ބޮޑު ކަންނެލި މަސްވެރިން ބާނާ މަސް ކިރޭނެ ގޮތެއް ނުވުމުން މަޖިލީހަށް ކުއްލި މައްސަލައެއް
މެމްބަރު ޒިޔާދު މި މައްސަލަ ހުށަހަޅާފައި މިވަނީ މަސްވެރިން މާޔޫސްވެފައިވާ ކަމަށާއި، 100 ޓަނަށް ވުރެ ގިނަ ކަންކެނެލި ނުކިރި ބަނދަރު ތަކުގައި ތިބެންޖެހިފައިވާ ކަމަށް ބޮޑު ކަންނެލި މަސްވެރިންގެ ޔޫނިއަން އިން ބުނެފައިވަނިކޮށެވެ.
ރައްޔިތުން މަޖިލީހުގެ މެމްބަރު ހުސައިން ޒިޔާދު
ބޮޑު ކަންނެލި މަސްވެރިން ބާނާ މަސް ކިރޭނެ ގޮތެއް ނުވުމާއި މިހާރުވެސް 120 ޓަނަށްވުރެ ގިނަ އަދަދެއްގެ ބޮޑު ކަންނެލި ނުކުރި ބަހައްޓާން ޖެހުމުގެ ސަބަބުން ހަލާކުވަމުންދާތީ އެކަން ސަރުކާރުގެ ސަމާލުކަމަށްޓަކައި މަޖިލީހަށް ކުއްލި މައްސަލައެއް ހުށަހަޅައިފިއެވެ.
މަޖިލީހަށް މި ކުއްލި މައްސަލައެއް ހުށަހެޅުއްވީ ރައްޔިތުން މަޖިލީހުގެ ވައިކަރަދޫ ދާއިރާގެ މެމްބަރު ހުސައިން ޒިޔާދު އެވެ.
މެމްބަރު ޒިޔާދު މި މައްސަލަ ހުށަހަޅާފައި މިވަނީ މަސްވެރިން މާޔޫސްވެފައިވާ ކަމަށާއި، 100 ޓަނަށް ވުރެ ގިނަ ކަންކެނެލި ނުކިރި ބަނދަރު ތަކުގައި ތިބެންޖެހިފައިވާ ކަމަށް ބޮޑު ކަންނެލި މަސްވެރިންގެ ޔޫނިއަން އިން ބުނެފައިވަނިކޮށެވެ. އެ ޔޫނިއަންއިން ކަންބޮޑުވުންފާޅު ކޮށް ބުނީ، ކަންނެލި ނުކިރި ކަންނެލި ދޯނިފަހަރު ކިޔު ޖެހިފައިވާ ކަމަށެވެ. މިހާރު ތިބި ދޯނި ތަކުން 120 ޓަނަށް ވުރެގިނަ ކަންނެލި ނުކިރި އެބަހުރި ކަމަށެވެ.
މިކަން ފާހަގަ ކުރައްވަމުން މެމްބަރު ޒިޔާދު ވިދާޅުވީ، މަސްވެރިން ބާނާ ބޮޑު ކަންނެލި މިފްކޯ މެދުވެރިކޮށް ސަރުކާރުން ގަންނަގޮތަށް ބަދަލުކޮށް ބޮޑު ކަންނެލީގެ މަސްވެރިންނަށް މިފްކޯގެ ހިއްސާ ލިބޭނެ ގޮތް ހެދުމާއި ބޮޑު ކަންނެލީގެ އަގު 80 ރުފިޔާ އާއި 100 ރުފިޔާ އާއި ދެމެދުގައި ބެހެއްޓުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރިޔާސީ ކެމްޕޭން ތެރޭގައި ވެވަޑައިގެންނެވި ވައުދެއް ކަމަށެވެ.
އަދި މިއަދާ ހަމައަށްވެސް ރައީސް މުޢިއްޒު ވެވަޑާއިގެންނެވި ވައުދުއާއި އެއްގޮތަށް އެކަން ކުރެވިފައި ނުވާކަން ފާހަގަކުރަށްވާ ޒިޔާދު ވިދާޅުވީ، މަސްވެރިން ބާނާ ބޮޑު ކަންނެލި ކިރޭނެ ގޮތެއް ނެތްކަމަށާއި އަދި ކަންނެލި ކިރުމަށްފަހު ފައިސާ ލިބުމުގައި އިންތިހާއަށް ލަސްވާކަމަށެވެ.
މަސްވެރިކަން ކުރުމަށް އެކި ގޮތްގޮތުން ދިމާވާ ދަތިތައް އިތުރުވަމުން އަންނަކަމުގެ ޝާކުވާ މަސްވެރިން ކުރަމުންދާ ހިނދު، މިހިނދުގައިވެސް 120 ޓަނަށްވުރެ ގިނަ އަދަދެއްގެ ބޮޑު ކަންނެލި ނުކިރި އެކިއެކި ދޯނި ފަހަރުގައި އެބަހުރިކަމާއި އެކަންނެލިތައް ބަހައްޓަން ޖެހުމުގެ ސަބަބުން ހަލާކުވާނެ ކަމުގެ ބިރު އެބައޮތްކަން ފާހަގަ ކުރައްވަމުމުން، ބޮޑު ކަންނެލީގެ މަސްވެރިން ކަންބޮޑުުން ފާޅުކުރަމުންދާއިރު ބޮޑު ކަންނެލި ބާނާއިގެން އަންނަ ދޯނި ފަހަރު ބޮޑު ކަންނެލި ކިރުމަށްޓަކައި އެތައް ދުވަހެއް ވަންދެން ކިއުގައި މަޑުކުރަންޖެހުން އާންމުކަމަކަށް ވަނީ ވެފައިކަމަށް މެމްބަރު ޒިޔާދު ވިދާޅުވި އެވެ.ހުސައިން ޒިޔާދު
މެމްބަރު ޒިޔާދު އިތުރަށް ވިދާޅުވީ، މަސްވެރިކަން ރަނގަޅުވާ ކޮންމެ ފަހަރަކު މަސްކިރޭނެ ގޮތް ހަމަޖެހިފައި ނެތުމުގެ ސަބަބުން މަސްވެރިންނަށް އެތަކެއް ތަކުލީފެއް އުފުލަން ޖެހިފައިވާކަމަށެވެ. އަދި ދުނިޔޭގެ އިގްތިސޯދު ކުރިއަރަމުންދާ ދިއުމުގައި މަހުގެ ޑިމާންޑު ކުރިއަރަމުންދާ ދަނޑިވަޅުތަކުގައިވެސް ރަނގަޅު އަގުގައި މަސް ނުކިރެވުމުގެ ކަންބޮޑުވުން މަސްވެރިން ފާޅުކުރަމުންދާ ކަމަށެވެ.
މަސްވެރިންނާއި މަސްވެރި އާއިލާތަކަކީ ދިވެހި ރާއްޖޭގެ ބޮޑު ބައެއް ހިއްސާކުރާ ބަޔަކަށް ވެފައި މިފަދައިން އެސިނާޔަތުގެ ކަންކަން ދަށަށް ދިއުމަކީ މަސްވެރި އަދި މަސްވެރި އާއިލާތަކުގެ މާލީ ހާލަތު ދަށްވެ އެކަމުގެ ސަބަބުން މުޅި މުޖްތަމަޢުގެ ދުޅަހެޔޮކަމަށް އަސަރު ކުރާނެ ކަމެއްކަން މެމްބަރު ޒިޔާދު ފާހަގަކުރެއްވިއެވެ.
