ރެއާލް މެޑްރިޑްގެ ވިނީޝިއަސް ޖޫނިއަރއަށް ނަސްލީ ތަފާތުކުރުމާއި ފުރައްސާރަކުރުމުގެ މައްސަލާގައި ހަތް މީހަކު ހައްޔަރުކޮށްފިއެވެ.
އާދިއްތަ ދުވަހު ވެލެންސިއާ މެޗުގައި ސަޕޯޓަރުން ފުަރައްސާރަކުރުމާ ގުޅިގެން އެ މައްސަލަ މިހާރުވަނީ ވަރަށް ބޮޑުވެފައެވެ. ރެއާލް މެޑްރިޑުންނާ ބްރެޒިލުން އެ މައްސަލަ ޖައްސާއިރު، ސެޕެނިޝް ފުޓުބޯޅަ ފެޑެރޭޝަނުން ވަނީ އެ މައްސަލަ އިތުރަށް ބަލަން ނިންމާފައެވެ.
ވިނީޝިއަސްއަށް ފުރައްސާރަކުރި މައްސަލާގައި އަންގާރަ ދުވަހު ފުރަތަމަ ހައްޔަރުކުރީ ހަތަރު މީހެކެވެ. އެއީ ޖެނުއަރީ މަހު ރެއާލް މެޑްރިޑްގެ ޓްރެއިނިންގ ގްރައުންޑުގެ ބޭރުގައި ހުރި ބްރިޖެއްގައި ވިނިޝިއަސް ޖޫނިއާގެ 20 ނަންބަރު ޖާރޒީ ލައްވާފައި ބުދެއް އެލުވި މައްސަލާގައެވެ. ސްޕެއިންގެ ފުލުހުން ބުނީ މި ހަތަރު މީހުންނަކީ ނަފްރަތުގެ ކުށެއް ކަމަށް ތުހުމަތުކުރެވޭ ކުށެއްގެ ޒިންމާ އުފުލަން ޖެހިދާނެ ބައެއް ކަމަށެވެ. އޭގެ ތެރެއިން ތިން މީހުންނަކީ މީގެކުރިންވެސް ދަނޑަށް ގޮަސް ހަމަނުޖެހުން ހިންގަން މަސައްކަތްކޮށްފައިވާ ބައެކެވެ.
ހަތަރު މީހުން ހައްޔަރުކުރިފަހުން ފުލުހުން ވަނީ އިތުރު ތިން މީހަކު ހައްޔަރުކޮށްފައެވެ. އެއީ ވެލެންސިއާ މެޗުގައި ނަސްލީ ފުރައްސާރަކުރި ތިން މީހުންނެވެ.
ނަސްލީ ތަފާތުކުރުމާ ދެކޮޅަށް ގިނަ އަދަދެއްގެ ކުލަބުތަކުންނާއި ކުޅުންތެރިން ދަނީ އަޑުއުފުލަމުންނެވެ.
