ކ.ތުލުސްދޫގައި ބޭއްވުމަށް ހަމަޖެހިފައިވާ އޭޝިއަން ސާފިން ޗެމްޕިއަންޝިޕް ރަސްމީކޮށް ލޯންޗުކޮށްފި އެވެ.

ހެންވޭރު ބޯޅަ ގޭގައި ބޭއްވި ޚާއްސަ ރަސްމިއްޔާތުގައި މި މުބާރާތް ރަސްމީކޮށް ލޯންޗުކޮށްދެއްވީ މިނިސްޓަރު އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަމަންޓް އަޙުމަދު މަޚްލޫފް އެވެ. އެ ރަސްމިއްޔާތުގައި ސާފިން އެސޯސިއޭޝަންގެ ރައީސް މުހައްމަދު ސޮބާހު (ޗޭ)، ޤާއުމީ ސާފިން ޓީމުގެ ކޯޗު ކްލައިޑް މާޓިންގެ އިތުރުން ޤައުމީ ޓީމުގެ ދެ އެތުލީޓުން ކަމަށްވާ، ހުސެއިން އަރީފް (އިބޫ) އަދި އަހުމަދު އާގިލް (އަންމަޑޭ) ވަނީ ބައިވެރިވެފަ އެވެ.

މި މުބާރާތް ތުލުސްދޫގައި ކުރިއަށް ގެންދިޔުމަށް ނިންމާފައި ވަނީ މިއަހަރުގެ ޖުލައި މަހުގެ އަށް ވަނަ ދުވަހުން، 17 ވަނަ ދުވަހަށެވެ. މި މުބާރާތުގައި ދުނިޔޭގެ އެކި ކަންކޮޅުތަކުން 200 އަށް ވުރެ ގިނަ އެތުލީޓުން / އޮފިޝަލުން ބައިވެރިވާނެ ކަމަށް ސާފިން އެސޯސިއޭޝަނުން އަންދާޒާކުރެ އެވެ. މުބާރާތް ކުރިއަށް ގެންދިޔުމަށް ހަމަޖެހިފަައި ވަނީ ތިން ކެޓަގަރީ އަކަށެވެ. އެއީ ޝޯޓް ބޯޑު މެންސް އަދި ޝޯޓް ބޯޑު ޖޫނިއާ އަދި އަންހެން ކެޓަގަރީ އެވެ. ތުލުސްދޫގައި މުބާރާތް ކުރިއަށް ގެންދިޔުމަށްޓަކައި ތުލުސްދޫ ސާފިން އެސޯސިއޭޝަނާއި، އެ ރަށު ކައުންސިލުން ދެއްވާ އެހީތެރިކަމާ އެއްބާރުލުން ސާފިން އެސޯސިއޭޝަނުން ވަނީ ފާހަގަކޮށްފަ އެވެ.

މުބާރާތް ލޯންޗު ކުރުމަށްފަހު ވާހަކަ ދައްކަމުން ސާފިން އެސޯސިއޭޝަންގެ ރައީސް ޗޭ ވިދާޅުވީ، މީގެ ކުރިން މާލެ އަށް ޚާއްސަކުރެވިފައި އޮތް ސާފިން އަޮޅު ތެރޭގެ ރަށްތަކަށް ގެންދިޔުމަށް އެ އެސޯސިއޭޝަނުން ޚާއްސަ ސަމާލުކަމެއް ދެއްވާ ކަމަށެވެ. އޭނާ ވިދާޅުވީ މުބާރާތް ތުލުސްދޫގައި ބޭއްވުމަށް ނިންމީ ވަރަށް ގިނަ ކަންކަމަށް ބެލުމަށް ފަހު ކަމަށެވެ. އެގޮތުން މުބާރާތުގައި ވާދަކުރާ ބައިނަލްއަޤުވާމީ އެތުލީޓުން ރާއްޖެ އައުމަށްފަހު އެ ހިސާބަށް ދިޔުމަށްޓަކައި ބޮޑު ޚަރަދެއް ކުރަން ޖެހޭ ކަމަށާއި، އެ ޚަރަދު ބޮޑުވުމަކީ އެތުލީޓުން ބައިވެރިވާ މިންވަރު މަދުވާނެ ސަބަބެއް ކަމަށެވެ. ހަމައެއާއެކު މުބާރާތުގައި ގިނަ ބަޔަކު ބައިވެރިވާއިރު، ބައިވެރިވާ އެންމެނަށް ބޭނުންވާ އެކޮމަޑޭޝަންގެ ކަންކަން ހަމަޖެއްސޭނެ ސަރަހައްދެއް ވެސް ބަލާފައިވާނެ ކަމަށް ޗޭ ފާހަގަ ކުރި އެވެ. މީގެ އިތުރުން ވޭވް ކޮންޑިޝަނާ އެހެނިހެން ކަންކަމަށް ބަލާއިރު ވެސް، އެ ސަރަހައްދާ މެދު އިތުރު ސުވާލު އުފައްދާނެ ޖާގައެއް ނޯންނާނެ ކަމަށް ޗޭ ވިދާޅުވި އެވެ.

މި މުބާރާތުގައި މެޑަލް ހޯދުމަށް އަމާޒު ހިފައިގެން ޤައުމީ ޓީމުން ފަރިތަކުރުންތައް ފެށީ މިއަހަރުގެ ފެބްރުވަރީ މަހު އެވެ. ރާއްޖެ އިން އަންނަނީ އޭޝިއަން މުބާރާތުގެ އިތުރުން، ބައިނަލްއަޤުވާމީ އެހެނިހެން މުބާރާތްތަކުން ވެސް މެޑަލް ހޯދުމަށް އަމާޒު ހިފައިގެން މަސައްކަތް ކުރަމުންނެވެ. އޭޝިއަން މުބާރާތުގެ އިތުރުން ރާއްޖެއިން މިއަަހަރު ބައިނަލްއަޤުވާމީ ދެ މުބާރާތެއްގައި ވާދަކުރާނެ އެވެ. އެއީ ވޯލްޑް ސާފިން ގޭމްސް އާއި އިންޑިއަން އޯޝަން އައިލެންޑް ގޭމްސް (އައިއޯއައިޖީ) އެވެ. އޭޝިއަން ސާފިން މުބާރާތުގައި ރާއްޖޭގެ 14 އެތުލީޓަކު ބައިވެރިވާނެ އެވެ. އެއީ މެންސް އޯޕަންގައި ވާދަކުރާ އަށް އެތުލީޓުންނާއި، ޖޫނިއާ ކެޓަގަރީގައި ވާދަކުރާ ހަ އެތުލީޓުންނެވެ. މީގެ އިތުރުން ހޯމް ބްރޭކް ވައިލްކާޑު ސްލޮޓު ދެ އެތުލީޓަކަށް ލިބޭނެ އެވެ. އެ ސްލޮޓު ލިބެނީ ހަމައެކަނި ތުލުސްދޫގެ ސާފަރުންނަށެވެ.