އެމްބުއޭމޯ ޔުނައިޓެޑަށް

ބްރެންޓްފޯޑަށް ކުޅެމުން އައި ކެމަރޫންގެ ބްރަޔާން އެމްބުއޭމޯ، މެންޗެސްޓަރ ޔުނައިޓެޑަށް ބަދަލުވެއްޖެ އެވެ.

ބްރެންޓްފޯޑު ދޫކޮށްލުމަށް ފަހު އުމުރުން 25 އަހަރުގެ ކުޅުންތެރިޔާ ޔުނައިޓެޑަށް ބަދަލުވީ ފަސް އަހަރު ދުވަހުގެ އެއްބަސްވުމެއްގެ ދަށުންނެވެ. ޔުނައިޓެޑާ އެކު އޭނާ ސޮއި ކުރި އެއްބަސްވުމުގެ މުއްދަތު ހަމަވާނީ 2030 ވަނަ އަހަރުގެ ޖޫން މަހުގެ ނިޔަލަށެވެ.

އެއްބަސްވުމުގައި ވާ ގޮތުން، އެއްބަސްވުމުގެ މުއްދަތު ހަމަވުމުން އިތުރު އެއް އަހަރަށް އެއްބަސްވުން އައު ކުރުމުގެ ފުރުސަތު ވެސް އޮންނާނެ އެވެ. އޭނާ ހޯދުމަށް ޔުނައިޓެޑުން ވަނީ 70 މިލިއަން ޕައުންޑު ހޭދަކޮށްފައި ކަމަށް މީޑިއާ ތަކުގައި ވަނީ ބުނެފަ އެވެ.

ޔުނައިޓެޑުގައި އެމްބުއޭމޯ ބޭނުން ކުރާނީ 19 ނަންބަރު ޖާޒީ އެވެ. ޔުނައިޓެޑަށް ބަދަލުވުމަށް ފަހު ވާހަކަ ދައްކަމުން އޭނާ ބުނެފައި ވަނީ، ޔުނައިޓެޑަކީ އޭނާގެ ހުވަފެނީ ކުލަބު ކަމަށެވެ. އަދި ޔުނައިޓެޑަށް ބަދަލުވުމުގެ ފުރުސަތު ލިބުނު އިރަށް، ވީ އެންމެ އަވަހަށް އެ ފުރުސަތުގެ ބޭނުން ހިފަން ބޭނުންވި ކަމަށް އެމްބުއޭމޯ ވަނީ ބުނެފަ އެވެ.

އިތުރަށް އޭނާ ބުނެފައި ވަނީ ޔުނައިޓެޑުގެ ޖާޒީ އަކީ އޭނާ އެންމެ ކުޑަ ދުވަހުން ފެށިގެން ވެސް ލަމުން އައި ޖާޒީއެއް ކަމަށެވެ. މިހާރު ޔުނައިޓެޑަށް ކުޅުމުގެ ފުރުސަތު ލިބުމަކީ އޭނާ އަށް ލިބޭ ވަރަށް ބޮޑު އުފަލެއް ކަމަށް ވެސް އެމްބުއޭމޯ ބުންޏެވެ. ޔުނައިޓެޑާ އެކު ކުރިއަށް ގޮސް، އެ ކުލަބާ އެކު ކާމިޔާބީތަކެއް ހޯދަން ބޭނުންވެފައި ހުރި ކަމަށް ވެސް އެމްބުއޭމޯ ބުންޏެވެ.

އެމްބުއޭމޯ ޔުނައިޓެޑަށް ބަދަލުވުމުގެ ކުރިން އޭނާ ހޯދުމުގެ މަސައްކަތް ބައެއް އެހެން ކުލަބުތަކުން ކޮށްފައިވާ ކަމަށް ވަނީ ރިޕޯޓު ކޮށްފަ އެވެ. އެގޮތުން ޗެލްސީ އިން ވެސް ވަނީ އެމްބުއޭމޯ ހޯދުމަށް މަސައްކަތް ކޮށްފައި ކަމަށް ބުނެފައިވެ އެވެ.

އެމްބުއޭމޯ ވަނީ އޭނާ ބްރެންޓްފޯޑަށް ކުޅެދިން 242 މެޗުގައި 70 ލަނޑު ޖަހައިފަ އެވެ. ބްރެންޓްފޯޑަށް ބަދަލުވުމުގެ ކުރިން އެމްބުއޭމޯ ވަނީ ޓްރޮޔީސް އަށް ވެސް ކުޅެފަ އެވެ.