ރާއްޖޭގެ 12 ޓެނިސް ކުޅުންތެރިޔަކު ތުރުކީގައި ކޭމްޕް ކުރަނީ
20 އެޕްރީލު 2018 | ހުކުރު 14:24މިއަހަރުގެ ކޭމްޕްގައި ބައިވެރިވާނީ 14 އަހަރުން ދަށުގެން އަންހެން އަދި ފިރިހެން ކުދިން
ރާއްޖޭގެ ޓެނިސް އެސޯސިއޭޝަންގެ ބައެއް ކުޅުންތެރިން
ޓެނިސް އެސޯސިއޭޝަން އޮފް މޯލްޑިވްސްގެ 12 ކުޅުންތެރިޔަކު ތުރުކީގައި ކޭމްޕް ކުރުމަށް ހަމަޖެހިއްޖެއެވެ.
މި ކުޅުންތެރިންނަށް ކޭމްޕް ކުރުމުގެ ފުރުސަތު ލިބިގެންދިޔައީ އަލިބޭ މޯލްޑިވްސް އާއި ޓެނިސް އެސޯސިއޭޝަނާއި ދެމެދު ވެވުނު ފަހުމުނާމާއެއްގެ ދަށުންނެވެ. މިއީ މި ކޭމްޕް ކުރިއަށްގެންދާ ދެވަނަ އަހަރަށްވާއިރު މިއަހަރުގެ ކޭމްޕްގައި ބައިވެރިވާނީ 14 އަހަރުން ދަށުގެން އަންހެން އަދި ފިރިހެން ކުދިން ހިމެނޭ ގޮތަށް 12 ކުދިންގެ ޓީމެކެވެ.
މި ޓީމުގައި ހިމެނޭ ކުޅުންތެރިންނަކީ މުހައްމަދު ނާމިގް ޝާހިދް، ރައުދަކް މައުމޫން، އައްޔޫބް ޝަހީބް، އިސްމާއިލް ނުހައިކް އިރުޝާން، މުހައްމަދު މުއައްލިމް އަހުމަދު، މުހައްމަދު ކައިސާން އިއްޒަތު ރަޝީދް، ސާރާ އަހުމަދު އަކްރަމް، އައިޝަތު ތާރާ ނައީމް، ލަޔާން މުހައްމަދު ޝާމިން، ޒޯޔާ ޒުބިން ސަލީމް އަދި އައިޝަތު ޔާރާ ޝަމާލްގެ އިތުރުން މަރިޔަމް އަލީޝާ ޚަތީރެވެ.
ޓެނިސް އެސޯސިއޭޝަންގެ ޖެނެރަލް ސެކްރެޓަރީ ޔޫސުފް ރިޒާ ވިދާޅުވީ މިއީ ޖޫނިއަރ ކުޅުންތެރިންގެ ތަރައްގީއަށް ލިބޭ ބޮޑު ފުރުސަތެއް ކަމަށެވެ. އަދި ކުދިން ހޮވާފައިވަނީ ޓެނިސް އެސޯސިއޭޝަނުން ކުޅޭ ހުރިހާ މުބާރާތެއްގައި އެކުލަވާލެވުނު ރޭންކިންއަކަށް ބެލުމަށް ފަހު ކަމަށް އޭނާ ވިދާޅުވިއެވެ. އަލިބޭ މޯލްޑިވްސްގެ މެނޭޖިން ޑައިރެކްޓަރު ވިދާޅުވީ މިއީ އެ ކުންފުންޔަށް ލިބޭ ވަރަށް ބޮޑު ފަޚުރެއް ކަމަށެވެ.
މި ކުޅުންތެރިން ތުރުކީއަށް ފުރާނީ މި މަހުގެ 26 ވަނަ ދުވަހުއެވެ. ހުޚުރު ދުވަހު ބޭއްވި ހަފްލާއެއްގައި ޓެނިސް އެސޯސިއޭޝަނުން ވަނީ ތުރުކީގައި އެ ކުދިން ބޭނުންކުރުމަށް ހަމަޖެހިފައިވާ ޖަރޒީ އެކުދިންނާއި ހަވާލުކޮށްފައެވެ.
