އިރުގެ އަލިން އުފައްދާ ކަރަންޓު ބޭނުންކޮށްގެން 4 ރަށެއްގައި އައިސްޕްލާންޓުތަކެއް ގާއިމްކުރަނީ
މި މަޝްރޫއުގެ މަސައްކަތް 240 ދުވަހުގެ ތެރޭގައި ނިންމަންޖެހޭ
އެއްބަސްވުމުގައި ސޮއިކުރި ރަސްމިއްޔާތުގެ ތެރެއިން
އިރުގެ އަލިން އުފައްދާ ކަރަންޓު ބޭނުންކޮށްގެން 4 ރަށެއްގައި ކޮމިއުނިޓީ އައިސްޕްލާންޓުތަކެއް ގާއިމުކުރުމަށް އެއްބަސްވުމުގައި ސޮއިކޮށްފިއެވެ.
މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޮލޮޖީން ބުނީ ކާރބަން ނެޓް-ޒީރޯ 2023 ގެ ލަނޑުދަނޑި ހާސިލުކުރުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން، އިރުގެ އަލިން އުފައްދާ ކަރަންޓު ބޭނުންކޮށްގެން ނ.ލަންދޫ، ތ.ބުރުނީ، ތ.މަޑިފުށި އަދި ތ.ވިލުފުށީގައި ކޮމިއުނިޓީ އައިސްޕްލާންޓުތަކެއް ގާއިމުކޮށްދޭނެ ފަރާތެއް ކަނޑައަޅާފައިވާ ކަމަށެވެ.
އެގޮތުން އާދިއްތަ ދުވަހު މި މަސައްކަތް ކުރުމަށް ހޮވުނު ފަރާތްކަމުގައިވާ ޗައިނާގެ "އިންސްޓެކް އިމްޕޯރޓް އެންޑް އެކްސްޕޯރޓް ކޮމްޕެނީ ލިމިޓެޑް" އާއެކު ވަނީ ކޮންޓްރެކްޓްގައި ސޮއިކޮށްފައިވާ ކަމަށް މިނިސްޓްރީން ބުނެއެވެ.
މި މަޝްރޫއުގެ ދަށުން ނ.ލަންދޫ، ތ.މަޑިފުށި އަދ ތ.ވިލުފުށި، މިއިން ކޮންމެ ރަށެއްގައި 15 ޓަނުގެ އައިސްޕްލާންޓް، 30 ޓަނުގެ ސްޓޯރޭޖާއެކު ގާއިމުކުރެވޭނެއެވެ. އަދި ތ.ބުރުނީގައި 5 ޓަނުގެ އައިސްޕްލާންޓް، 15 ޓަނުގެ ސްޓޯރޭޖާއެކު ގާއިމުކުރެވޭނެއެވެ.
މިމަޝްރޫއުގެ މަސައްކަތް 240 ދުވަހުގެ ތެރޭގައި ނިންމަންޖެހެއެވެ. މި މަސައްކަތް ހަވާލުކޮށްފައިވަނީ 1،773،242.93 (އެއްމިލިއަން ހަތްލައްކަ ހަތްދިހަ ތިންހާސް ދުއިސައްތަ ސާޅީސް ދެ އެމެރިކާ ޑޮލަރު ނުވަދިހަ ތިން ސެންޓް) އަށެވެ.
މި ރަސްމިއްޔާތު ޝަރަފްވެރިކޮށްދެއްވީ މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޑރ. ހުސައިން ރަޝީދު ހަސަން އެވެ.
މި ރަސްމިއްރާތުގައި މިނިސްޓްރ އޮފް އެންވަޔަރަންމަންޓް، ކްލައިމެޓްޗޭންޖް އެންޑް ޓެކްނޯލޮޖީ އާމިނަތު ޝައުނާ އާއި އެމިނިސްޓްރީގެ އިސްވެރިން ބައިވެރިވެ ވަޑައިގެންނެވިއެވެ. އަދި މި ރަސްމިއްޔާތުގައި އައިސްޕްލާންޓް ގާއިމުކުރާ 04 ރަށުގެ ކައުންސިލް މެމްބަރުންނާއި އަދި ތ.އަތޮޅު ކައުންސިލުގެ ރައީސް ބައިވެވަޑައިގެންނެވިއެވެ.
