ފަރިތަކުރުންތަކުގައި މާޒިޔާ ސްޕޯޓްސް އެންޑް ރެކްރިއޭޝަންގެ ކުޅުންތެރިން ސީރިއަސް ކަމަށާއި، ނަމަވެސް ދަނޑުމަތިން އެކަން ނުފެންނަކަމަށް, އެ ޓީމުގެ ކޯޗު އިވާން ވެންކޯވް ކޮލޭވް ބުނެފިއެވެ.

އިވާން މިހެން ބުނީ ދިވެހި ޕްރިމިއާ ލީގުގައި މާޒިޔާގެ ދެވަނަ މެޗުގައި ކުލަބު ގްރީން ސްޓްރީޓްސްއާ ދެކޮޅަށް ނިކުތުމުގެ ކުރިން އޮތް ޕްރެސް ކޮންފަރެންސްގައެވެ. އޭނާ އިޝާރާތްކުރީ މާޒިޔާގެ ފުރަތަމަ މެޗުގައި ޔުނައިޓެޑު ވިކްޓްރީ (ޔޫވީ)އާ ދެކޮޅަށް ކުޅުނު މެޗަށެވެ. އިވާން ބުނީ އެ މެޗުގައި މާޒިޔާގެ ކުޅުންތެރިން އިދިކޮޅު ޓީމު "އަންޑަރޭޓު" ކުރީ ކަމަށާއި، ފުރަތަމަ ހާފު ނިމުނުއިރު 2-2ން ނަތީޖާ އެއްވަރުވެފައި އޮތީ އެ ސަބަބަށްޓަކައި ކަމަށެވެ. އިވާން ބުނީ އެއީ ވަރަށް ނުރައްކާތެރި ކަމެއް ކަމަށެވެ. އޭނާ ފާހަގަކުރިގޮތުގައި އޭގެފަހުން މާޒިޔާއިން ކުރިއަށްގެންދިޔަ ފަރިތަކުރުންތަކުގައި ކުޅުންތެރިންނާ އެ ވާހަކަ ވަރަށް ސީރިއަސްކަމާއެކު ދައްކާފައިވާނެއެވެ. އެކަން ފާހަގަކުރަމުން އިވާން ބުނީ ޕްރޮފެޝަނަލް ކުޅުންތެރިން އަބަދުވެސް ފުޓުބޯޅަ ކުޅެން ވާނީ ވަރަށް ސީރިއަސްކަމާއެކު ކަމަށެވެ. ހަމައެއާއެކު އެ ކުޅުންތެރިޔަކު އެމީހަކަށް ޖެހޭ ޓާސްކެއް ދަނޑު މަތީގައި ފުރިހަމަ ކުރަންޖެހޭނެ ކަމަށްވެސް އޭނާ ބުންޏެވެ.

މީގެ އިތުރުން އިވާން ބުނީ ކުޅުންތެރިން އަބަދުވެސް އިދިކޮޅަށް ކުޅެން އޮތީ ކޮން ފެންވަރެއްގެ ޓީމެއްކަން ބަލަން ނުޖެހޭނެ ކަމަށެވެ. އެ ވާހަކަ އިވާން ދެއްކީ ސްޕެއިންގެ ބާސެލޯނާއާއި ރެއާލް މެޑްރިޑަށް އިޝާރާތްކޮށެވެ. އޭނާ ބުނީ އިދިކޮޅަށް ކުޅެންޖެހޭ ޓީމަކީ "ކުޑަކުދިން"ތަކަކަށް ވެސް ވެދާނެކަމަށާއި، ނޫންނަމަ ބާސެލޯނާ ނުވަތަ ރެއާލަށްވެސް ވެދާނެ ކަމަށެވެ. ނަމަވެސް އެއިން ކޮންމެ ޓީމަކާ ދެކޮޅަށްވެސް ކުޅުންތެރިން ކުޅެންޖެހޭނީ އެއް ރޫހެއްގައި، އެއް ހިތްވަރެއްގައިކަން އޭނާ ވަނީ ފާހަގަކޮށްފައެވެ. ސަބަބަކީ ކޮންމެ ޓީމަކާ ދެކޮޅަށްވެސް ކުޅެންޖެހޭނީ މެޗު ކަމަށާއި، އެ މެޗުގައި ކުޅުންތެރިންގެ ފެންވަރާއި، ހުނަރު ދައްކަން ވިސްނުމުގައި ބަހައްޓަން ޖެހޭނެ ކަމަަށް އޭނާ ވަނީ ބުނެފައެވެ.

