ދުނިޔޭގެ އެންމެ ކުރިއަރާފައިވާ ގައުމުތައް ގުޅިގެން އުފައްދާފައިވާ ޖީޓުވެންޓީ ގްރޫޕްގެ ބައްދަލުވުންތައް، ވަރުގަދަ ސަލާމަތީ ފިޔަވަޅުތަކާއެކު އިންޑިޔާގެ ކަޝްމީރުގައި ފަށައިފިއެވެ. މި ގޮތުން ވަރކިންގ ގްރޫޕްގެ ބައްދަލުވުންތައް ސްރީނަގަރުގައި ހޯމަ ދުވަހުން ފެށިގެން ބުދަދުވަހާ ހަމަޔަށް ކުރިޔަށް ދާނެއެވެ.

މި ބައްދަލުވުންތަކަކީ 2019ގެ ފަހުން އެސަރަހައްދުގައި ބޭއްވޭ އެންމެ ބޮޑު، ބައިނަލްއަގްވާމީ ބައްދަލުވުމެވެ. ޖީ ޓުވެންޓީގެ ގައުމުތަކުން 60ވަރަކަށް ޑެލިގޭޓުން މި ބައްދަލުވުންތަކުގައި ބައިވެރިވާނެކަމަށް ދަނީ ބެލެމުންނެވެ.

ޗައިނާއިންވަނީ ކަޝްމީރުގައި މިބައްދަލުވުންތައް ބޭއްވުމަށް ދެކޮޅުހަދާކަން ހާމަކޮށް، އަދި ބައްދަލުވުމުގައި ބައިވެރިނުވާނެކަމަށް ބުނެފައެވެ.

ކަޝްމީރުގެ މިލްކުވެރިކަމަށް އިންޑިޔާ އަދި ޕާކިސްތާނުން ދައުވާކުރެއެވެ. އަދި ކަޝްމީރުގެ ފުލް ކޮންޓްރޯލް ހޯދުމަށް އެ ދެ ގައުމުވަނީ ދެ ފަހަރު މަތިން ހަނގުރާމަވެސް ކޮށްފައެވެ. މިހާރުވެސް ކަޝްމީރު ކޮންޓްރޯލް ކުރަނީ ދެ ގައުމުން ދެފަޅިއެވެ.

އެޕްރިލްމަހު ޕާކިސްތާނުންވެސް ވަނީ ޖީ ޓުވެންޓީގެ ބައްދަލުވުންތައް ކަޝްމީރުގައި ބާއްވާތީ އެކަން ކުށްވެރިކޮށްފައެވެ. އަދި އެއީ ޒިންމާދާރުކަން ކުޑަ އަމަލެއްކަމަށް ސިފަކޮށްފައިވެއެވެ. ނަމަވެސް އިންޑިޔާއިން ބުނެފައިވަނީ ޖަންމޫ އެންޑް ކަޝްމީރަކީ އެގައުމުގެ ބައެއްކަމުން އެތަނުގައި ބައްދަލުވުން ބޭއްވޭނެކަމުގައެވެ.

އިންޑިޔާގެ ސަރުކާރުންނާއި އަދި މީޑިޔާގެ ބައެއް ފަރާތްތަކުން ވަނީ ކަޝްމީރުގައި ކުރިޔަށްދާ ޖީޓުވެންޓީގެ ބައްދަލުވުންތަކަކީ ވަރަށްވެސް ތާރީޚީ ބައްދަލުވުންތަކަކަށް ވެގެން ދާނެ ކަމަށް ބުނެފައެވެ. އަދި ބައްދަލުވުމުގެ ސަބަބުން ކަޝްމީރުގެ ތާރީޚާއި އަދި ރީތި ސަގާފީ އާދަކާދަތައް ދުނިޔެއަށް ހާމަވެގެން ދާނެކަމަށް ބުނެފައިވެއެވެ.

ކަޝްމީރުގެ އިންޑިޔާއިން ކޮންޓްރޯލްކުރާ ފަޅީގައި, ސަރުކާރާ ދެކޮޅު ހަތިޔާރުއެޅި ފަރާތްތަކުން އަންނަނީ 1989ން ފެށިގެން ހަމަލާތައް ދެމުންނެވެ. އިންޑިޔާއިން ބުނަނީ މިހަމަލާތައް ދެނީ ޕާކިސްތާނުގެ މަދަދާއެކު ކަމަށެވެ.

ބައްދަލުވުމަށް ތައްޔާރުވަމުން އައިއިރު އެ ސަރަހައްދުގައި ވަނީ ސެކިއުރިޓީ ޑްރިލްތަކާއި ފަރިތަކުރުންތައް ކުރިޔަށްގެންގޮސްފައެވެ.

ކުރިން އިންޑިޔާ ސަރުކާރުން ބުނެފައިވާގޮތުގައި ޖީޓުވެންޓީ ބައްދަލުވުމުގެ ތެރެއިން ޓުއަރިޒަމަށް ޚާއްސަ އިސްކަމެއް ދެވޭނެއެވެ. ޚާއްސަކޮށް ފިލްމް ޓުއަރިޒަމަށް އިސްކަންދީ އެސަހައްދު ފިލްމު ކުޅުމަށް މަގްބޫލު ތަނަކަށް ހެދުމަށް މަސައްކަތްތަކެއް ދަނީ ކުރެވެމުންނެވެ.

ޖީ ޓުވެންޓީގައި ހިމެނެނީ ދުނިޔޭގެ އެންމެ މުއްސަނދި 19 ގައުމުގެ އިތުރުން ޔޫރަޕިއަން ޔޫނިއަނެވެ. މި ގައުމުތަކުން މުޅިދުނިޔޭގެ އިކޮނޮމިކް އައުޓްޕުޓްގެ 85 އިންސައްތަ، އަދި ދުނިޔޭގެ އާބާދީގެ ތިންބައިކުޅަ ދެބައި ހިއްސާ ކުރެއެވެ.

ޖީ ޓުވެންޓީ ސަމިޓް ބޭއްވުމަށް ހަމަޖެހިފައިވަނީ ސެޕްޓެމްބަރުމަހު ވެރިރަށް ޑެލްހީގައެވެ.