އެޓްލެޓިކޯ މެޑްރިޑަށް ކުޅެމުން އަންނަ ސްޕެއިންގެ ފޯވާޑް ފެނާންޑޯ ޓޮރޭޒް އެ ކްލަބާއެކު ހަދާފައިވާ އެއްބަސްވުން އާކޮށްފި އެވެ.

ބުދަ ދުވަހު ޓޮރޭޒް އޭނާގެ އެއްބަސްވުން އާކޮށްފައިވާއިރު، އެޓްލެޓީކޯ އިން ބުނީ ޓޮރޭޒް އެ ކްލަބުގައި މަޑުކުރަން ނިންމީ އިތުރު އެއް އަހަރަށް ކަމަށެވެ.

މި ސީޒަނަށްފަހު އެޓްލެޓިކޯ އިން ޓޮރޭޒް ދޫކޮށްލާނެ ކަމަށް ބެލެވުނުއިރު، އޭނާ ހޯދުމަށް މެކްސިކޯ، ޗައިނާ އަދި އެމެރިކާގެ ބައެއް ކްލަބްތަކުންވެސް ވަނީ މަސައްކަތްކޮށްފައެވެ.

އުމުރުން 33 އަހަރުގެ ޓޮރޭޒް އާ އެއްބަސްވުމުގައި ސޮއިކުރުމަށްފަހު އެޓްލެޓިކޯގެ ރަސްމީ ސައިޓަށް ދިން އިންޓަވިއުއެއްގައި ބުނީ އިތުރު އެއް އަހަރު އަނެއްކާވެސް މަޑުކުރަން ޖެހުމުން އޭނާ ވަރަށް އުފާވާ ކަމަށާއި، ކްލަބާއެކު އިތުރު ކާމިޔާބީތައް ހޯދަން ކެތް މަދުވެފައިހުރި ކަމަށެވެ.

އެޓްލެޓިކޯ މެޑްރިޑުން 2001 ވަނަ އަހަރު ކެރިޔަރު ފެށި ޓޮރޭޒް ވަނީ އެ ކްލަބުގައި ހަތް ސީޒަން ހޭދަކޮށްފައެވެ. އެގޮތުން އެ ހަތް ސީޒަނުގައި އޭނާ ވަނީ އެޓީމަށް ކުޅުނު 244 މެޗުގައި 91 ލަނޑު ކާމިޔާބުކޮށްފައެވެ. އެއަށްފަހު އޭނާ ދެން ބަދަލުވީ 2007 ވަނަ އަހަރު ލިވަޕޫލްއަށެވެ. ލިވަޕޫލްގައި ހަތަރު ސީޒަން ޓޮރޭޒް ހޭދަކޮށްފައިވާއިރު، އޭނާ ވަނީ އެ ކްލަބަށް ކުޅުނު 142 މެޗުގައި 81 ލަނޑު ކާމިޔާބުކޮށްފައެވެ.

އެއަށްފަހު ދެން ޓޮރޭޒް ބަދަލުވީ 2010 ވަނަ އަހަރު ޗެލްސީ އަށެވެ. އެގޮތުން ޗެލްސީ އަށް ކުޅުނު 172 މެޗުގައި އޭނާ ވަނީ 45 ލަނޑު ކާމިޔާބުކޮށްފައެވެ. ޗެލްސީއާ އެކު އޭނާ ވަނީ ޗެމްޕިއަންސް ލީގު، ޔޫރޮޕާ ލީގު އަދި އެފްއޭކަޕްވެސް ކާމިޔާބުކޮށްފައެވެ. ޗެލްސީގައި ހުރެ އޭނާ ވަނީ އެޓްލެޓިކޯ މެޑްރިޑް އަދި އޭސީ މިލާނަށް ލޯން އެއްބަސްވުމެއްގެ ދަށުން ކުޅެފައެވެ.

ޗެލްސީ ދޫކޮށްލުމަށްފަހު އެޓްލެޓިކޯ އަށް އަނެއްކާވެސް ޓޮރޭޒް ބަދަލުވީ މިދިޔަ އަހަރެވެ. އެގޮތުން އޭނާ ވަނީ މިހާތަނަށް އެޓީމަށް ކުޅުނު 115 މެޗުގައި 28 ލަނޑު ކާމިޔާބުކޮށްފައެވެ.

ސްޕެއިންއާ އެކު ފީފާ ވޯލްޑްކަޕް 2010 ވަނަ އަހަރު ޓޮރޭޒް ކާމިޔާބުކޮށްފައިވާއިރު، އޭނާ ވަނީ އެޓީމާއެކު 2008 ވަނަ އަހަރު އަދި 2012 ވަނަ އަހަރު ޔޫރޯ ފުޓުބޯޅަ މުބާރާތްވެސް ކާމިޔާބުކޮށްފައެވެ.