މީގެ އިތުރުން އިވާން ބުނީ އޭއެފްސީ ކަޕަކީ މާޒިޔާއިން ހާސިލްކުރަން ބޭނުންވާ ލަނޑު ދަނޑިއެއް ކަމަށެވެ. އެހެންކަމުން އެކަން ހާސިލްކުރުމަށް ތައްޔާރުވާން ޖެހޭނެ ކަމަށްވެސް އޭނާ ބުންޏެވެ. އެގޮތުން އެކަން ހާސިލްކުރުމަށްޓަކައި އެންމެ ފުރަތަމަ ކުރަން ޖެހޭނެ ކަމަކީ މެންޓާލިޓީ ބަދަލުކުރުންކަން އިވާން ވަނީ ފާހަގަކޮށްފައެވެ. އެގޮތުން މެޗެއް އޮތްނަމަ ކޮންމެ ކުޅުންތެރިޔަކު ޖެހޭނީ އެ މެޗަކަށް ސަތޭކައިންސައްތަ ފުރިހަމައަށް ތައްޔާރުވާން ކަމަށް އޭނާ ބުންޏެވެ. އެއީ ރާއްޖޭގެ ޓީމަކާ ދެކޮޅަށް ނުވަތަ އޭއެފްސީ ކަޕްގެ ޓީމަކާ ދެކޮޅަށް ކުޅެން ޖެހުނު ކަމުގައި ވީނަމަވެސް ވިސްނުން ހުންނަންޖެހޭނެ ގޮތްް ކަމަށް އިވާން ބުންޏެވެ. އެކަން ފާހަގަކުރަމުން އިވާން ވަނީ ދިވެހި ކުޅުންތެރިންނަކީ ހުނަރު ހުރި ބައެއް ކަމަށް ބުނެފައެވެ. ނަމަވެސް މެންޓާލިޓީއާ އެއްވަރަށް، ތައްޔާރުވުންވެސް ރަނގަޅުވާން ޖެހޭނެކަން އޭނާ ފާހަގަކުރިއެވެ.

ޕްރެސްގައި އިވާން ވަނީ އަލީ ފާސިރު (ސެންޓޭ)ގެ ވާހަކަވެސް ދައްކާފައެވެ. އޭނާ ބުނީ އަނިޔާއަށްފަހު ސެންޓޭ ބޮޑު ކުރިއެރުންތަކެއް ހޯދާފައިވާކަމަށް ގަބޫލުކުރެވޭ ކަމަށެވެ. އޭނާއަށް ފެންނަ ތަނުގައި 70 އިންސައްތަ ނުވަތަ 80 އިންސައްތަ ކުޅެން ސެންޓޭ ފިޓު ކަމަށެވެ. އިވާން ފާހަގަ ކުރި ގޮތުގައި މާޒިޔާގެ ކުޅުންތެރިން ސީރިއަސްކަމާއެކު ކުޅެފިނަމަ، ޓީމުން ބޭނުންވާ ނަތީޖާ ނެރެވެއެވެ. އެގޮތުން ޔޫވީ މެޗުގެ ދެވަނަ ހާފުގައި ކުޅުންތެރިން އެކަން ދެއްކިކަމަށް އޭނާ ބުންޏެވެ.

އިދިކޮޅަށް މާޒިޔާއިން ކުޅެންޖެހޭ ގްރީންއާ ގުޅޭގޮތުން ވާހަކަދައްކަމުން އޭނާ ބުނީ، އެ ޓީމު ކުޅުނު ފުރަތަމަ މެޗު ބެލިކަމަށާއި، އެ މެޗުގައި އެހާ ރަނގަޅު ނޫން ކަމަށެވެ. އެހެންނަމަވެސް އޭނާއަށް ޔަގީންވާ ކަމަކީ މާޒިޔާއާ ދެކޮޅަށް ކުޅޭއިރު، އެ ޓީމުވެސް ފުރިހަމައަށް ތައްޔާރުވާނެކަން ކަމަށާއި، އެއީ މާޒިޔާއާ ދެކޮޅަށް ނިކުންނަ ކޮންމެ ޓީމަކުންވެސް ކުރާ ކަމެއް ކަމަށެވެ.

ލީގުގައި މާޒިޔާއިން ގްރީންއާ ދެކޮޅަަށް ނިކުންނައިރު، ގްރީން ވަނީ ކުޅުނު ފުރަތަމަ މެޗުގައި ސުޕަ ޔުނައިޓެޑު ސްޕޯޓްސް (ސަސް)އާ ވާދަކޮށް ބަލިވެފައެވެ. މާޒިޔާއާއި ގްރީން ބައްދަލުކުރާ މެޗު އޮންނާނީ ހޮނިހިރު ދުވަހުގެ ރޭ 21:00ގައެވެ.