ޗާގޯސް މައްސަލައާ ގުޅިގެން އިދިކޮޅު ޕާޓީތަކުން އެކުވެ މަސައްކަތްކުރަނީ ރައްޔިތުންގެ ހިތުގައި ނަފްރަތު އުފައްދަން: ސަރުކާރު
ސަރުކާރާއި ދެކޮޅަށް މަސައްކަތް ކުރާ ބޭފުޅުންނަށް އެއްބަސްވެވޭ އޮންނަނީ އެންމެ ކަމެއް
ރައީސް އޮފީހުގެ ތަރުޖަމާނު މިއުވާން މުހައްމަދު
ޗާގޯސް މައްސަލައާ ގުޅިގެން ސަރުކާރާ ދެކޮޅު ޕާޓީތަކުން އެކުވެ މަސައްކަތްކޮށް، ބަންޑާރަ ނައިބު އަލްއުސްތާޛު އިބްރާހީމް ރިފްއަތުގެ އިތުބާރު ނެތްކަމުގެ ވޯޓު ނެގުމުގެ މަސައްކަތް ކުރަނީ ރައްޔިތުންގެ ހިތުގައި ނަފްރަތު އުފެއްދުމަށް ކަމަށް ސަރުކާރުން ބުނެފިއެވެ.
ބުރާސްފަތި ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވީ ސަރުކާރާއި ދެކޮޅަށް މަސައްކަތް ކުރާ ބޭފުޅުންނަށް އެއްބަސްވެވޭ އޮންނަނީ އެންމެ ކަމެއް ކަމަށާއި، އެއީ ވެރިކަން ކުރުން ކަމަށެވެ. ނަމަވެސް ވެރިކަން ކުރާނީ ގުޅިގެންތޯ އާއި ވަކިވެގެންތޯ ވެސް ނުނިންނޭ ކަމަށް މިއުވާން ވިދާޅުވިއެވެ. އަދި ސަރުކާރާއި ދެކޮޅު ބޭފުޅުން މިހާރު ޗާގޯސްގެ މައްސަލަ ނަގައިގެން މަސައްކަތް ކުރަނީ ރައްޔިތުންގެ ހިތުގައި ނަފްރަތު އުފެއްދުމަށް ކަމަށް މިއުވާން ވިދާޅުވިއެވެ.
ޗާގޯސް މައްސަލާގައި އިދިކޮޅު ބޭފުޅުންނަށް ވެސް އެއްގަލަކަށް ނޭރޭކަން ފާހަގަކުރައްވައި މިއުވާން ވިދާޅުވީ ޗާގޯސް އަކީ ދިވެހިންގެ ތަނެއްތޯ ނުވަތަ ނޫންތޯ ވެސް އެ ބޭފުޅުންގެ މެދުގައި ހިޔާލު ތަފާތުވުން އުފެދިފައިވާ ކަމަށެވެ. އަދި ބަންޑާރަ ނައިބު އަލްއުސްތާޒު އިބްރާހީމް ރިފްއަތުގެ އިތުބާރު ނެތްކަމަށް ހުށަހަޅަން މަސައްކަތް ކުރާއިރު، ކާމިޔާބު ވާނެކަމަށް ބަލައިގެން ނޫންކަމަށާއި، އިތުބާރު ނެތްކަމުގެ ވޯޓެއް ކާމިޔާބު ވާނެކަމުގެ އުންމީދެއް ވެސް އެބޭފުޅުންގެ ނެތް ކަމަށް މިއުވާން ވިދާޅުވިއެވެ.
މީގެ އިތުރުން މިއުވާން ވިދާޅުވީ ޗާގޯސް މައްސަލާގައި އިދިކޮޅު ދައްކަމުންދަނީ ހަގީގާތާއި ހިލާފު ވާހަކަތަކެއް ކަމަށާއި، ރާއްޖޭގެ ކަނޑުގެ ބައެއް ނުގެއްލޭ ކަމަށެވެ. އަދި ފުށުއަރާ ކަނޑުގެ ސަރަހައްދަކުން ރާއްޖެއަށް ބޮޑުބައެއް ލިބުން އެއީ ލިބުނު ކާމިޔާބީއެއް ކަމަށް މިއުވާން ވިދާޅުވިއެވެ. ރައީސް ފޮނުއްވިކަމަށް ބުނާ ސިޓީފުޅަށް އިޝާރާތް ކުރައްވައި މިއުވާން ވިދާޅުވީ އެސިޓީފުޅާއި އިޓްލޮސްގެ ނިންމުމާއި އޮތީ ކޮންމެ ގުޅުމެއްކަމެއް އިދިކޮޅު ފަރާތްތަކުން ވިދާޅުނުވާ ކަމަށެވެ.
ޗާގޯސްގެ މައްސަލައާ ގުޅިގެން ރައްޔިތުން މަޖިލީހުގެ ރައީސް މުހައްމަދު ނަޝީދުގެ "ފިކުރެއްގެ ދިރުން"އާ އެކު ޕީޕީއެމް، އެމްއެންޕީ އަދި ޖޭޕީން ވަނީ އިއްތިހާދެއް ވަނީ އެކުލަވާލާފައެވެ.
