ދެ ދައުރު ރައީސް ސާލިޙަށް ވެސް ޙައްޤު، އެކަން "ހަލާކު ކުރުމަށް" އެމްޑީޕީގެ ތެރެއިން ނުކުމެގެން ނުވާނެ: ސަރަނގު އާދަމް މަނިކު
ޤައުމަށް މިހާރު ބޭނުންވަނީ ހަމަޖެހުމާއި އަމާންކަން
މާލޭގެ ފުރަތަމަ މޭޔަރު އަދި ވިޔަފާރިވެރިޔާ ސަރަނގު އާދަމް މަނިކު
ދެ ދައުރު ރައީސުލްޖުމްހޫރިއްޔާ އިބްރާހީމް މުޙައްމަދު ސާލިޙަށް ވެސް ޙައްޤު ކަމަށާއި، އެކަން "ހަލާކު ކުރުމަށް" އެމްޑީޕީގެ ތެރެއިން ނުކުމެގެން ނުވާނެކަމަށް މާލޭގެ ފުރަތަމަ މޭޔަރު އަދި ވިޔަފާރިވެރިޔާ ސަރަނގު އާދަމް މަނިކު ވިދާޅުވެއްޖެއެވެ.
ރާއްޖެޓީވީގެ ފަށާއިރު ޕްރޮގްރާމްގައި ވާހަކަދައްކަވަމުން އޭނާ ވިދާޅުވީ، އެއްވެސް ޙާލެއްގައި އެމްޑީޕީން އަދި އެމްޑީޕީގެ މެންބަރަކުވެސް ޕީޕީއެމްއާ ގުޅުމަކީ ޤަބޫލު ކުރެވޭ ކަމެއް ނޫން ކަމަށެވެ. އެއީ ފެންނާނެކަމަށް ބެލެވޭ މަންޒަރެއް ވެސް ނޫންކަމަށް އޭނާ ވިދާޅުވިއެވެ.
ޕީޕީއެމްއަށް ވެސް މިވަގުތު މުހިންމުވާނީ ކުރީގެ ރައީސް އަބްދުﷲ ޔާމީން މިނިވަން ކުރަން ކަމަށާއި، ޔާމީން މިނިވަން ނުވެއްޖެނަމަ އެ ޕާޓީންވެސް ފެންނާނީ ފެކްޝަންތަކެއްކަމަށް އޭނާ ވިދާޅުވިއެވެ.
ޤައުމަށް މިހާރު ބޭނުންވަނީ ހަމަޖެހުމާއި އަމާންކަން ކަން ފާހަގަކުރައްވައި އޭނާ އިތުރަށް ވިދާޅުވީ، ރައީސް ސާލިޙަށް ވެސް ދެ ދައުރު ޙައްޤު ކަމަށެވެ. އެކަން ހަލާކު ކުރުމަށް އެމްޑީޕީގެ ތެރެއިން ނުކުމެގެން ނުވާނެކަމަށް ވެސް އާދަމް މަނިކު ވިދާޅުވިއެވެ.
އެމްޑީޕީއަކީ އަބަދުވެސް ވަކި އަސާސްތަކެއްގެ މަތީގައި ދެމި އޮންނަ ޕާޓީއެއް ކަމަށާއި، ރައީސް ސާލިޙުގެ ވެރިކަމުގައި އަމާންކަމާއެކު ރައްޔިތުންނަށް އެބަ އުޅެވޭކަމަށްވެސް އާދަމް މަނިކު ވިދާޅުވިއެވެ.
