ސޫދާންގައި 7 ދުވަހަށް ހަމަލާ ބަދަލުކުރުން ހުއްޓާލުމަށް އެއްބަސްވެއްޖެ

ސޫދާންގައި މިހާރު ކުރަމުންދާ ދާހިލީ ހަނގުރާމާގައި ހަތް ދުވަހަށް ހަމަލާ ބަދަލުކުރުން ހުއްޓާލުމަށް އެއްބަސްވެއްޖެއެވެ.

ސޫދާންގެ އަސްކަރިއްޔާ އާއި އެގައުމުގެ ހަނގުރާމަވެރި ޖަމާއަތް، ރެޕިޑް ސަޕޯޓް ފޯރސެސް (އާރްއެސްއެފް) އާދެމެދު ހަނގުރާމަ ފަށާފައި ވަނީ އޭޕްރިލް 15 ވަނަ ދުވަހުއެވެ. ހަނގުރާމަ ހުއްޓުމެއްނެތި ކުރިއަށްދާތާ އެއް މަސް ދުވަހަށް ވުރެ ގިނަ ދުވަސްވެގެން ދިޔަ އިރުވެސް، ހަނގުރާމަ އެއްކޮށް ހުއްޓާލުމުގެ މަޝްވަރާތަކެއް ނުކުރެވެއެވެ. ނަމަވެސް މިހޮނިހިރު ދުވަހު ސޫދާން އަސްކަރިއްޔާ އާއި އާރްއެސްއެފް އާ ދެމެދު ވަނީ ހަތް ދުވަހަށް ހަމަލާ ބަދަލުކުރުން ހުއްޓާލުމަށް އެއްބަސްވުމެއްގައި ސޮއިކޮށްފައެވެ.

މިއެއްބަސްވުމަށް އަމަލުކުރަން ފަށާނީ ހޯމަ ދުވަހުގެ ރޭ ސުދާންގެ ގަޑިން 09:45ން ފެށިގެން ކަމަށް މިއެއްބަސްވުމުން އެކުލަވާލުމުގައި މެދުވެރިއެއްގެ ދައުރު އަދާކުރަމުންދާ އެމެރިކާ އާއި ސައުދީ އަރަބިއާ ގުޅިގެން ނެރުނު ބަޔާނުގައި ވަނީ ބުނެފައެވެ.

މީގެކުރިން މިގޮތަށް އެއްބަސްވެ ސޮއިކުރެވުނު އެއްބަސްވުންތަކާ ހިލާފުވިތަން ފެނިގެން ދިޔަނަމަވެސް، މިފަހަރުގެ އެއްބަސްވުމާ އެއްގޮތަކަށް އަމަލުކުރޭތޯ ބެލުމުގެ މަސައްކަތް އެމެރިކާ އާއި ސައުދި އަރަބިއާ ބައިނަލްއަގުވާމީ އެހެން ފަރާތްތަކާއެކު ކުރާނެކަމަށް އެމެރިކާ އާއި ސައުދީ އަރަބިއާ ގުޅިގެން ނެރުނު ބަޔާނުގައި ވަނީ ބުނެފައެވެ.

ހޮނިހިރު ދުވަހު ސޮއިކުރެވިގެންދިޔަ އެއްބަސްވުމުގެ ދަށުން އާންމުންނަށް ބޭނުންވާ އިންސާނީ އެހީތެރިކަން ފޯރުކޮށްދީ ޒަރޫރީ ޚިދުމަތްތައް އާންމުންނަށް ލިބޭނެ މަގުފަހިކޮށްދިނުން ހިމެނެއެވެ. އަދި ހޮސްޕިޓަލްތަކާއި އާންމުންނަށް ޒަރޫރީ ޚިދުމަތްތައް ފޯރުކޮށްދޭ އެހެނިގެން ތަންތަނުގައި ހަރަކާތްތެރިވަމުންދާ ހަނގުރާމަވެރިން އެތަންތަނުން ދިއުމަށްވެސް އެއްބަސްވުމުގައި ހިމަނާފައިވެއެވެ.