ކުއްޖެއްގެ ފަރާތުން އަހުލާގީ މައްސަލައެއް ފާހަގަކުރެވިއްޖެނަމަ ސިސްޓަމްގެ ބޭރުން ހައްލުކުރަން މަސައްކަތް ކުރަންޖެހޭ
21 މެއި 2023 | އާދީއްތަ 12:53ކުދިންނަކީ ހުރިހާ ގޮތަކުން ޚާއްސަ ބައެއް
ފަސްކާފު ޕްރޮގްރާމްގެ ތެރެއިން
ކުޑަކުއްޖެއްގެ ފަރާތުން އަހުލާގީ މައްސަލައެއް ފާހަގަކުރެވިއްޖެނަމަ އެ މައްސަލައެއް ސިސްޓަމްގެ ބޭރުން ހައްލު ކުރުމަށް މަސައްކަތް ކުރަންޖެހޭ ކަމަށް ޑިޕާޓްމަންޓް އޮފް ޖުވެނައިލް ޖަސްޓިސްއިން ބުނެފިއެވެ.
ރާއްޖެޓީވީގައި ވާހަކަދައްކަވަމުން އެޑިޕާޓްމަންޓްގެ ޑިރެކްޓަރު ހައްވާ ޒިމްނާ ވިދާޅުވީ ކުދިންނަކީ ހުރިހާ ގޮތަކުން ޚާއްސަ ބައެއް ކަމަށާއި، މާދަމާގެ މުސްތަގުބަލް ކަމަށެވެ.
ހުށަހެޅޭ މައްސަލަތަކަށް އިޝާރާތް ކުރައްވައި ޒިމްނާ ވިދާޅުވީ ކުއްޖެއްގެ ފަރާތުން އަހުލާގީ މައްސަލައެއް ފާހަގަކުރެވިއްޖެނަމަ ކަމާގުޅޭ ފަރާތްތަކާއި ވާހަކަދައްކައިގެން މައްސަލަ ހައްލު ކުރުމަކީ ވަރަށް މުހިންމު ކަމެއް ކަމަށެވެ. އަދި އެމައްސަލައެއްގެ ވާހަކަ ކަމާނުގުޅޭ ބަޔަކާ ހިއްސާކޮށް، އެކުއްޖާ ބޭޒާރުވާ ގޮތްގޮތަށް އަމަލުކުރުމަކީ ކޮށްގެންވާނެ ކަމެއް ނޫން ކަމަށް އޭނާ ވިދާޅުވިއެވެ.
ޒިމްނާ ވިދާޅުވީ ކުދިންނާއި ގުޅުންހުރި ކަންކަމުގައި ސިސްޓަމްގެ ބޭރުން ހައްލު ކުރުމަށް ވަރަށް ބޮޑަށް ބާރުއަޅާ ކަމަށެވެ. އަހުލާގީ މައްސަލައެއް ފާހަގަކުރެވުމުން ކުދިން ވަގުތުން ވަގުތަށް ކުށްވެރިއަކަށް ހަދަންނުޖެހޭ ކަމަށާއި، ކުއްޖާ ލޭބަލް ނުވާނެ ގޮތަކަށް އަމަލުކުރަންޖެހޭ ކަމަށް ޒިމްނާ ވިދާޅުވިއެވެ. އަދި ވިދާޅުވީ އެ މައްސަލައެއް ދިމާވުމުން އެކުއްޖަކަށް އުނިވަނީ ކޮންކަމެއްތޯ ބަލައި އޮޅުފިލުވަންޖެހޭ ކަމަށެވެ.
ޒިމްނާ ވިދާޅުވީ ކުދިންގެ ފަރާތުން ފެންނަ އަހުލާގީ މައްސަލަތަކުގައި ތިމާގެ ދަރިފުޅު ނޫން ކަމުގައި ވިޔަސް ތިމާގެ ދަރިފުޅާއި މެދު ކަންތައް ކުރާ ގޮތަށް ނުވަތަ އެއަށްވުރެ ވެސް ރަނގަޅަށް ކުދިންނާއި މެދު އަމަލުކުރަންޖެހޭ ކަމަށެވެ. އެކުއްޖަކަށް ހެޔޮ ނަސޭހަތްދީ، އެކުދިންނަށް ހުރިހާ ގޮތަކަށް ހިމާޔަތާއި ލޯބީދީގެން މައްސަލަ ހައްލު ކުރުމަށް މަސައްކަތް ކުރަންޖެހޭ ކަމަށް އޭނާ ވިދާޅުވިއެވެ.
