ފިކުރެއްގެ ދިރުމުގެ ނަމުގައި އައު ސިޔާސީ ޕާޓީއެއް އުފައްދަނީ
އަންނަ ހަފްތާގައި ޕާޓީ ރަޖިސްޓްރީ ކުރުމަށް އިލެކްޝަންސް ކޮމިޝަނަށް ހުށަހަޅާނެ
އެމްޑީޕީން ވަކިވި މެމްބަރުންތައް ބޭއްވި ނޫސްވެރިންގެ ބައްދަލުުވުމުގެ ތެރެއިން
ފިކުރެއްގެ ދިރުމުގެ ނަމުގައި އައު ސިޔާސީ ޕާޓީއެއް އުފެއްދުމަށް ނިންމައިފިއެވެ.
އެމްޑީޕީން ވަކިވި މެމްބަރުންތައް ބުދަ ދުވަހު ބޭއްވި ނޫސްވެރިންގެ ބައްދަލުވުމެއްގައި ގަލޮޅު އުތުރު ދާއިރާގެ މެންބަރު އީވާ އަބްދުﷲ ވިދާޅުވީ އެޕާޓީ އުފައްދަން ނިންމާފައިވަނީ ވަރަށް ބޮޑު އުންމީދަކާއެކު ކަމަށެވެ. އެމްޑީޕީން ވަކިވެ، އައު ސިޔާސީ ޕާޓީއެއް އުފެއްދުމަށް ނިންމީ މިހާރު އޮތް އެމްޑީޕީ އަކީ އަސާސްތަކުގެ މައްޗަށް އޮތް ޕާޓީއެއް ނޫން ކަމަށް ވާތީ ކަމަށް ވިދާޅުވިއެވެ.
ނޫސްވެރިންގެ ބައްދަލުވުމުގައި ވާހަކަ ދައްކަވަމުން ހުޅުދޫ ދާއިރާގެ މެމްބަރު އިލްޔާސް ލަބީބް ވިދާޅުވީ އަންނަ ހަފްތާގައި ޕާޓީ ރަޖިސްޓްރީ ކުރުމަށް އިލެކްޝަންސް ކޮމިޝަނަށް ހުށަހަޅުއްވާނެ ކަމަށެވެ. އަދި ފިކުރެއްގެ ދިރުމުގެ ކެންޑިޑޭޓަކު ރިޔާސީ އިންތިޚާބުގައި ވާދަކުރައްވާނެ ކަމަށް ވެސް ވިދާޅުވިއެވެ.
ނޫސްވެރިންގެ ބައްދަލުވުމުގައި އީވާ ވެސް ވަނީ އެކަން ތަކުރާރު ކުރައްވައިފައެވެ. އޭނާ ވިދާޅުވީ އެ ޕާޓީން އެކުގައި މަސައްކަތް ކުރެވޭނެ ޕާޓީތަކާއެކު މަޝްވަރާ ކުރާނެ ކަމަށާއި އަދި، ރިޔާސީ ކެންޑިޑޭޓަކު ހޮވަން ފިކުރެއްގެ ދިރުމުން ޕްރައިމަރީއެއް ބާއްވާނެ ކަމަށް ވެސް ވިދާޅުވިއެވެ.
މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އަދި އެމްޑީޕީން ވަކިވެވަޑައިގެންފައެއް ނުވެއެވެ. އެމްޑީޕީގެ އެތެރޭގައި ޚިޔާލުތަފާތުވުންތައް ހުރި ނަމަވެސް ވަކިވި މެމްބަރުން އެމްޑީޕީ އާއި ސަރުކާރާއި ދެކޮޅަށް ފާޅުގައި ފާޑުކިޔަން ފަށާފައި ވަނީ އެމްޑީޕީގެ ރިޔާސީ ޕްރައިމަރީ ނަޝީދަށް ނާކާމިޔާބުވި ހިސާބުން ފެށިގެންނެވެ. އެހިސާބުން މި މެމްބަރުން ވަނީ މަޖިލީހާއި މަޖިލީހުގެ ކޮމިޓީތަކުގެ އިތުރުން އެހެން ޕްލެޓްފޯމްތަކުގައި ވެސް ސަރުކާރަށް ވަރަށް ބޮޑަށް ފާޑުކިޔަން ފަށާފައެވެ.
