ކާމިޔާބު ސީޒަނަކަށް ހެދުމަށް މިއީ ރަނުގެ ފުރުސަތެއް: ޓެން ހާގް

އެފްއޭ ކަޕް ފައިނަލުގައި ވާދަވެރި މެންޗެސްޓާ ސިޓީއާ ދެކޮޅަށް ކުޅެން ތައްޔާރުވަމުން އަންނައިރު، މިއީ ކާމިޔާބު ސީޒަނަކަށް ހެދުމަށް ރަނުގެ ފުރުސަތެއް ކަމަށް މެންޗެސްޓާ ޔުނައިޓެޑުގެ ކޯޗު އެރިކް ޓެން ހާގް ބުނެފިއެވެ.

އެފް އޭ ކަޕު ފައިނަލް މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ޓެން ހާގް ބުނީ، ޔުނައިޓެޑުގައި ހޭދަކުރި ފުރަތަމަ ސީޒަނަކީ ރަނގަޅު ސީޒަނެއް ކަމަށާ، އެފްއޭ ކަޕު ކާމިޔާބުކޮށްގެން ސީޒަން އިތުރަށް ފުރިހަމަ ކުރެވޭނެ ކަމަށެވެ. އޭނާ އިތުރަށް ބުނީ ބޭނުމީ މޮޅުވާން ކަމަށާ، ޓީމުގެ ފަރާތުން ގިނަ ކުރިއެރުންތަކެއް ފެންނަ ކަމަށެވެ.

މެންޗެސްޓާ ޔުނައިޓެޑުގެ ކުރީގެ ކޯޗު، ސަރ އެލެކްސް ފާގަސަންގެ އެންމެ ބޮޑު ކާމިޔާބީކަމަށްވާ "ޓްރެބަލް" ހޯދުމުގެ ފުރުސަތު ސިޓީއަށް އެބައޮތެވެ. ސިޓީ އިން ލީގު ކާމިޔާބުކޮށްފައިވާއިރު، އެފްއޭ ކަޕާއި ޗެމްޕިއަންސް ލީގުގެ ފައިނަލަށް ވަނީ ދަތުރުކޮށްފައެވެ.

މިއީ ތާރީހުގައި ފުރަތަމަ ފަހަރަށް މެންޗެސްޓާގެ ދެ ޓީމު އެފްއޭ ކަޕުގެ ފައިނަލުގައި ވާދަކުރާ ފަހަރެވެ.