރިކަމުގެ އިންޑަސްޓްރީއަށް އިންވެސްޓް ކުރަން ވަނީ ފަށާފައި
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު
މަސްކިލޯއަކަށް 20 ރުފިޔާއަށްވުރެ ދަށްނޫން އަގަކަށް ޑޮލަރުން ފާއިސާ ދެއްވާނެ ކަމަށް ރައީސް މުއިއްޒު ވެވަޑައިގެންނެވި ވައުދުފުޅުގެ ވާހަކަ ނުދައްކަވައި، މަސްވެރިކަމުގެ ސިނާއަތަށް އޯރާކަން ލިބެމުން އަންނަ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ހޮނިހިރު ދުވަހު ރައީސް އޮފީހުގައި ކުރިއަށް ގެންދާ ނޫސްވެރިންގެ ބައްދަލުވުމުގައި ރައީސް މުއިއްޒު ވަނީ 48 ގަޑިއިރު ތެރޭގައި މަސްވެރިންނަށް ފައިސާ ދޫކުރާނެ ކަމަށް އެމަނިކުފާނު ވެވަޑައިގެންނެވި ވައުދުފުޅަށް އިޝާރާތް ކުރައްވައި ވާހަކަފުޅު ދައްކަވާފައެވެ.
ނަމަވެސް މަސްކިލޯއަކަށް 20 ރުފިޔާއަށްވުރެ ދަށްނޫން އަގަކަށް ޑޮލަރުން ފާއިސާ ދެއްވާނެ ކަމަށް ރައީސް މުއިއްޒު ވެވަޑައިގެންނެވި ވައުދުފުޅުގެ ވާހަކަ ނުދައްކަވައެވެ.
މަސްވެރިންނަށް މެދުކެނޑުމެއް ނެތި ފައިސާ ދޫކުރާކަން ފާހަގަކުރައްވައި ރައީސް މުއިއްޒު ވިދާޅުވީ ވެރިކަމާއި ހަވާލުވެވަަޑައިގެންނެވިއިރު، ނުދައްކާ 250 އެއްހާ މިލިއަނެއްހާ ފައިސާ އޮތް ކަމަށާއި، ލަސްތަކެއް ކުރިމަތިވި ނަމަވެސް އެފައިސާ ދައްކާފައިވާ ކަމަށެވެ. ބޭންކް އޮފް މޯލްޑިވްސް، މިފްކޯ އަދި ފިނޭންސް މިނިސްޓްރީއާއެކު ވެވުނު އެއްބަސްވުމެއްގެ ދަށުން 10 ޑިސެންބަރު 2024 ން ފެށިގެން މަސްވެރިންނަށް ފައިސާ ދޫކުރަމުންދާ ކަމަށް ރައީސް މުއިއްޒު ވިދާޅުވިއެވެ.
އެއީ މިދޭތެރެއިން 10 ދުވަސް ރޯދަމަހަށް ވެސް ބަންދުވި. ފަހު 10. އީދު ވެސް. އެއްވެސް މުއައްދަތެއްގައި މެދުނުކުނޑި ހަމަ ބަރާބަރަށް 48 ގަޑިއިރު މިދަނީ އިރާދަކުރެއްވިއްޔާ ފައިސާ ދެމުން. އެފައިސާ ދޭން ފެށިފަހުން އެކަނި ވެސް 488 މިލިއަން ގިނަ ފައިސާ މިހާރު ވާނީ މަސްވެރިންނަށް ދޫކޮށްފައި. ޖުމްލަކޮށް ހަވާލުފަހުން މިފައިސާ ހިމެނޭ ގޮތުން 1.59 ބިލިއަން ރުފިޔާ ވަނީ ދެވިފައި. އެއީ ފިއުލް ސަޕްލައި ސަބްސިޑީ ހިމެނޭ ގޮތަށް. މިއަދަދުގެ ފައިސާ ހިމެނޭ ގޮތަށް އަދި އަމުދުން މިދިޔަ ޑިސެންބަރު 10 އަކުން ފެށިގެން މެދުނުކެނޑި ފައިސާ ދެވެމުންދާތީ އެ ޔަގީންކަން މަސްވެރިނަށް ލިބެން ފެށީމަ އިރާދަކުރެއްވިއްޔާ އާރޯކަން އެބަ އާދޭ މަސްވެރިކަމުގެ އިންޑަސްޓްރީއަށް.ރައީސުލްޖުމްހޫރިއްޔާ ޑރ.މުހައްމަދު މުއިއްޒު
ރައީސް މުއިއްޒު ވިދާޅުވީ މަސްވެރިކަމުގެ އިންޑަސްޓްރީއަށް އިންވެސްޓް ކުރަން ފަށާފައިވާ ކަމަށާއި، އަމިއްލަ މަސްވެރިންނާއި، ކެއޮޅުން ދޯނިތައް ބަންނަން ފަށާފައިވާ ކަމަށެވެ. ކުރީގައި ދޯނީގައި މަސައްކަތް ކުރަމުންދިޔަ ޒުވާނުން އެހެން ވަޒީފާތަކަށް ދިޔަކަން ފާހަގަކުރައްވައި ރައީސް މުއިއްޒު ވިދާޅުވީ މިހާރު އެ ޒުވާނުންތައް ވެސް އަނބުރާ އަންނަމުންދާ ކަމަށާއި، ދޯންޏަށް އަރަމުންދާ ކަމަށެވެ.
އެއީ ސަރުކާރުން މަސްވެރިންނަށް ގަވާއިދުން ފައިސާ ދޫކުރުމުގެ ނަތީޖާ ކަމަށް އެމަނިކުފާނު ވިދާޅުވިއެވެ.
ޑރ. މުއިއްޒު ވެރިކަމަށް ވަޑައިގަތީ، މަސްވެރިން ބާނާ މަހަށް، މަސް ކިރާތާ 48 ގަޑީއިރު ތެރޭގައި ފައިސާ ދައްކާނެ ކަމަށް ވައުދު ވެވަޑައިގެންނެވެ. އަދި ކިރާ މަހަށް ޑޮލަރުން ފައިސާ ލިބޭނެ ގޮތް ހަދާނެ ކަމަށްވެސް ޑރ. މުއިއްޒު މަސްވެރިންނަށް ވެފައިވާ ވައުދުތަކުގެ ތެރޭގައި ހިމެނެއެވެ. މަސްކިލޯއެއް މިފްކޯއަށް ގަންނަ އަގު 20ރ އަށްވުރެ ދަށްނުކުރައްވާނެ ކަމަށް ވިދާޅުވެ ވައުދުވެވަޑައިގެންނެވިއެވެ.
ނަމަވެސް މަސް ކިރާތާ 48 ގަޑީއިރު ތެރޭގައި ޑޮލަރުން ފައިސާ ދައްކާނެ ކަމަށް ވި ވައުދު، ބީއެމްއެލްގައި އެކައުންޓް ހުންނަށް އޮޑިވެރިންނަށް، އެތައް ދުވަހެއް ފަހުން ދިވެހި ރުފިޔާ އިން ފައިސާ ދައްކެމަށްފަހު ފުއްދަވައިފި ކަމަށް މުއިއްޒު ވަނީ ވިދާޅުވެފައެވެ.
