ސަރުކާރަށް ވަނީ ގޮތް ހުސްވެފައި:ޑރ. ޖަމީލް
10 ޖުލައި 2017 | ހޯމަ 11:25މިހާރު ޕީޕީއެމް ކޯލިޝަން މެމްބަރުންގެ އަދަދު 41އަށް ވަނީ އަރާފައި
ޑރ.ޖަމީލު އަހުމަދު
ސަރުކާރަށް އޮތް ތާއީދު ގެއްލި ގޮތް ހުސްވުމުން ޝަރުއީ ދާއިރާ މެދުވެރިކޮށް ވެރިކަމުގައި ތިބެން މަސައްކަތް ކުރަމުންދާ ކަމަށް މިސަރުކާރުގެ ފުރަތަމަ ނައިބު ރައީސް ޑރ. މުހައްމަދު ޖަމީލު އަހުމަދު ވިދާޅުވެއްޖެއެވެ.
ޑރ. ޖަމީލު މިގޮތަށް ވިދާޅުވީ ބަންޑާރަނައިބުގެ އޮފީހުން ސިޔާސީ ޕާޓީ ބަދަލުކުރުމުން މަޖިލީހުގެ ގޮނޑި ގެއްލޭ ގޮތަށް ސުޕްރީމް ކޯޓަށް ހުށައެޅުމާއި ގުޅިގެން ހޯމަ ދުވަހު ކުރެއްވި ޓްވީޓެއްގައެވެ.
މަޖިލީހުން ސަޕޯޓް ގެއްލުމުން އަދި ވޯޓުން ބަލިވުމުން ޖުޑީޝަރީ މެދިވެރިކޮށް ވެރިކަމުގައި ތިބެން ހިފީ ތޯއާއި މައްސަލަތައް ބެލުމުގެ އުސޫލު ކޮބާތޯ ވިދާޅުވެ ޑރ. ޖަމީލް ވަނީ ސުވާލު އުފައްދަވާފައެވެ.
ޖަމީލު ކުރެއްވި އެހެން ޓްވީޓެއްގައި ވިދާޅުވީ ސުޕްރީމް ކޯޓަށް އެ މައްސަލަ ހުށަހެޅުއްވި ހުށަހެޅުއްވުމަކީ ރާއްޖޭގެ ޑިމޮކްރަސީ ފުނޑާލަން ބަންޑާރަ ނައިބު މުހައްމަދު އަނިލް ކުރައްވާ މަސައްކަތެއް ކަމަށެވެ.
މަޖިލީހުގެ މެޖޯރިޓީއަކީ 43 މެމްބަރުންނެވެ. ނަމަވެސް މަޖިލީހުގެ އިތުބާރު ނެތްކަމުގެ މައްސަލަ އަށް ފަހު ޕީޕީއެމްގެ ގިނަ މެމްބަރުންތަކެއް އެ ޕާޓީ ދޫކުރެއްވުމުން، ޕީޕީއެމް ކޯލިޝަންގެގެ މެމްބަރުންގެ އަދަދު 41 މެމްބަރުންނަށް ވަނީ ވެއްޓިފަ އެވެ.
