މެންޑިލިބާގެ ތައުރީފާއި ޝުކުރު ސެވިއްޔާގެ ކުޅުންތެރިންނަށް

ޔުއެފާ ޔޫރޮޕާ ލީގު ކާމިޔާބު ކުރުމުން ސެވިއްޔާގެ ކޯޗު ހޯސޭ ލުއިސް މެންޑިލިބާ އެ ޓީމުގެ ކުޅުންތެރިންނަށް ޝުކުރު އަދާކޮށް، ވަރަށް ބޮޑަށް ތައުރީފުކޮށްފި އެވެ.

މުބާރާތުގެ އެންމެ ކާމިޔާބު ކުލަބު ސެވިއްޔާ އިން ހަތް ވަނަ ފަހަރަށް ތަށި އުފުލާލީ ފައިނަލްގައި ރޯމާ ބަލިކޮށްގެންނެވެ. އެ މެޗަށްފަހު ވާހަކަ ދައްކަމުން މެންޑިލިބާ ބުނީ، ޔޫރޮޕާ ލީގުގެ ފައިނަލްގައި އެ ޓީމުގެ ކުޅުންތެރިން ދެއްކި ކުޅުމަކީ ގޯސް ކުޅުމެއް ނޫން ކަމަށެވެ. އެހެންކަމުން ސެވިއްޔާގެ ކުޅުންތެރިން އެ ޓީމަށް ހޯދައިދިން ފަޚުރައްޓަކައި ކުޅުންތެރިންނަށް ޝުކުރު އަދާ ކުރުމަކީ ކޮންމެހެން ކުރަން ޖެހޭ ކަމެއް ކަމަށް ވެސް އޭނާ ބުންޏެވެ. ހަމައެއާއެކު އޭނާ އަށް އިތުބާރުކޮށް ކުލަބުގެ އިސްވެރިން ބެހެއްޓި ގާތް ކަމަށް ވެސް މެންޑިބިލާ ވަނީ ޝުކުރު އަދާކޮށްފަ އެވެ. އިތުރަށް އޭނާ ބުނީ ސެވިއްޔާ ގައި ހުރީ މިހާތަނަށް ހިތްހަމަ ޖެހިގެން ކަމަށާއި، ޔޫރޮޕާ ލީގުގެ ތަށި ކާމިޔާބު ކުރެވުމުން އެކަމާ ވެސް އުފާވާ ކަމަށެވެ. އެކަން ފާހަގަކޮށް މެންޑިބިލާ ބުނީ، މިހާ ހިސާބަށް ސެވިއްޔާ އަށް އާދެވުނީ ވަރަށް އުނދަގޫ ހާލަތަކުން ކަމަށާއި، ނަމަވެސް މިހާރު ކުލަބަށް ރަނގަޅު ކަމެއް ކުރެވިފައިވާ ކަމަށެވެ.

މީގެ އިތުރުން އޭނާ ބުނީ ޕެނަލްޓީ ޖެހުމަކީ ވެސް އެހާ ފަސޭހަ ކަމެއް ނޫން ކަމަށެވެ. ޚާއްސަކޮށް އެތައް ހާސް ސަޕޯޓަރުންގެ ކުރިމަތީގައި އެކަން ކުރަން ޖެހުމަކީ ކުޅުންތެރިންނަށް ވަރަށް ބޮޑު ޕްރެޝަރަކަށް ވާނެ ކަމަށެވެ. އެހެން ނަމަވެސް އޭނާގެ ކުޅުންތެރިން އިތުބާރާއެކު ޕެނަލްޓީތައް ޖެހިކަން ފާހަގަކުރަމުން މެންޑަބިލާ ބުނީ، އެއީ ވެސް ވަރަށް ގިނަ ދުވަހުގެ ފަރިތަކުރުން ކަމަށެވެ. އިތުރަށް އޭނާ ބުނީ ޕެނަލްޓީ ޖަހަން ދިޔަ ކޮންމެ ކުޅުންތެރިޔަކަށް ވެސް އިތުބާރު އޮތް ކަމަށެވެ. އޭނާ ބުނީ ސެވިއްޔާ އިން ޕެނަލްޓީ ޝޫޓް އައުޓަށް ދާން ބޭނުންނުވި ކަމަށާއި، ބޭނުންވީ ދެ ވަނަ ލަނޑެއް ޖަހައިގެން މެޗު ނިންމާލަން ކަމަށެވެ. އެހެން ނަމަވެސް އެކަން ނުކުރެެވުނީ އިދިކޮޅު ޓީމު ވެސް ވަރުގަދަ ވުމުން ކަމަށް އޭނާ ވަނީ ބުނެފަ އެވެ.

ސްޕެނިޝް ލީގުގައި މި ސީޒަނުގައި ސެވިއްޔާގެ ފަރާތުން ފެނުނީ ދަށް ކުޅުމެކެވެ. އެކަމާ ގުޅިގެން އެ ޓީމުން ކުރީގެ ކޯޗު މަގާމުން ވަކިވެސް ކުރި އެވެ.