ވެރިކަމަށް އައި އިރު ކުންފުނިތައް ހުރީ ބަނގުރޫޓުވާ ހާލަތުގައި ކަމަށް ރައީސް ވިދާޅުވި
މޯލްޑިވްސް އިންޑަސްޓްރިއަލް ފިޝަރީޒް ކަމްޕެނީ ލިމިޓެޑް (މިފްކޯ)
ރައީސް ޑރ.މުހައްމަދު މުއިއްޒުގެ ވިސްނުންފުޅަކީ މިފްކޯ ހިންގަން ރާއްޖެއިން ބޭރުން ތަޖުރިބާކާރެއް ގެނައުންކަމަށް އެމަނިކުފާނު ހާމަކުރައްވައިފިއެވެ.
ރައީސް މުއިއްޒު އެކަން ހާމަކުރެެއްވީ މިނިވަން ދުވަހުގެ ރަސްމީ ޖަލްސާގައި ވާހަކަދައްކަވަމުންނެވެ. މި ސަރުކާރުން ވެރިކަމަށް އައި އިރު ކުންފުނިތަކުގެ ހާލަތު އޮތީ ވަރަށް ގޯސް ހާލަތެއްގައި ކަމަށް އެމަނިކުފާނު ވިދާޅުވިއެވެ. ކުންފުނިތައް ހުރީ ބަނގުރޫޓުވާ ހިސާބުގައި ކަމަށް އެމަނިކުފާނު ވިދާޅުވިއެވެ. މި ސަރުކާރުން ވަނީ ކުންފުނިތައް ރިފޯރމްކުރުމަށް މަސައްކަތްކޮށްފައި ކަމަށާއި އެންމެ ބޮޑަށް ރިފޯމްކުރުމަށް މަސައްކަތްތަކެއް ކުރެވުނީ މިފްކޯގައި ކަމަށް އެ މަނިކުފާނު ވިދާޅުވިއެވެ. މިފްކޯ ވަކިން ހިންގާ ކުންފުންޏަކަށް ބަދަލުކުރީ ވެސް ކުންފުނީގެ ހިންގުން ހަރުދަނާކުރުމަށް ކަމަށް ރައީސް ވަނީ ވިދާޅުވެފައެެވެ.
ރައީސް ވިދާޅުވީ އެ ނިންމުން ނިންމީ ރާއްޖޭގެ އެ ދާއިރާގައި މަސައްކަތް ކުރާ އެއްވެސް މީހަކާއި ގުޅިފައި ނެތް ނުފޫޒެއް ނެތް މީހަކު އެ މަޤާމަށް އައްޔަންކުރުމަށް ކަަމަށެވެ. އެ ރަސްމިއްޔާތުގައި ވާހަކަދައްކަވަމުން ރައީސް ވަނީ މަސްވެރިންނަށް ދޭންޖެހޭ ފައިސާވެސް މިހާރު ދީފައިވާ ކަމަށް ވިދާޅުވެފައެވެ. އަދި ދުނިޔޭގެ މާރކެޓް އަގާއި ހަމައަށް މަހުގެ އަގު ގެނައުމުން ބައެއް ފަހަރު 28 ރުފިޔާ އަށް ވުރެ މަހުގެ އަގު ބޮޑުވާނެ ކަމަށާއި ބައެއް ފަހަރު މަހުގެ އަގު ކުޑަ ވާނެ ކަމަށް ވިދާޅުވިއެވެ. އެހެންކަމުން މަހުގެ އަގު ދުނިޔޭގެ މާރކެޓް ރޭޓުގައި ބެހެއްޓުމަކީ ރަނގަޅު ގޮތެއް ކަމަށް ރައީސް ވަނީ ސިފަކުރައްވާފައެވެ.
