އިންގްލެންޑްގެ ޤައުމީ ޓީމްގެ ކުރީގެ ކެޕްޓަން ޑޭވިޑް ބެކަމްގެ އިންޓަ މިއާމީގެ ކޯޗު ކަމުން ފިލް ނެވިލް ވަކިކޮށްފިއެވެ.

ނެވިލް ކޯޗުކަމުން ވަކިކުރީ އެ ޓީމަށް އެދެވޭ ކުޅުމެއް ނުދެއްކުމުގެ ސަބަބުންނެވެ. ބުދަ ދުވަހު ނިއުޔޯކް ރެޑްބުލް ކައިރިން ވަނީ 1-0 އިން ބަލިވެފައެވެ. މިއާއެކު ނެވިލްގެ ކޯޗު ކަމުގެ ދަށުން އެންމެ ފަހުން ކުޅުނު 13 މެޗުގެ ތެރެއިން 10 މެޗުން އެ ޓީމު ވަނީ ބަލިވެފައެވެ. މި ސީޒަނުގައި 15 މެޗު ކުޅުނު އިރު ޓީމު އޮތީ މޭޖަ ލީގް ސޮކާ (އެމްއެލްއެސް) ގެ ތާވަލުގެ ފުލުގައެވެ.

ފިލް ނެވިލް ޓީމާ ހަވާލުވީ 2021 ވަނަ އަހަރުގެ ޖެނުއަރީގައެވެ. ކުލަބު ގެ ކޯ އޯނަރު ޑޭވިޑް ބެކަމް ބުނީ ފުޓުބޯޅައިގައި ބައެއް ފަހަރު އެންމެ އުނދަގޫ ނިންމުންތައްވެސް ނިންމަންޖެހޭ ކަމަށެވެ. ބެކަމް ބުނީ މިވަގުތަކީ މި ނިންމުން ނިންމަން އެންމެ ރަނގަޅު ވަގުތުކަމަށެވެ. އޭނާ ވަނީ ޓީމަށް ޓަކައި ނެވިލް ކޮށްދިން ކަންތަކަށް ޝުކުރު އަދާކޮށްފައެވެ. ބެކަމް އާއި ނެވިލް އަކީ މީގެ ކުރިން މެންޗެސްޓާ ޔުނައިޓެޑާއި އިންގްލެންޑުގެ ގައުމީ ޓީމަށް އެއްކޮށް ކުޅުނު ދެ ކުޅުންތެރިންނެވެ.

އިންޓަ މިއާމީއާ ނެވިލް ހަވާލުވީ އިންގްލެންޑުގެ ގައުމީ ޓީމުގެ ކޯޗުކަމުގައި ތިން އަހަރު ހޭދަކުރުމަށްފަހުއެވެ.