އެއްވެސް ބަހަނާއެއް ނެތް، އަހަރެމެން ނާކާމިޔާބުވީ: ސަލާހް

ޗެމްޕިއަންސް ލީގުން ޖާގަ ނުލިބުމުން ދެއްްކޭނެ އެއްވެސް ބަހަނާއެއް ނެތްކަމަށާއި ޓީމަށް ނާކާމިޔާބުވީކަމަށް، ލިވަޕޫލްގެ މުހައްމަދު ސަލާހް ބުނެފިއެވެ.

ލިވަޕޫލަށް ޗެމްޕިއަންސް ލީގުން ޖާގަ ލިބެން އޮތީ މެންޗެސްޓަރ ޔުނައިޓެޑު ކުޅޭ އެންމެ ފަހު ދެ މެޗުން ބަލިވެގެންނެވެ. ނަމަވެސް، ބުރާސްފަތި ދުވަހުގެރޭ 4-1ން ޗެލްސީގެ މައްޗަށް ކުރިހޯދައި، ޔުނައިޓެޑުން ވަނީ ލިވަޕޫލަށް އޮތް ހަނި ފުރުސަތު ގެއްލުވާލައި، ޓީމު މާޔޫސްކޮށްލާފައެވެ.

ޔުނައިޓެޑާއި ޗެލްސީ ބައްދަލުކުރި މެޗަށްފަހު ސަލާހު ވަނީ ޓްވިޓަރގައި އޭނާގެ ހިތްދަތި ޝުއޫރުތައް ފާޅުކޮށްފައެވެ. އޭނާ ބުނީ އެއްވެސް ބަހަނާއެއް ދެއްކެން ނެތްކަމަށާއި، ކުރިޔަށް ދިއުމަށް ފުރުސަތު ލިބުނުއިރު އެ ފުރުސަތުގެ ބޭނުން އެެންމެ ރަނގަޅަށް ނުހިފުނީކަމަށެވެ. އޭގެ އިތުރުން ސަލާހު ބުނީ، ލިވަޕޫލް ވީމައި އެންމެ ކުޑަމިނުން ޗެމްޕިއަންސް ލީގަށް ކޮލިފައި ވާން ޖެހޭނެކަމަށެވެ. އަދި އުންމީދީ ޕޯސްޓެއް ޖަހަން މާ އަވަސްކަމަށް ސަލާހު ބުންޏެވެ.

2016 ވަނަ އަހަރުގެ ފަހުން ކޮންމެ އަހަރަކުވެސް ޗެމްޕިއަންސް ލީގުގައި ލިވަޕޫލް ވާދަކުރާއިރު، 18/19ގެ ޗެމްޕިއަނުންނަކީވެސް ލިވަޕޫލެވެ. ކުރިޔަށް އޮތް ސީޒަނުގައި ލިވަޕޫލް ކުޅޭނީ ޔުރޮޕާ ލީގެވެ.