20 އަހަރުން ދަށުގެ 100 މީޓަރު ދުވުމުގެ ޗެމްޕިއަންކަން ނަޖުދާން އަދި ލަޔާނާއަށް

ހުޅުމާލޭގައި މިހާރު ކުރިޔަށްދާ އިންޓަރ ސްކޫލް އެތުލެޓިކްސް މުބާރާތުގެ 100 މީޓަރު ދުވުމުގެ އިވެންޓުގެ ޗެމްޕިއަންކަން ސީއެޗްއެސްއީގެ އަހުމަދު ނަޖުދާން އަބްދުﷲ އަދި ދާންދޫ ސްކޫލުގެ އާމިނަތު ލަޔާނާ މުހައްމަދު ހޯދައިފިއެވެ.

20 އަހަރުން ދަށުގެ 100 މީޓަރު ދުވުމުގެ ފިރިހެން ބައި ނަޖުދާން ކާމިޔާބު ކުރީ މީޓް ރިކޯޑަކާއެކުގައެވެ. އެއީ 11.19 ސިކުންތު ތެރޭގައި ރޭސް ނިންމައިގެނެވެ. ދެވަނައިގަ ވާދަކުރި ގދ.އަތޮޅު ތައުލީމީ މަރުކަޒުގެ އިބްރާހިމް ނާހިލް ނިޒާރު 11.34 ސިކުންތުގައި ނިންމިއިރު، ތިން ވަނައިގައި 11.74 ސިކުންތާއެކު ނިންމީ ގައުމީ ޔުނިވަރސިޓީގެ ހުސައިން ހުސާން ހާލިދެވެ.

މި އިވެންޓުގެ އަންހެން ބައި ލަޔާނާ ކާމިޔާބުކުރީ މިދިޔަ އަހަރު އޭނާ ހެދި 12.99 ސިކުންތުގެ ސްކޫލް ރިކޯޑް މުގުރާލުމަށްފަހު، 12.85 ސިކުންތު ތެރޭގައި ނިންމައިގެނެވެ. ދެވަނައިގައި އައްޑޫ ހައި ސްކޫލްގެ އައިޝަތު ޝައިމް އަޒީޒު ނިންމިއިރު ތިންވަނައިގައި ނިންމީ ވިލާ ކޮލެޖުގެ އާމިނަތު ނުހާ ޒިޔާދެވެ.

މި އަހަރުގެ އިންޓަރ ސްކޫލް އެތުލެޓިކްސް މުބާރާތުގައި 47 ސްކޫލަކުން ޖުމްލަ 1500 އަށްވުރެ ގިނަ އެތުލީޓުން ބައިވެރިވެފައިވެއެވެ.