ޙައްޖުވެރިންނަށް ޚިދުމަތްދޭ ސައުދީ ކުންފުންޏާ ރާއްޖޭގެ ޙައްޖު މިޝަނުން ބައްދަލުކޮށްފި
7 ޖޫން 2023 | ބުދަ 06:33ކުރީ އަހަރުތަކުގައި ދެވުނު ޚިދުމަތްތަކަށް ބަލާއިރު އިތުރަށް ރަނގަޅު ކުރަންޖެހޭ ކަންކަން ކުންފުނީގެ ސަމާލުކަމަށް ގެނެސްފައިވޭ
ރާއްޖޭގެ ޙައްޖު މިޝަނުގެ ބޭފުޅުން އަލް ބައިތު ގެސްޓްސްގެ އިސްވެރިޔާއާ ބައްދަލު ކުރައްވަނީ
މިއަހަރު ދިވެހިރާއްޖެއިން ސައުދީއަށްދާ ޙައްޖުވެރިންނަށް ޚިދުމަތްދޭ ކުންފުނިކަމުގައިވާ "އަލް ބައިތު ގެސްޓްސް" އާ ދިވެހި ޙައްޖު މިޝަނުން ބައްދަލުކޮށްފިއެވެ.
މި ބައްދަލުވުން އޮތީ މައްކާގައި ހުންނަ "އަލް ބައިތު ގެސްޓްސް" ގެ މައި އޮފީހުގައެވެ.
އިސްލާމިކް މިނިސްޓްރީން ބުނި ގޮތުގައި މި ބައްދަލުވުމުގައި މައިގަނޑު ގޮތެއްގައި މަޝްވަރާ ކޮށްފައިވަނީ ޙައްޖުގެ ޚިދުމަތްދިނުމުގައި ދިވެހި ޙައްޖުވެރިންނަށް ލުއި ފަސޭހަ އިންތިޒާމްތަކެއް ހަމަޖެއްސުމާ ގުޅޭގޮތުންނާއި، މިނާ އަދި އަރަފާތުގައި ޙައްޖުވެރިންނަށް ޚިދުމަތް ދިނުމަށްޓަކައި އެ ކުންފުނިން ވަމުންދާ އެންމެ ފަހުގެ ތައްޔާރީތަކާ ބެހޭގޮތުންނެވެ. އަދި ކުރީ އަހަރުތަކުގައި ދެވުނު ޚިދުމަތްތަކަށް ބަލާއިރު އިތުރަށް ރަނގަޅު ކުރަންޖެހޭ ކަންކަން ކުންފުނީގެ ސަމާލުކަމަށް ގެނެސްފައިވާ ކަމަށް ވެސް އެ މިނިސްޓްރީން ބުންޏެވެ.
ޙައްޖުވެރިންނަށްދޭ ޚިދުމަތްތައް މިއަހަރު އިތުރަށް ފުރިހަމަ ވެގެންދާނެކަން ފާހަގަ ކުރައްވަމުން އަލްބައިތު ގެސްޓްސްގެ މެނޭޖިންގ ޑިރެކްޓަރ އުސާމާ ޢަބްދުﷲ ދާނިޝް ވިދާޅުވީ އެހެން އަހަރުތަކާ ޚިލާފަށް މި އަހަރު މިނާ އަދި ޢަރަފާތުގައިވެސް ދިވެހި ޙައްޖުވެރިން ތިބޭނީ އެއް ސަރަޙައްދުގައި ކަމަށެވެ. އަދި ޚިދުމަތުގެ ފެންވަރު ކުރީ އަހަރުތަކަށްވުރެ ރަނގަޅުވާނެކަމުގެ ޔަގީންކަންވެސް އޭނާ ދެއްވިއެވެ.
މި ބައްދަލުވުމުގައި ދިވެހި ޙައްޖު މިޝަނުގެ ހުރިހާ ބޭފުޅުން ބައިވެރިވެވަޑައިގެންނެވިއެވެ.
