ޕީއެސްޖީގެ ދެ ވަނަ ގޯލްކީޕަރު ރިކޯ އައިސީޔޫގައި
އުމުރުން 29 އަހަރުގެ ކުޅުންތެރިޔާ އަށް އަނިޔާވީ އަސްދުއްވަން އުޅުމުގެ ތެރޭގައި އަހުން ވެއްޓި
ސާޖިއޯ ރިކޯ
ފްރާންސް ލީގުގެ ޗެމްޕިއަން ޕެރިސް ސެއިންޓް ޖާމަން (ޕީއެސްޖީ)ގެ ދެ ވަނަ ގޯލް ކީޕަރު ސާޖިއޯ ރިކޯ އަށް ލިބުނު އަނިޔާއެއްގެ ސަބަބުން އައިސީޔޫގައި ފަރުވާ ދޭން ފަށައިފި އެވެ.
އުމުރުން 29 އަހަރުގެ ކުޅުންތެރިޔާ އަށް އަނިޔާވީ އަސް ދުއްވަން އުޅުމުގެ ތެރޭގައި އަހުން ވެއްޓި ކަމަށް މީޑިއާ ތަކުގައި ވަނީ ބުނެފަ އެވެ. އަހުން ވެއްޓި، ރިކޯގެ ބޮލަށް ލިބުނު އަނިޔާގެ ސަބަބުން މިހާރު އޭނާ އަށް އަންނަނީ ސްޕެއިންގެ ސެވިއްޔާގައި ހުންނަ ހޮސްޕިޓަލެއްގެ އައިސީޔޫގައި ފަރުވާ ދެމުން ކަމަށް ވެސް ވަނީ ބުނެފަ އެވެ. ހޮސްޕިޓަލަށް ގެންދިޔުމަށް ފަހު އެންމެ ފުރަތަމަ އޭނާގެ ބޮލުގެ ޚާއްސަ ޓެސްޓުތަކެއް ހެދުން ކުރިއަށް ގެންދިޔަ ކަމަށާއި، ލިބުނު އަނިޔާ ސީރިއަސް ކަމަށް ޑަކްޓަރުން ބުނުމާއެކު، އައިސީޔޫގައި ފަރުވާ ދޭން ފަށާފައިވާ ކަމަށް ވެސް ވަނީ ބުނެފަ އެވެ.
ރިކޯ އަންނަނީ ލޯނު އެއްބަސްވުމެެއްގެ ދަށުން ސްޕެނިޝް ލީގުގެ މަޔޯކާ އަށް ކުޅެމުންނެވެ. އޭނާ އެންމެ ފުރަތަމަ ޕީއެސްޖީ އަށް ބަދަލުވީ ލޯނު އެއްބަސްވުމެއްގެ ދަށުން 2019 ވަނަ އަހަރު އެވެ. އެއް އަހަރު އެ ކުލަބަށް ކުޅުމަށްފަހު 2020 ވަނަ އަހަރު ވަނީ ދާއިމީ އެއްބަސްވުމެއް އެކުލަވާލައިފަ އެވެ. އެ އެއްބަސްވުމުގެ މުއްދަތު ހަމަވާނީ އަންނަ އަހަރު އެވެ. ލޯނު އެއްބަސްވުމެއްގެ ދަށުން ރިކޯ މަޔޯކާ އަށް ބަދަލުވީ މިދިޔަ އަހަރު އެވެ. އެއީ މި ސީޒަނުގެ ނިޔަލަށެވެ. އެ ހާދިސާއާ ގުޅިގެން ޕީއެސްޖީން މިހާރު ވަނީ އެކުލަބުގެ ރަސްމީ ބަޔާނެއް ވެސް ނެރިފަ އެވެ. އަދި ރިކޯގެ ހާލަތު އާއިލާއާ ވާހަކަ ދައްކައިގެން ވަރަށް ގާތުން ބަލަމުން ދާނެ ކަމަށް ވެސް ވަނީ ބުނެފަ އެވެ.
