ފުޓްބޯޅައިގެ ތާރީހުގައި ވެސް އުފެދުނު އެންމެ މޮޅު ކުޅުންތެރިޔަކީ ބާސެލޯނާއަށް ކުޅެމުން އަންނަ އާޖެންޓީނާގެ ކެޕްޓަން ލިއޮނެލް މެސީ ކަމަށް އެ ޓީމަށް ކުޅެމުން އަންނަ ކްރޮއޭޝިއާގެ މިޑްފީލްޑަރު އިވާން ރަކިޓިޗް ބުނެފިއެވެ.

މިދިޔަ ހަފްތާގައި ދިން ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާއަށް ދޭ އެވޯޑު ލިބިފައިވަނީ ރެއާލް މެޑްރިޑްގެ ތަރި ކްރިސްޓިއާނޯ ރޮނާލްޑޯއަށެވެ. މިފަހަރުގެ އެވޯޑާއެކު އޭނާ ވަނީ މެސީއާ އެއް އަދަދަކަށް މި އެވޯޑު ހޯދާފައެވެ. މި ދެ ކުޅުންތެރިން ވެސް ވަނީ ފަސް ފަހަރެއްގެ މަތިން މި އެވޯޑު ހޯދާފައެވެ.

މިކަމާއި ގުޅޭގޮތުން ދިން އިންޓަވިއުއެއްގައި ރަކިޓިޗް ބުނީ ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާގެ ގޮތުގައި އޭނާ ދެކޭ ކުޅުންތެރިޔަކީ ކާކުކަން އެންމެނަށް ވެސް އެނގޭނެ ކަމަށެވެ. ރޮނާލްޑޯއަކީ އޭނާ ވަރަށް އިހުތިރާމުކުރާ ކުޅުންތެރިޔެއް ކަމަށާއި އަދި އޭނާއަކީ ފުޓްބޯޅައިގައި އުފެދުނު އެންމެ މޮޅު ކުޅުންތެރިންގެ ތެރެއިން ހިމެނޭ ކުޅުންތެރިޔެއް ކަމަށް ރަކިޓިޗް ބުނެފައިވެއެވެ.

އެހެން ނަމަވެސް ރޮނާލްޑޯގެ ބަދު ނަސީބަކީ އޭނާއާ އެއް ދުވަސްވަރެއްގައި ތާރީހުގައި ވެސް އުފެދުނު އެންމެ މޮޅު ކުޅުންތެރިޔާ ކުޅުން ކަމަށް ރަކިޓިޗް ބުނެފައިވެއެވެ. އަދި އޭނާ އެގޮތަށް ނިސްބަތް ކުރި ކުޅުންތެރިޔަކީ ލިއޮނެލް މެސީ ކަމަށް ރަކިޓިޗް ވަނީ މި އިންޓަވިއުގައި ބުނެފައެވެ.

ރަކިޓިޗްގެ އިތުރުން ބާސާގެ ޑިފެންޑަރު ޖޯޑީ އަލްބާވެސް ވަނީ މިފަދައިން ވާހަކަ ދައްކާފައެވެ. އެގޮތުން ހޯމަ ދުވަހުގެ ރޭ ވިޔަރެއާލް އަތުން ރަށުން ބޭރުގައި 2-0 ގެ ނަތީޖާއަކުން މޮޅުވި މެޗަށް ފަހު ވާހަކަ ދައްކަމުން އަލްބާ ބުނީ ދަނޑުމަތީގައި އަބަދުވެސް ބަލަނީ މެސީއާ ހަމަޔަށް ބޯޅަ ޕާސްކުރަން ކަމަށެވެ. މެސީއަކީ ބާސާގެ އެންމެ މުހިންމު ކުޅުންތެރިޔާ ކަމަށާއި އޭނާއަކީ ފުޓްބޯޅަ ދުށް އެންމެ މޮޅު ކުޅުންތެރިޔާ ކަމަށް އަލްބާ ވަނީ ބުނެފައެވެ. އަދި މެސީ ޖަހާ ލަނޑުގެ އަދަދަކީ މިކަމަށް ބާރުދޭ އަލިގަދަ ހެއްކެއް ކަމަށްވެސް އަލްބާ ހާމަކުރިއެވެ.

ފަސްވަނަ ފަހަރަށް ދުނިޔޭގެ އެންމެ މޮޅު ކުޅުންތެރިޔާގެ މަގާމަށް ބާސާގެ ވާދަވެރި ރެއާލްއަށް ކުޅެމުންދާ ޕޯޗުގަލްގެ ކެޕްޓަން ރޮނާލްޑޯ ހޮވުމާއެކު ބާސާގެ ކުޅުންތެރިން  އަންނަނީ މީޑިއާގައި މެސީއަށް ސަޕޯޓުކޮށް ވާހަކަ ދައްކަމުންނެވެ. މި ދެ ކުޅުންތެރިންގެ އިތުރުން އެ ޓީމުގެ ފޯވާޑު ޕަކޯ އަލްކޭސާ ވެސް ވަނީ މި ބީދައިން ވާހަކަ ދައްކާފައެވެ.

މެސީގެ އުމުރުން 13 އަހަރުގައި ބާސާއާ ގުޅުމަށް ފަހު އޭނާ އަންނަނީ އެ ޓީމުގައި އާދަޔާ ހިލާފް މޮޅު ކުޅުމެއް ދައްކަމުންނެވެ.

ބާސެލޯނާ އާއެކު މެސީ 30 ތައްޓެއް ކާމިޔާބު ކޮށްފައިވާއިރު، އެއީ އެކްލަބުގެ ރެކޯޑެކެވެ. ބާސެލޯނާ އަށް ކުޅުނު 602 މެޗުގައި މެސީ ވަނީ އެކްލަބަށް 523 ލަނޑު ޖަހައިދީފައެވެ. މީގެ އިތުރުން ވެސް މެސީ ވަނީ ބާސެލޯނާ އާއެކު ގިނަ ރެކޯޑްތަކެއް ގާއިމް ކޮށްފައެވެ. މެސީ އަކީ ބާސެލޯނާ އަދި ސްޕެނިޝް ލީގުގެ ތާރީޚުގައި ވެސް އެންމެ ގިނަ ލަނޑު ޖެހި ކުޅުންތެރިޔާ އެވެ.

ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާގެ ގޮތުގައި ގިނަ ބަޔަކު ދެކޭ މެސީ ވަނީ، ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާގެ މަގާމް ފަސް ފަހަރު ހޯދާފައެވެ.