ކަރީމް ބެންޒެމާއާއެކު އެއްބަސްވުމެއްގައި ސޮއި ކުރުމަށްފަހު އަލް އިއްތިހާދުން ޗެލްސީގެ އެންގޯލޯ ކާންޓޭ އާއެކުވެސް އެއްބަސްވުމަކަށް އާދެވިއްޖެކަމަށް ބޭރުގެ ރިޕޯޓުތަކުން ބުނެފިއެވެ.

ރިޕޯޓުތަކުން ބުނާ ގޮތުން 32 އަހަރުގެ ކާންޓޭ އަލް އިއްތިހާދާ ގުޅުމަށް ހަމަޖެހިފައިވަނީ ދެ އަހަރު ދުވަހުގެ އެއްބަސްވުމެއްގެ ދަށުން، 100 މިލިއަން ޔޫރޯގެ މުސާރަައަކަށެވެ. އަދި އެ ރިޕޯޓުތަކުން ދައްކާގޮތުން އޭނާ ވަނީ ލަންޑަނުގައި ސައުދީ ޓީމުގެ މެޑިކަލް ޓެސްޓުތައްވެސް ހަދާފައެވެ.

2016 ވަނަ އަހަރު ލެސްޓާ ސިޓީއިން ޗެލްސީ އާ ގުޅުނު ކާންޓޭ ވަނީ ޗެލްސީއަށް 190 މެޗު ކުޅެދީ 13 ލަނޑު ޖަހާފައެވެ. އޭނާ އަކީ ވޭތުވެދިޔަ ސީޒަންތަކު ޗެލްސީގެ މެދުތެރޭގައި މުހިންމު ދައުރެއް އަދާކުރި ކުޅުންތެރިއެކެވެ. މީގެ އިތުރުން ކާންޓޭ އަކީ 2018 ވަނަ އަހަރު ފްރާންސް އިން ވޯލްޑް ކަޕު ކާމިޔާބުކުރި އިރުވެސް ރަނގަޅު ކުޅުމެއް ދެއްކި ކުޅުންތެރިއެކެވެ.

ކުރިޔަށް އޮތް ސީޒަނަށް ތައްޔާރުވުމަށް ސައުދީ ޕްރޯ ލީގުގެ ކުލަބުތަކުން ދަނީ ގިނަ ކުޅުންތެރިންތަކެއް ގެންނަން މަސައްކަތް ކުރަމުންނެވެ.