ޖަރުމަނު ލީގުގެ އެއިންޓްރަކްޓް ފްރޭންކްފާޓަށް ކުޅެމުން އަންނަ ޖަރުމަނުގެ އެޓޭކިން މިޑްފީލްޑަރު މާރިއޯ ގޮޓްޒާ އެ ކުލަބާއެކު ހަދާފައިވާ އެއްބަސްވުން އައު ކޮށްފި އެވެ.
ޕީއެސްވީ ދޫކޮށް އޭނާ ފްރޭންކްފާޓަށް ބަދަލުވީ 2022 ވަނަ އަހަރު އެވެ. އެ އަހަރު އޭނާ އެ ކުލަބާ ގުޅުނީ ތިން އަހަރު ދުވަހުގެ އެއްބަސްވުމެއްގެ ދަށުންނެވެ. ނަމަވެސް އެއްބަސްވުމުގައި ބާކީ ދެ އަހަރު އޮއްވާ، ފްރޭންކްފާޓުން ބޭނުންވީ އެއްބަސްވުން އައު ކުރުމަށެވެ. އެއީ އެ ކުލަބުން ދިގު މުއްދަތަކަށް އޭނާ ބަހައްޓަން ބޭނުންވާތީ އެވެ. އެހެންކަމުން ގޮޓްޒާއާއެކު ކުރިއަށް ގެންދިޔަ މަޝްވަރާތަކަށް ފަހު މިހާރު ވަނީ އެއްބަސްވުމުގައި ސޮއި ވެސް ކޮށްފަ އެވެ. އައު އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ. އެއްބަސްވުމުގައި ސޮއި ކުރުމަށް ފަހު ގޮޓްޒާ ބުނީ، އޭނާ ބޭނުންވަނީ ފްރޭންކްފާޓާއެކު ކުރިއަށް ދާން ކަމަށާއި، އެއްބަސްވުން ޤަބޫލު ކުރީ އެ ސަބަބާ ހުރެ ކަމަށެވެ.
ގޮޓްޒާ ވަނީ މިހާތަނަށް ފްރޭންކްފާޓަށް ކުޅެދިން 45 މެޗުގައި ތިން ލަނޑު ޖަހައިފަ އެވެ. ބޮރޫޝިއާ ޑޯޓްމަންޑުން ސީނިއާ ކެރިއަރު ފެށި ގޮޓްޒާ ވަނީ އެ ލީގުގެ ގަދަ ބާރު ބަޔާން މިއުނިކަށް ވެސް ކުޅެފަ އެވެ. ބަޔާނުން އޭނާ ހޯދީ ޑޯޓްމަންޑުގައި ދެއްކި މޮޅު ކުޅުމުގެ ސަބަބުންނެވެ. ބަޔާންގައި ހުރުމަށް ފަހު ދެ ވަނަ ފަހަރަށް އޭނާ ޑޯޓްމަންޑަށް ބަދަލުވި އެވެ. އެއަށްފަހު ގުޅުނީ ޕީއެސްވީއާ އެވެ. ގޮޓްޒާ އަކީ ޖަރުމަނު ޤައުމީ ޓީމުގައި ވެސް ފާހަގަކޮށްލެވޭ ކުޅުންތެރިއެކެވެ. އެގޮތުން 2014 ވަނަ އަހަރު ބްރެޒިލްގައި އޮތް ފީފާ ވޯލްޑް ކަޕްގައި ޖަރުމަނުން އާޖެންޓީނާ ބަލިކުރި ލަނޑު ފަހު ވަގުތު ޖެހީ ވެސް އޭނާ އެވެ. އެއަށްފަހު 2017 ވަނަ އަހަރު އޭނާ އަށް ޤައުމީ ސްކޮޑުން ޖާގަ ގެއްލުނެވެ. ފަސް އަހަރަށް ފަހު އަލުން ޤައުމީ ސްކޮޑުން ޖާގަ ލިބުނީ މިދިޔަ އަހަރު ޤަތަރުގައި އޮތް ފީފާ ވޯލްޑް ކަޕްގަ އެވެ.
