ބެންގަލޫރު ޓީމު މިފަހަރު ކޭމްޕް ކުރަނީ ތުލުސްދޫގައި

އޭއެފްސީ ކަޕްގެ ގްރޫޕް ސްޓޭޖުގައި ރާއްޖޭގެ ނިއު ރޭޑިއަންޓް ސްޕޯޓްސް ކްލަބާ ދެކޮޅަށް ކުޅުމަށް މިހާރު ރާއްޖެ އައިސްފައިވާ އިންޑިއާގެ ބެންގަލޫރު އެފްސީ ފުރަތަމަ ފަހަރަށް މާލެ އިން ބޭރުގައި ކޭމްޕް ކުރަން ނިންމައިފިއެވެ.

ނިއުއާ ދެކޮޅަށް ކުޅުމަށް ބެންގަލޫރު އައިސްފައިވާއިރު އެ ޓީމު ކޭމްޕް ކުރަމުން އަންނަނީ ކ. ތުލުސްދޫގައެވެ. ތުލުސްދޫގައި ބެންގަލޫރު ކޭމްޕް ކުރަމުންދާއިރު މިއީ އޭއެފްސީ ކަޕްގައި ކުޅުމަށް ޓީމެއް މާލެ އައިސް މާލެއިން ބޭރުގައި ކޭމްޕްކުރާ ފުރަތަމަ ފަހަރެވެ. އެހެން ނަމަވެސް މީގެ ކުރިން ދެ ފަހަރެއްގެ މަތިން ދެ ޓީމެއް މާލެ ކައިރި ރިސޯޓުގައި ކޭމްޕް ކޮށްފައިވެއެވެ.

ތުލުސްދޫގައި ބެންގަލޫރު ކޭމްޕް ކުރަމުންދަނީ މާލޭ ހޮޓަލަކުން އެކޮމޮޑޭޝަން ހަމަޖެއްސިފައި ނުވާތީއެވެ. ބެންގަލޫރުގެ ޓީމު ތުލުސްދޫގައި ތިބީ ވަރަށް ހިތްހަމަޖެހިގެން ކަމަށް މީޑިއާތަކުން ވަނީ ރިޕޯޓުކޮށްފައެވެ.

ތުލުސްދޫގައި ވިނަ ދަނޑެއް އޮންނައިރު އާންމު ގޮތެއްގައި އޭއެފްސީ ކަޕަށް ރާއްޖެ އަންނަ ޓީމުތަކުން ޕްރެކްޓިސް ކުރަނީ ގަލޮޅު ދަނޑުގައެވެ. އެހެން ނަމަވެސް ބެންގަލޫރު އެފްސީ އިން ފާއިތުވެދިޔަ އަހަރުތަކުގައި މާލޭގައި ގިނަ މެޗުތަކެއް ކުޅެފައިވުމާ އެކު އެ ޓީމުން ނިންމާފައި ވަނީ ތުލުސްދޫގައި އެންމެ ފަހުގެ ފަރިތަކުރުންތައް ކުރިޔަށް ގެންދިޔުމަށެވެ.

ބެންގަލޫރު އެންމެ ފަހުން ގަލޮޅު ދަނޑުގައި މެޗެއް ކުޅެފައި ވަނީ އޭއެފްސީ ކަޕްގެ ޕްލޭއޮފްގައި ޓީސީ ސްޕޯޓްސް ކްލަބާ ދެކޮޅަށެވެ.