ވެލެންސިއާ އިން ރެއާލް ބަލިކޮށްފި

ސްޕެނިޝް ލީގުގައި ވެލެންސިއާއާ ދެކޮޅަށް ކުޅުނު މެޗުން ވެސް ރެއާލް މެޑްރިޑު ބަލިވެއްޖެ އެވެ.

ވެލެންސިއާގެ ދަނޑުގައި އާދިއްތަ ދުވަހުގެ ރޭ ކުޅުނު މެޗުން ރެއާލް ބަލިވީ 1-0 އިންނެވެ. މިއީ މި ސީޒަނުގެ ލީގުގައި ރެއާލްގެ އަށް ވަނަ ބައްޔެވެ. ވެލެންސިއާ އިން މެޗުގެ ހަމައެކަނި ލަނޑު 33 ވަނަ މިނެޓުގައި ޖެހީ ޑިއޭގޯ ލޮޕޭޒް އެވެ. ލީގު ދިފާއު ނުކުރެވުނު ނަމަވެސް ކޯޗު ކާލޯ އަންޗެލޮޓީ ވަނީ މި މެޗުގެ ފުރަތަމަ 11 ގައި ވެސް މުހިންމު ކުޅުންތެރިން ހިމަނައިފަ އެވެ. އެގޮތުން ކެޕްޓަން ކަރީމް ބެންޒެމާ، ވިނީޝިއުސް ޖޫނިއާ، އައުރެލިން ޗުއަމިނީ، އެޑުއާޑޯ ކަމަވިންގާ، ފާލަންޑް މެންޑީ އަދި އެންޓޯނިއޯ ރޫޑިއާ ހިމެނެ އެވެެ. މެޗުގައި ލޫކާ މޮޑްރިޗް، ރޮޑްރީގޯ، ޓޯނީ ކްރޫސް، ފެޑެރިކޯ ވަލްވާޑޭ އަދި ޑެނީ ކަވަހާލް އަށް ފުރުސަތު ދިނީ ބެންޗުންނެވެ.

މި ސީޒަނުގެ ސްޕެނިޝް ލީގު ކާމިޔާބުކޮށްފައި ވަނީ ރެއާލާ ވާދަވެރި ބާސެލޯނާ އިންނެވެ. ރެއާލަށް ވަނީ މި ސީޒަނުގެ ޔުއެފާ ޗެމްޕިއަންސް ލީގު ކާމިޔާބު ކުރުމުގެ ފުރުސަތު ވެސް ގެއްލިފަ އެވެ. ޗެމްޕިއަންސް ލީގުގެ ސެމީ ފައިނަލުން އެ ޓީމު ކެޓީ މެންޗެސްޓަރ ސިޓީ އަތުން ބަލިވެގެންނެވެ.