ލިންގާޑް ހިމެނޭހެން ހަ ކުޅުންތެރިން ނޮޓިންހަމް ފޮރެސްޓުން ދޫކޮށްލައިފި

އިންގްލެންޑް އަދި މެންޗެސްޓާ ޔުނައިޓެޑުގެ ކުރީގެ މިޑްފީލްޑަރ ހެސޭ ލިންގާޑް ހިމެނޭހެން ހަ ކުޅުންތެރިން ނޮޓިންހަމް ފޮރެސްޓުން ދޫކޮށްލައިފިއެވެ.

ލިންގާޑް ޓީމާ ގުޅުނީ 2022 ވަނަ އަހަރުގެ ހޫނުމޫސުމުގައެވެ. އޭނާ ވަނީ ނޮޓިންހަމް ފޮރެސްޓަށް 20 މެޗު ކުޅެދީފައެވެ. ނަމަވެސް 2023 ވަނަ އަހަރު ޕްރިމިއަރ ލީގުގައި އޭނާ ކުޅެފައިވަނީ އެންމެ 60 މިނެޓެވެ.

އެއްބަސްވުމުގެ މުއްދަތު ހަމަވުމުން ލިންގާޑުގެ އިތުރުން އެ ޓީމުން ދޫކޮށްލާފައިވަނީ އަންދްރޭ އަޔެވް، ކަފޫ، ޖޭޑަން ސްމިތު އަދި ޓޭލާއެވެ. އަދި ކޭލާ ނަވާސް އަދި ޑީން ހެންޑަސަންގެ އިތުރުން ރެނާން ލޯޑީ ވަނީ ލޯނުގެ މުއްދަތު ހަމަވުމުން އެނބުރި ގޮސްފައެވެ.

ސީޒަން ފެށިއިރު ކީޕަރަކަށް ހުރީ ޔުނައިޓެޑުން ލޯނު އުސޫލުން ގެނައި ހެންޑަސަންއެވެ. ނަމަވެސް އޭނާއަށް އަނިޔާވުމުގެ ސަބަބުން ފޮރެސްޓުން ވަނީ ޕީއެސްޖީގެ ނަވާސްވެސް ގެނެސްފައެވެ. އެތުލެޓިކޯ މެޑްރިޑުން ގެނައި ލޯޑީ ވަނީ އެ ޓީމަށް 28 މެޗު ކުޅެފައެވެ.

ސަރޖް އޮރިއަރ ވަނީ އެއް އަހަރު ދުވަހަށް އެއްބަސްވުން އައުކޮށްފައެވެ. އަދި ނިއުކާސަލްއިން ލޯނަށް ގެނައި ކްރިސް ވުޑް ދާއިމީކޮށް ގަތުމަށް ޓީމުން ދަނީ މަސައްކަތް ކުރަމުންނެވެ.

ނޮޓިންހަމް ފޮރެސްޓަކީ އެންމެ ގިނަ ކުޅުންތެރިން ގެނައި އެއް ޓީމެވެ. ރެލިގޭޓް ނުވުމަށް ކުރި މަސައްކަތް ކާމިޔާބުކޮށް ސީޒަން ނިންމާލީ 16 ވަނައިގައެވެ.