ބާސެލޯނާގެ ސްޓޭޑިއަމް، ކޭމްޕް ނޫ އަލުން ތަރައްގީކުރުމަށް ބަންދުކުރުމުގެ ކުރިން ކުޅުނު ފަހު މެޗުން ބާސެލޯނާ މޮޅުވެއްޖެއެވެ.

2024 ވަނަ އަހަރުގެ ނޮވެމްބަރާ ހަމައަށް ދަނޑު ބަންދުކުރާއިރު، ބާސާގެ މެޗުތައް ވަގުތީ ގޮތުން ކުޅުމަށް ހަމަޖެއްސީ މޮންޓްޖުއިކްގައި ހުންނަ އޮލިމްޕިކް ސްޓޭޑިއަމްއަށެވެ. ކޭމްޕް ނޫ ބަންދުކުރުމުގެ ކުރިން ކުޅުނު ފަހު މެޗުގައި މަޔޯކާ ކައިރިން ބާސާ މޮޅުވީ 3-0 ގެ ނަތީޖާއަކުންނެވެ.

މެޗުގެ 49 ވަނަ ސިކުންތުގައި އަންސޫ ފާޓީ ވަނީ ލަނޑެއް ޖަހާ، ބާސާއަށް ކުރިހޯދަދީފައެވެ. އަދި މެޗުގެ 14 ވަނަ މިނެޓުގައި މަޔޯކާގެ ކުޅުންތެރިއަކަށް ރަތް ކާޑު ދެއްކުމާ ގުޅިގެން މެޗުގެ ބޮޑުބައި ކުޅެން ޖެހުނީ 10 ކުޅުންތެރިންނާއެކުއެވެ. އޭގެ 10 މިނެޓު ފަހުން ފާޓީ ވަނީ އިތުރު ލަނޑެއް ޖަހާ، ބާސާ އަށް ލީޑު ފުޅާކޮށްދީފައެވެ. މެޗުގެ ފަހު ލަނޑު 70 ވަނަ މިނެޓުގައި ބާސާއަށް ކާމިޔާބުކޮށްދިނީ ގަވީއެވެ.

މި ސީޒަނުގައި ބާސާއިން ވަކިވާ ޖޯޑި އަލްބާ އަދި ސާޖިއޯ ބުސްކެޓްސް ދެވަނަ ހާފުގައި ބޭލުވުމުން ސަޕޯޓަރުން ފަރާތުން ވަނީ އެ ދެ ކުޅުންތެރިންނަށް އިހުތިރާމްއަދާކޮށްފައެވެ. އަދި މެޗަށްފަހު ދެ ކުޅުންތެރިންނަށްވެސް ވަނީ އަގު ވަޒަންކޮށް، ޚާއްސަ ޓްރޮފީއެއް ދީފައެވެ.

ސްޕެނިޝް ލީގު ޗެމްޕިއަންކަން ހޯދި ބާސެލޯނާއިން މި ސީޒަނުގެ ފަހު މެޗުގައި ބައްދަލުކުރާނީ ސެލްޓަ ވީގޯ އާއެވެ. މި މެޗު ކުޅުމަށް ހަމަޖެހިފައިވަނީ އާދިއްތަ ދުވަހުއެވެ.