ޔުނައިޓެޑް ވިކްޓްރީގެ ވިސްނުން ހުރީ ޒުވާން ޓީމެއް ބިނާކުރުމަށް ކަމަށް، ދިވެހި ޕްރިމިއަރ ލީގުގައި ވާދަކުރާ ޔުނައިޓެޑް ވިކްޓްރީ (ޔޫވީ)ގެ ކޯޗު އަހުމަދު ޝާކިރު (ޝާކިއްޓެ) ބުނެފިއެވެ.

ހުކުރު ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ޝާކިއްޓެ ބުނީ، ޔޫވީގެ މެނޭޖްމެންޓުގެ ވިސްނުމަކީވެސް މިހާރު ތިބި ޒުވާން ކުޅުންތެރިން ބޭނުންކޮށްގެން، ޒުވާން ޓީމެއްގެ ގޮތުގައި ޔޫވީ ބިނާކުރުން ކަމަށެވެ. އަދި ޒުވާން ކުޅުންތެރިންނަށް ފުރުސަތު ގެއްލޭކަހަލަ ގޮތަކަށް ބޭރު ކުޅުންތެރިން ގެނައުމުގެ ވިސްނުމެއް ނެތްކަމަށް ޝާކިއްޓެ ބުންޏެވެ.

މި ސީޒަނުގައި ދިވެހި ޕްރިމިއަރ ލީގުގައި ވާދަކުރާ ގިނަ ޓީމުތަކުން ޒުވާން ކުޅުންތެރިންނަށް ފުރުސަތު ދޭކަމަށް ޝާކިއްޓެ ބުންޏެވެ. އަދި ޖުމްލަ ގޮތެއްގައި ގިނަ ޒުވާން ކުޅުންތެރިން ފަރާތުން ރަނގަޅު ކުޅުމެއް ފެންނަ ކަމަށް ބުންޏެވެ. ޝާކިއްޓެ އިތުރަށް ފާހަގަކުރީ، މީގެ ކުރިން ޒުވާން ގައުމީ ޓީމުތައް ފުރައިގެން ދާއިރު ކުލަބުގެ ފުރަތަމަ 11ގައި ކުޅެން ލިބޭ ފުރުސަތު މަދުވުމާ ގުޅިގެން އެންމެ އެދެވޭ ތަޖުރިބާ ނުލިބޭކަމަށެވެ. އެހެންނަމަވެސް، ޒުވާން ކުޅުންތެރިންނަށް ޕްރިމިއަރ ލީގުގައި އެންމެ ވަރުގަދަ ޓީމުތަކާއެކު ޕަރފޯމް ކުރަން ލިބުމަކީ ރާއްޖޭގެ ފުޓުބޯޅައިގެ މުސްތަގުބަލަށްވެސް، ގައުމީ ޓީމަށްވެސް، އަދި ޒުވާން ގައުމީ ޓީމުތަކަށްވެސް ލިބޭނެ ވަރަށް ބޮޑު ކުރިއެރުމެއްކަމަށް ޝާކިއްޓެ ބުންޏެވެ.

މާޒިޔާއާ ބައްދަލުކުރި މެޗާ ގުޅޭގޮތުން ސުވާލުކުރުމުން ޝާކިއްޓެ ބުނީ އެ މެޗުގައި ދިމާވީ ފިޓްނެސް މައްސަލަ ކަމަށެވެ. ގައިގައި ވަރު ހުރިއިރު ޓީމުގެ ފަރާތުން ވަރަށް ރަނގަޅު ކުޅުމެއް ފެނުނުކަން ފާހަގަކުރިއެވެ. ޝާކިއްޓެ އިތުރަށް ފާހަގަކުރީ، ޕްރިމިއަރ ލީގުގައި މާޒިޔާއާއި އީގަލްސް ފިޔަވައި, ހުރިހާ ޓީމެއްވެސް ފިޓްނެސްއާއި ކުޅުމަށް ބަލާއިރު ދާދި ހަމަހަމަ ކަމަށެވެ. އަދި މާޒިޔާ މެޗުގެ ކުޅުމަށް ބަލައި، ކުޅުންތެރިންނަށް އޮތް އިތުބާރު ބޮޑުވިކަމަށް ބުންޏެވެ.

މި ސީޒަނުގައި ޔޫވީއަކީ އެންމެ ގިނަ ޒުވާން ކުޅުންތެރިންނަށް ފުރުސަތު ދޭ އެއް ޓީމެވެ. ޔޫވީން ހޮނިހިރު ދުވަހު ހަވީރު ނިކުންނާނީ ސަސްއާ ދެކޮޅަށެވެ. މި މެޗު ފެށުމަށް ހަމަޖެހިފައިވަނީ 16:00ގައެވެ.