މިނިސްޓަރ އޮފް ޑިފެންސް އަލްއުސްތާޒާ މާރިޔާ އަހުމަދު ދީދީ، އެފްރިކާގައި ކުރިއަށްގެންދާ "އެފްރިކަން ވިމެން ސަމިޓް-23"ގައި ތަގްރީރުކުރައްވައިފިއެވެ.

މިނިސްޓަރު ދެއްކެވި ވާހަކަފުޅުގައި އަލިއަޅުއްވައިލެއްވީ އަންހެނުން ބާރުވެރިކުރުވުމާއި، އިޖުތިމާއީ އަދި ސިޔާސީގޮތުން އަންހެނުންނަށް ބާރުވެރިކަން ހޯދައިދިނުމުގެ އިތުރުން، ތައުލީމުގެ މުހިންމުކަމާއި، އެއްވެސް މީހަކު ބާކީނުކޮށް ކުރިއަށްދިއުމުގެ އިތުރުން، ކަންކަން އުނގަންނައިދިނުމާއި ދަސްކޮށްދިނުންފަދަ މައުލޫތަކަށެވެ.

މީގެ އިތުރުން މިނިސްޓަރު ވަނީ، އެ ސަމިޓުގެ ހަވާސާގައި އެކަމަނާގެ ހަޔާތްޕުޅާއި މަސައްކަތްޕުޅާ ގުޅޭގޮތުން ޚާއްސަ ބަސްތީގަތުމެއް ދެއްވާފައެވެ. މި މިސަމިޓްގެ ތަފާތު ތީމްތަކަށް އަމާޒުކޮށް ބޭއްވޭ ޕެނަލް ޑިސްކަޝަންތަކުގައިވެސް މިނިސްޓަރު ބައިވެރިވެވަޑައިގަންނަވާނެއެވެ.

މި މަހު 11އާ 12 ގައި ދެކުނު އެފްރިކާގެ ކޭޕްޓައުންގައި އޮންނަ "އެފްރިކަން ވިމެން ސަމިޓް-23"ގައި ބައިވެރިވެވަޑައިގަތުމަށްޓަކައި މިނިސްޓަރު އެގައުމަށް ވަޑައިގަންނަވާފަވަނީ ބުދަ ދުވަހުގެ ރޭގެ ވަގުތެއްގައެވެ. މިދަތުރުފުޅަކީ، އެފްރިކާ ވިމެން ސަމިޓް އޮގަނައިޒޭޝަންގެ ފަރާތުން ދައުވަތު އަރުވައިގެން އެކަމަނާ ކުރައްވާ ދަތުރުފުޅެކެވެ.

މި ދަތުރުފުޅުގައި މިނިސްޓަރުގެ އަރިހުގައި، ރާއްޖެއިން ސްރީލަންކާއަށް ކަނޑައަޅާފައި ހުންނަވާ ޑިފެންސް އެޑްވައިޒަރ، ކާނަލް ހަސަން އާމިރުއާއި މިނިސްޓަރ ބިއުރޯގެ މިލިޓަރީ އެއިޑް ވޮރަންޓް އޮފިސަރ 2 އަބްދުﷲ ރަޝީދު ބައިވެރިވެވަޑައިގަންނަވާނެއެވެ.

މި ދަތުރުފުޅުގައި، ސައުތު އެފްރިކާއަށް ވަޑައިގަތުމަށް ކުރައްވާ ދަތުރުފުޅުގެ ޚަރަދު ފިޔަވައި އެހެން ހުރިހާ ޚަރަދެއް ކުރައްވާގޮތަށް ހަމަޖެހިފައިވަނީ ސަމިޓް އޯގަނައިޒްކުރާ ފަރާތުންކަން ފާހަގަކޮށްލެވެއެވެ.

މިއީ މ، އެފްރިކާ ބައްރަށް އަމާޒުކޮށް، އަންހެނުން ބާރުވެރިކުރުވުމަށާއި، އަންހެނުންގެ ހައްގުތައް ކަށަވަރުކޮށް، އިޖްތިމާއީ، ދިފާއީ، ސިޔާސީ، އަދި އެހެނިހެން ދާއިރާތަކުގައި އަންހެނުންގެ ދައުރު ފުޅާކުރުމުގެ މަގުސަދުގައި ބާއްވަމުން އަންނަ ސިލްސިލާ ސަމިޓެކެވެ. މި ސަމިޓުގެ އެހީގައި، އެފްރިކާގެ ބައްރުގެ ބޭރުން، އެހެނިހެން ދާއިރާތަކާއި ރޮނގުތަކުން ފާހަގަކުރެވޭ ބޭކަނބަލުން ބައިވެރިވެވަޑައިގެން ތަގުރީރު ކުރެއްވުމަށްވެސް ވަނީ ހަމަޖެހިފައެވެ.