ދުނިޔެއަކީ އެއަށްޓަކައި އަރާރުންވާންޖެހޭ ވަރުގެ އަގުހުރި ތަނެއް ނޫން، ރުޅިމަތަ ކުރޭ: ޚުތުބާ

ރުޅިމަތަ ކުރަންޖެހޭ ކަމަށާއި، ދުނިޔެއަކީ އެއަށްޓަކައި އަރާރުން ވާންޖެހޭ ވަރުގެ އަގުހުރި ތަނެއް ނޫން ކަމަށް ހުކުރު ޚުތުބާގައި ބުނެފިއެވެ.

''ރުޅިމަތަކުރުމުގެ ޖަޒާއަކީ ސުވަރުގެއެވެ'' މިމައުޟޫއަށް ރާއްޖޭގެ އެކިކަންކޮޅުތަކަށް އިއްވި ހުކުރު ޚުތުބާގައި ބުނީ ރުޅިމަޑުކަމަކީ މާތް ﷲ ލޯބިވެ ވޮޑިގަންނަވާ އަދި އެކަލާނގެ ރަސޫލާ ލޯބިފުޅުވާ ސިފައެއް ކަމަށެވެ. ނަމަވެސް މިހާރު ރުޅި މަޑުކަމުގެ ރީތި ނަމޫނާ ނުފެންނަ ކަމަށާއި، ފެންނަނީ ބަދަލު ހިފުމުގެ ރޫހު ކަމަށް ޚުތުބާގައި ބުނެފައިވެއެވެ.

ޚުތުބާގައި ބުނީ ގަނެ ވިއްކުމުގެ މުއާމަލާތާއި، އެކުވެރިކަމާއި އަވަށްޓެރި ކަމުގައި ރުޅިއިސްކޮށްގެން ނުވާނެ ކަމަށެވެ. އެމީހުން އަވަދިނެތިވެ އުޅެން ޖެހޭނީ އިސްލާމް ދީނަށްޓަކައިކަން ފާހަގަކޮށް ޚުތުބާގައި ބުނީ ދުނިޔެއަކީ އެއަށްޓަކައި އަރާރުން ވާންޖެހޭ ވަރުގެ އަގުހުރި ތަނެއް ނޫން ކަމަށާއި، މާތް ﷲގެ ހަސްރަތުގައި އެއީ މަދިރިއެއްގެ ފިޔައަކަށްވުރެ އަގު ދަށްތަނެއް ކަމަށެވެ.

ޚުތުބާގައި ބުނީ ރަހްމާންވަންތަ ރަސްކަލާނގެ އަޅުންގެ ގާތަށް ރުޅި ވެސް އަންނާނެ ކަމަށާއި، ރުޅި އަންނަންވީ ﷲ އަށްޓަކައި ކަމަށެވެ. އަދި ރުޅި މަތަކުރުން މިހާ މުހިންމު ކަމަކަށް ނުވާނަމަ އޭގެ ޖަޒާއަކަށް ސުވަރުގެ ނުވީސްކަމަށް ޚުތުބާގައި ބުނެފައިވެއެވެ.

މީގެ އިތުރުން ތަގްވާވެރީންނަކީ މާތް ﷲގެ ހަސްރަތުގައި މަތިވެރި މަގާމެއް ލިބިފައިވާ ބައެއް ކަމަށާއި، މާތް ﷲ އަށް ހައްގު ގޮތުގައި ތަގްވާ ވެރިވުމަށް ޚުތުބާގައި ވަނީ ނަސޭހަތްތެރިވެފައިވެއެވެ.

ޚުތުބާގައި ބުނީ ކީރިތި ރަސޫލާއަކީ އެކަލޭގެފާނުގެ ޝަޚްސީ އެއްވެސް ކަމެއްގައި ކޯފާ އިސްކުރެއްވި ބޭކަލެއް ނޫން ކަމަށެވެ. އެހެންކަމުން ރަހްމާންވަންތަ ރަސްކަލާނގެ އަޅުންގެ ނަމޫނާއަކަށް ރަސޫލާއަށް ބެލުމަށްފަހު އެގޮތަށް އަމަލުތައް ގެންގުޅެ، ރުޅިވެރިކަމާއި ދުރުވުމަށް ޚުތުބާގައި ވަނީ ގޮވާލާފައެވެ.