އަތޮޅުތެރެ ތަރައްގީކުރުމުގެ ސިޔާސަތެއް ކުރީ ސަރުކާރުތަކުން ނުގެންގުޅޭ: އިއާދު
ކުރީ ސަރުކާރުގެ ސިޔާސަތުތައް މި ސަރުކާރުގެ ސިޔާސަތުތަކާ ވަރަށް ތަފާތު
ސްޓޭޓް މިނިސްޓަރު، މުހައްމަދު އިއާދު ހަމީދު
އަތޮޅުތެރެ ތަރައްގީކުރުމުގެ ސިޔާސަތަކީ މީގެ ކުރީގެ ސަރުކާރުތަކުން އެހާ ބޮޑަށް އިސްކަންދީފައިވާ ސިޔާސަތެއް ނޫންކަމަށް, އިކޮނޮމިކް މިނިސްޓްރީގެ ސްޓޭޓް މިނިސްޓަރު، މުހައްމަދު އިއާދު ހަމީދު ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަފުޅުދައްކަވަމުން އިއާދު ވިދާޅުވީ، މި ސަރުކާރުގެ އިގްތިސާދީ ސިޔާސަތުތަކާއި، ތަރައްގީއާ ގުޅުންހުރި ސިޔާސަތުތައް ކުރީގެ ސަރުކާރުތަކުގެ ސިޔާސަތުތަކާ އަޅައިކިޔާއިރު ވަރަށް ބޮޑުތަން ތަފާތު ކަމަށެވެ. މިގޮތުން އަތޮޅުތެރެ ތަރައްގީކުރަން މި ސަރުކާރުން ގެންގުޅޭ ސިޔާސަތަކީ އެންމެ ބޮޑަށް ފާހަގަކޮށްލެވޭ ސިޔާސަތުކަމަށް އިއާދު ވިދާޅުވިއެވެ.
އަތޮޅުތެރޭގައި ވަރުގަދަ އިގްތިސާދުތަކެއް ބިނާކުރެވިދާނެކަމަށް އެ ސަރުކާރުތަކުން ގަބޫލުކޮށްފައި ނުވާކަމަށާއި، އަތޮޅުތެރޭގައި ތަރައްގީގެ މަޝްރޫއުތައް ހިންގާފައި ނުވާކަމީ މިކަމުގެ ހެތްކެެއްކަމަށް އިއާދު ވިދާޅުވިއެވެ. އެއާ ޚިލާފަށް މި ސަރުކާރުން ދަނީ އަތޮޅުތެރޭގައި މަޝްރޫއުތައް ހިންގުމަށް ޚާއްސަ އިސްކަމެއް ދެމުންކަން އޭނާ ފާހަގަކުރެއްވިއެވެ.
އިއާދު ވިދާޅުވީ ކުރީގެ ސަރުކާރުތަކުން އޮތީ ކުދި ރަށްރަށް އެކަހެރިކޮށްފައި ކަމަށެވެ. ކުދި ރަށްރަށް ބާކީކޮށްގެން ތަރައްގީގެ ކަންކަން ކުރިއަށްގެންގޮސްފައި ވާކަމަށާއި، ނަމަވެސް ރައީސް ސާލިހުގެ ސިޔާސަތަކީ، ކުޑަ ރަށެއް ބޮޑު ރަށެއްް ތަފާތުކުރުމެއްނެތި ހުރިހާ ރަށެއްގައިވެސް ތަރައްގީގެ މަޝްރޫއުތައް ކުރިށްގެންދިއުންކަން އިއާދު ފާހަގަކުރެއްވިއެވެ.
މިގޮތުން، ރާއްޖޭގެ ހުރިހާ ރަށެއްގައި އެންމެ އަސާސީ ޚިދުމަތްތަކުން ފެށިގެން ތަރައްގީއަށް ބޭނުންވާ ބޮޑެތި ޚިދުމަތްތައްވެސް ގާއިމްކުރެވެމުންދާކަމަށް އިއާދު ވިދާޅުވިއެވެ.
