ރާއްޖޭގެ 15 އަތޮޅެއްގެ ހޮސްޕިޓަލާއި ސިއްހީ މަރުކަޒުތަކަށް ބޭނުންވާ ސަރޖިކަލް އިންސްޓްރުމެންޓް ހަދިޔާކޮށްފިއެވެ.

ބުދަ ދުވަހު ހެލްތު މިނިސްޓްރީގައި ބޭއްވި ޚާއްސަ ރަސްމިއްޔާތެއްގައި މިތަކެތި ހަވާލުކޮށްދެއްވީ ހެލްތު މިނިސްޓަރު އަހުމަދު ނަސީމެވެ.

މިރަސްމިއްޔާތުގައި ހެލްތު މިނިސްޓަރު ވިދާޅުވީ ސިއްހީ ދާއިރާ ކުރިއަރުވައި ތަރައްގީކުރުމަށް މިސަރުކާރުން ގިނަ މަސައްކަތްތައް ކުރަމުންދާ ކަމަށެވެ.

ހަވާލުކުރެވޭ ސަރޖިކަލް އިންސްޓްރުމެންޓަށް އިޝާރާތްކުރައްވައި މިނިސްޓަރު ވިދާޅުވީ، މިހާރު ހެލްތު ފެސިލިޓީތަކުގައި ހުރި މިފަދަ ގިނަ ތަކެއްޗަކީ މީގެ 13 އަހަރު ކުރިން ފޮނުވާފައިވާ ތަކެތި ކަމަށެވެ. އެހެންކަމުން ގިނަ ހެލްތު ފެސިލިޓީތަކުގައި ހުރި އިންސްޓްރުމެންޓުގެ ބޭނުން ނުހިފޭކަން މިނިސްޓަރު ފާހަގަކުރެއްވިއެވެ.

މީގެ އިތުރުން މިނިސްޓަރު ވިދާޅުވީ، އަތޮޅުތެރެއަށް ކުރާ ދަތުރުތަކުގައި ސިއްހީ ޚިދުމަތްތެރީންގެ ފަރާތުންވެސް ލިބޭ އެންމެ ބޮޑު އެއް ޝަކުވާއަކީ ޚިދުމަތް ދިނުމަށް ބޭނުންވާ އިންސްޓްރުމެންޓް އެކަށީގެންވާވަރަށް ނެތުމާއި، ހަލާކުވެ ބައުވެފައިވާކަމުގެ ޝަކުވާ ކަމަށެވެ. އަދި މިފަދަ ކަންކަމުގެ ސަބަބުން ޚިދުމަތް ދިނުމަށް ދަތިވާކަމަށާއި، މިކަން ފާހަގަވެފައިވާތީ، ވަކިވަކި ރަށްރަށަށް ތަކެތި ހަމަކޮށްދިނުމުގެ ބަދަލުގައި، ހެލްތު މިނިސްޓްރީން ބަލަހައްޓާ ހުރިހާ ހެލްތު ފެސިލިޓީއަކަށް ތަކެތި ހަމަކޮށްދިނީ ކަމަށް މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ ސަރޖިކަލް އިންސްޓްރުމެންޓް ހެލްތު ފެސިލިޓީތަކަށް ލިބުމުން ރައްޔިތުންނަން ޚިދުމަތް ދިނުމުގައި އަވަސްވެ، ޚިދުމަތުގެ ފެންވަރު ކުރިއަށްވުރެ ރަނގަޅުވާނެ ކަމަށެވެ. އަދި މިހާރު މިކަމުގައި ހެލްތު ފެސިލިޓީތަކަށް ދިމާވެފައިވާ މެޑިކަލް އިންސްޓްރުމެންޓް މައްސަލަ ނިމުމަކަށް އަންނާނެ ކަމަށް މިނިސްޓަރު ވިދާޅުވިއެވެ.

ހެލްތު މިނިސްޓްރީގެ ފަރާތުން ސަރޖިކަލް އިންސްޓްރުމެންޓް ހަދިޔާކޮށްފައިވަނީ؛ ހއ އަތޮޅު ހޮސްޕިޓަލް، ށ އަތޮޅު ހޮސްޕިޓަލް، ނ އަތޮޅު ހޮސްޕިޓަލް، ބ އަތޮޅު ހޮސްޕިޓަލް، ޅ އަތޮޅު ހޮސްޕިޓަލް، ކ ތުލުސްދޫ ހޮސްޕިޓަލް، އއ އަތޮޅު ހޮސްޕިޓަލް، އދ އަތޮޅު ހޮސްޕިޓަލް، ވ އަތޮޅު ހޮސްޕިޓަލް, މ މުލީ ރީޖަނަލް ހޮސްޕިޓަލް، ފ އަތޮޅު ހޮސްޕިޓަލް، ދ އަތޮޅު ހޮސްޕިޓަލް، ތ އަތޮޅު ހޮސްޕިޓަލް، ގއ އަތޮޅު ހޮސްޕިޓަލް އަދި ފުވައްމުލައް ސިޓީގެ ހޮސްޕިޓަލަށެވެ.

ހަދިޔާކުރި ސާމާނުގެ ތެރޭގައި، ޑްރެސިންގ ސެޓް، ބޭބީ ސެޓް، ޑެލިވަރީ ސެޓް، ޝޭޗާރ ސެޓް، އިންސިސަން އެންޑް ޑްރެއިނޭޖް ސެޓް، އަދި އާރޓިކަލް ފޯރ ޑްރެސިންގ ރޫމް ސެޓް ހިމެނެއެވެ.