ލަވަ ކިޔުންތެރިޔާ މެޑޯނާ މަލާވީގައި ކްލިނިކެއް ހުޅުވައިފި

އެމެރިކާގެ މަޝްހޫރު ލަވަ ކިޔުންތެރިޔާ މެޑޯނާ ސައުތު އީސްޓް އެފްރިކާގެ ގައުމެއް ކަމަށްވާ މަލާވީގައި ކުޑަކުދިންނަށް ޚާއްސަ ސާޖަރީ ކްލިނިކެއް ހުޅުވައިފިއެވެ.

މެޑޯނާ ބުނެފައި ވަނީ އެ ކްލިނިކް އެޅުނީ ދެ އަހަރު ދުވަހުގެ މަސައްކަތުން ކަމަށާއި ޖުލައި މަހުގެ 11 ވަނަ ދުވަހު ރަސްމީކޮށް ކްލިނިކް ހުޅުވުމުން އުފާކުރާ ކަމަށެވެ.

މެޑޯނާ ހުޅުވި ކްލިނިކްގެ ނަމަކީ "ކްލިނިކް ދަ މާސީ އިންސްޓިޓިއުޓް ފޯ ޕީޑިއަޓްރިކް ސާޖަރީ އެންޑް އިންޓެންސިވް" ކެއާއެވެ. މި ކްލިނިކަށް ނަން ދީފައި ވަނީ މެޑޯނާ އެޑަޕްޓްކޮށްގެން ގެންގުޅޭ މަލާވީ އަށް ނިސްބަތްވާ އަންހެން ދަރިފުޅު މާސީ ޖޭމްސްގެ ނަމާ ގުޅުވައިގެންނެވެ.

އެ ކްލިނިކްގައި މީގެ ހަފްތާއެއްހާ ދުވަސްކުރިން ވަނީ އޮޕަރޭޝަނެއްކޮށް ކާމިޔާބު ވެސް ކޮށްފައެވެ. ދަ މާސީ އިންސްޓިޓިއުޓް ފޯ ޕިޑިއަޓްރިކް ސާޖަރީ އެންޑް އިންޓެންސިވް ކެއާ ކްލިނިކް ގާއިމުކޮށްފައި ވަނީ މަލާވީގައި ހުންނަ ކްއީން އެލިޒަބަތު ސެންޓްރަލް ހޮސްޕިޓަލްގެ ތެރޭގައެވެ.

ދަ އެސޯސިއޭޓް ޕްރެސް އަށް މެޑޯނާ ބުނެފައި ވަނީ އޭނާ މަލާވީގައި ކްލިނިކެއް އަޅާފައި ވަނީ އެ ގައުމުގައި ބޭނުން ޖެހިފައިވާ ކުދިންނަށް އެހީވުމުގެ ގޮތުން ކަމަށެވެ. އަދި އޭނާ މަލާވީއަށް ދިޔަ ފުރަތަމަ ފަހަރު ވެސް އޭނާ އަމިއްލައަށް ވިސްނުނީ ކްލިނެއްގެ މުހިއްމު ކަން ކަމަށް މެޑޯނާ ބުންޏެވެ.

މެޑޯނާ ބުނެފައި ވަނީ އޭނާއަށް އެ ކްލިނިކް ހެދުމަށް އެންމެ ބޮޑު އެހީތެރިކަމެއް ލިބުނީ މަލާވީގެ ސަރުކާރާއި ހެލްތު މިނިސްޓަރުގެ ފަރާތުން ކަމަށެވެ.

އުމުރުން 58 އަހަރުގެ މެޑޯނާ ދަނީ ތަފާތު އެކި ގޮތް ގޮތުން އިންސާނިއްޔަތަށްޓަކައި އެހީތެރިކަން ފޯރުކޮށްދެމުންނެވެ. އެގޮތުން އޭނާ މިހާރު ވެސް ދަނީ ހަ ކުޑަކުދިން "އެޑޮޕްޓް" ކޮށްގެން ގެންގުޅެމުންނެވެ.