ޗެއާމަނާ ދެމެދު އުފެދުނު ޚިޔާލު ތަފާތުވުމުގައި މަލްޑިނީ އިސްތިއުފާ ދީފި

އޭސީ މިލާންގެ ޗެއާމަން ޕައޮލޯ ސްކަރޯނީއާ ދެމެދު އުފެދުނު ޚިޔާލު ތަފާތުވުމުގައި އެ ކުލަބުގެ ޓެކްނިކަލް ޑިރެކްޓަރު ޕައޮލޯ މަލްޑިނީ މަގާމުން އިސްތިއުފާ ދެއްވައިފި އެވެ.

މަލްޑިނީ އެންމެ ފުރަތަމަ ހަމަޖެއްސީ މިލާންގެ ސްޕޯޓިން ސްޓްރެޓެޖީ އެންޑް ޑިވެލޮޕްމަންޓް ޑިރެކްޓަރުގެ މަގާމަށެވެ. އެ މަގާމަށް އޭނާ ހަމަޖެއްސީ 2018 ވަނަ އަހަރު އެވެ. އެއީ އޭރު އެ ކުލަބުގެ ސްޕޯޓިން ޑިރެކްޓަރު ކަމަށް އަލަށް ހަމަޖެއްސި ލިއާންޑްރޯ އާއެކު މަސައްކަތް ކުރުމަށެވެ. ނަމަވެސް އޭގެ ފަހުން 2019 ވަނަ އަހަރުގެ ޖޫން މަހު އޭނާ އަށް ވަނީ ޓެކްނިކަލް ޑިރެކްޓަރުގެ މަގާމު ހަވާލުކޮށްފަ އެވެ. އެ އެއްބަސްވުން 2022 ވަނަ އަހަރު ހަމަވުމާއެކު އެ ކުލަބުން ވަނީ އިތުރު ދެ އަހަރަށް އެއްބަސްވުން އައު ކޮށްފަ އެވެ. އެހެންކަމުން އައު އެއްބަސްވުމުގެ މުއްދަތު ހަމަވާން އޮތީ އަންނަ އަހަރު އެވެ.

ބާކީ އެއް އަހަރު އޮއްވާ މަލްޑިނީ މަގާމުން އިސްތިއުފާ ދެއްވީ ހޯމަ ދުވަހުގެ ވަގުތެއްގަ އެވެ. އެއީ ކުލަބުގެ ޗެއާމަން ސްކަރޯނީ އާއި މަލްޑިނީގެ ވިސްނުމުގައި ތަފާތު ގޮތްތަކެއް ހުރުމުންނެވެ. މަލްޑިނީ އިސްތިއުފާ ދެއްވީ މިލާންގެ އިސްވެރިންނާ އެކު ކުރިއަށް ގެންދިޔަ ބައްދަލުވުމަށް ފަހު އެވެ. ގިނަ ވަގުތު ތަކަކަށް ދެމިގެން ދިޔަ ބައްދަލުވުމުގައި ޗެއާމަން ވަނީ މަލްޑިނީ ވަކި ކުރަން ބޭނުންވާ ވާހަކަ ހިއްސާކޮށްފައި ކަމަށް ރިޕޯޓުތައް ބުނެ އެވެ. ނަމަވެސް އޭގެ ބަދަލުގައި މަލްޑިނީ ނިންމެވީ އަމިއްލަ އަށް މަގާމުން އިސްތިއުފާ ދެއްވަން ކަމަށް ވެސް ވަނީ ބުނެފަ އެވެ. މަލްޑިނީއާއެކު ކޯ ޑިރެކްޓަރު ރިކީ މަސާރާ ވެސް ވަނީ ކުލަބު ދޫކޮށްލަން ނިންމައިފަ އެވެ.

މަލްޑިނީ އަކީ މިލާނަށް ކުޅެދީފައިވާ އެ ކުލަބުގެ ލެޖެންޑަރީ ޑިފެންޑަރެކެވެ. އޭނާ ވަނީ މިލާންގައި 25 ސީޒަން ހޭދަކޮށްފަ އެވެ. މިނާނުން ސީނިއާ ކެރިއަރު ފަށައި، އޭނާ ކުޅުމުން ރިޓަޔާކޮށްފައި ވަނީ ވެސް އެ ކުލަބުގަ އެވެ. މަލްޑިނީ ވަނީ މިލާނަށް ކުޅެދިން 902 މެޗުގައި 33 ލަނޑު ޖަހައިފަ އެވެ. އެ ކުލަބާއެކު އޭނާ ވަނީ ޖުމުލަ 23 ތައްޓެއް ކާމިޔާބުކޮށްފަ އެވެ.